Marki 10 - Gourmanchéma Bible

¹ Jesu den fii ki ñani likani ki gedi Jude tinga yaaga n ye Judana kpenu kandima. Bi niba go den taani o kani hali boncianla. O den bangi ba nani wan maani ki tiendi maama.

² *Falisieninba bi tianba den cua o kani ki bua ki dia o ku madiagu ki buali o: «Naani li *bali maama tuo o ja n ñani o pua?»

³ O mo den buali ba: «Musa den bili yipo lede?»

⁴ Bi den yedi o: «Musa den tuo o ja n diani li poñatili ki ñani o.»

⁵ Jesu den yedi ba: «Li tie kelima yi pajuaga yaa po ke o diani ki bili yipo laa ñoabonli.

⁶ Ama ŋanduna tagima cilima yogunu, U Tienu den tagi o ja leni o pua.

⁷ Li tie lani yaa po ke o ja baa ña o baa leni o naa kani ki taani leni o pua,

⁸ bani niba lie yeni n tua gbananyendi. Lanwani, baa go tie bilie ka, bi di tie yende.

⁹ Lani yaa po U Tienu n taani yaala, o nisaalo n da paadi la.»

¹⁰ Ban den guani bi candeni, Jesu ŋoadikaaba den buali o laa maama fuuli.

¹¹ O den yedi ba: «Yua n ñani o pua ki go taa potoa kuli conbi, ki tudi wan den kpa pia yaa pua po.

¹² O pua moko yaa ñani o calo kani ki kuni jatoa, o conbi.»

Jesu gaali a biwaala

¹³ Bi niba den kpendinni Jesu kani a biwaala, ke wan sii ba ki gaali ba. O ŋoadikaaba den funi leni yaaba n kpendinni ba.

¹⁴ Jesu n den laa lani, o pali den beni ke o yedi o ŋoadikaaba: «Cedi mani a biwaala n cua n kani, ki da deli ba, kelima *U Tienu diema tie yaaba n tie nani a biwaala ne po yo.

¹⁵ N waani yi i moamoani ke yua n kaa tuo U Tienu diema nani ki biwaaga yeni, kan kua lienni.»

¹⁶ Lani o den taa a bila ki ŋmabi ba, ki maani bipo o nii ki gaali ba.

O jawapiado

¹⁷ Jesu n den fii lankani ki baa suagi liiga, o ja den sani ki cua o kani ki gbaani o nintuali ki buali o: «O canbaaŋamo, n baa tieni lede ki baa yaa miali n kan gbeni?»

¹⁸ Jesu den buali o: «Be yaa po ke a yini nni niŋamo? U Tienu bebe yaaka, oba kuli ki ŋani.

¹⁹ A bani li balimaama n bili yaala: Ŋan da kpa o nilo, ŋan da conbi, ŋan da su, ŋan da tieni mi siedi faama a nisaalilielo po, ŋan da janbi oba yin pia yaa ŋantaado yi siiga nni kuli, ŋan yaa jigindi a baa leni a naa.»

²⁰ O ja yeni den goa ki yedi o: «Canbaa, n kubi lankuli hali n biwaama nni.»

²¹ Jesu den diidi o ki bua o ki yedi o: «Bonyenla n poadi a kani. Gedi ki ban kuadi ŋan pia yaala kuli ki pa la a luoda, lane a baa baa ŋalimani tanpoli po. Li yaa puoli ŋan cua ki ŋoadi nni.»

²² O ja yeni nunga den biidi laa maama po, ke o tagini ki ban caa leni li pabiidili kelima o ŋalimano den yaba.

²³ Jesu den diidi ki lindi o ŋoadikaaba ki yedi ba: «Li pa hali boncianla a piada n baa ki kua U Tienu diema nni.»

²⁴ Li den paki o ŋoadikaaba. Lani Jesu go den yedi ba: «N bila, U Tienu diema nni kuama pa boncianla.

²⁵ Ku yuoyuogu n tagini mi kpalipienbonma nni dingi ki cie o piado n kua U Tienu diema nni.»

²⁶ Li go den paki o ŋoadikaaba hali boncianla ke bi yedi biyaba: «Li yaa tie yeni, ŋme nan baa fidi ki tindi?»

²⁷ Jesu den diidi ba ki yedi: «Bi nisaaliba kan fidi la, ama U Tienu yaa po laa tie yeni, kelima wani U Tienu n fidi li bonla kuli.»

²⁸ Pieli den yedi o: «Diidi ki le, tinba, ti den fii ki ŋa likuli ki ŋoadi a.»

²⁹ Jesu den goa ki yedi o: «N waani yi i moamoani ke laa pia yua n fii ki ŋa o dieli, yaaka o naataanjaba, yaaka o naataanpola, yaaka o naa, yaaka o baa, yaaka o bila, yaaka o kuani kelima n yaa po leni o Laabaaliŋamo yaa po,

³⁰ ki kan baa likuli taalima kobiga kobiga ki pugini ŋanduna na niinni, a diena, leni bi naataanjaba, leni a naataanpola, leni naanba, leni a bila, leni i kuani, ki go baa bi niba n waani o fala boncianla. Yaa yogunu n kpendi mo, o go baa baa yaa miali n kan gbeni.

³¹ Die liiga yaaba siiga boncianla baa tua puoli yaaba, puoli yaaba siiga mo boncianla baa tua liiga yaaba.»

Jesu waani mi tataama ke o baa kpe ki go fii

³² Bi den tagi u sanu ki do ki caa Jelusalema, ke Jesu den ga bi liiga ki cuoni. O ŋoadikaaba yama den yagi ke yaaba n den yegi leni ba mo kuli den ye leni ti jawaandi. Jesu go den taa bi piiga n niliediba, ki go wangi ba yaala n baa tieni o ke laa pia tama.

³³ O den yedi ba: «Cengi mani, ti do ki caa Jelusalema. Bi baa cuo o *Ja Bijua ki teni o bi kopadicianba yudanba leni li *bali maama bangikaaba nuu nni. Bi baa jia leni o ti buudi ki bili ban kpa o, ki teni o bi nilanba nuu nni.

³⁴ Bi baa ñuadi o ki sii opo ti ñinsandi, ki pua o i baliji ki kpa o. O kuuma dataali daali, o go baa fii bi tinkpiba siiga.»

Jaka leni Jan miabu

³⁵ Sebede bijaba, Jaka leni Jan, den nagini Jesu kani ki yedi o: «Canbaa, ti bua ŋan tieni tipo tin baa mia ŋa yaala.»

³⁶ O den yedi ba: «Yi bua min tieni yipo be?»

³⁷ Bi den yedi o: «A yaa ti kali a kpiagidi bali kalikaanu, ŋan pa ti tin kali, yendo a jienu, yendo mo a ganu.»

³⁸ Jesu den goa ki yedi ba: «Yii bani yin miadi yaala. Yi baa fidi ki ño min baa ño yaa tadiñokaaga nni bi? Yi baa fidi ban *batisi yi ban baa batisi nni yaa batisima?» Bi den yedi o: «Ti baa fidi.»

³⁹ Jesu den goa ki yedi ba: «Moamoane ke yi baa ño min baa ño yaa tadiñokaaga nni, bi baa batisi yi ban baa batisi mini yaa batisima.

⁴⁰ Ama ki kaani o nilo n jienu yaaka n ganu, laa ŋua mini, li tie U Tienu n bogini ki bili la yaaba yaa po yo.»

⁴¹ Ŋoadikaaba piiga yaaba n sieni n den gbadi lani, bi pala den beni Jaka leni Jan po.

⁴² Jesu den yini ba ki yedi: «Yi bani ke ban nua yaaba ke bi tie i nibuoli yudanba yeni mabindi ba, ke bi paatieba mo die ba leni u paalu.

⁴³ Ama lan da tie yeni yinba yaa siiga. Yinba yaa siiga yua n bua ki tua niciamo kuli, wan tua yi naacemo.

⁴⁴ Yua mo n bua ki tua yi liiga yua kuli, wan tua yua kuli yonbo.

⁴⁵ Kelima o Ja Bijua, naa cua ke ban yaa tuuni opo ka, ama ke wan yaa tuuni nitoaba po, ki go pa o miali ki kpe, ki da ki faabi bi niba boncianla.»

Jesu paagi o juamo Batime

⁴⁶ Jesu leni o ŋoadikaaba den pundi Jeliko dogu nni. Ban den ña laa dogu nni bi den yegi leni yaa niligu n yaba, ke o juanmiado, Time bijua yua n yi Batime, ka u sankunu.

⁴⁷ Wan den gbadi ke yua n baa pendi tie Nasaleti yua Jesu, o den tangi: «Jesu, Dafidi Bijua, gbadi npo mi niñima.»

⁴⁸ Yaa niba n yaba den funi leni o ki yedi ke wan suoni, ama o go den tangi boncianla ki pugidi ki tua: «Dafidi Bijua, gbadi npo mi niñima.»

⁴⁹ Jesu den sedi ki yedi: «Yini mani o na.» Bi den yini o juamo ki yedi o: «Paagi a pali, fii, o yi ŋa.»

⁵⁰ O juamo yeni den luni o kpalibu ki fii yenma ki cua Jesu kani.

⁵¹ Jesu den buali o: «A bua min tieni apo be?» O juamo den goa ki yedi o: «Canbaa, n bua ŋan pa nni n nuni n noadi.»

⁵² Jesu den yedi o: «Gedi, a *dandanli paagi a.» Lanyogunu o nuni go den noadi, ke o ŋua Jesu ki yegi leni o.