Aanlyn Bybel

« Vorige

Zowănnī 1 - Geba Roman New Testament

Dèthôḿô̆ Adèjî̄b́è

¹ Hlĕ akăhtî nu dèjî̄b́è ògè. Dèjî̄b́è ògè d́ŏ Kib́ĭcè ò kî dèjî̄b́è ḿîgè Kib́ĭcè thè̆ne.

² Hlĕ akăhtî lò Dèjî̄b́è ògè d́ŏ Kib́ĭcè ò nu.

³ Dèlŏcăcè òhtakô kî Cè; kî dèb́èb́òla adîphî̆htakô Cè ńò tò ò dimĭ ńò.

⁴ Dèjî̄b́è ḿî dèòthôḿô̆ akăhtî, kî dèòthôḿô̆ lai bija dèhlî̆.

⁵ Dèhlî̆ hlî̆lab́ègè dèkhi, kî dèkhi do no dè bègè Cè ńò.

⁶ B́ĭcè thodŏlegè bija dèbwè htè zi mi ḿîgè Zowănnī.

⁷ Zî ḿîgè akha ane thè̆thî dèhlî̆ anikhĭ, cab́ô̆htè bija lŏcăcè ku b́ubò̄ zè dèd́ò adĕ nu.

⁸ Cè thè̆ne zî dî ḿîgè dèhlî̆ ńò. Ze lelagè cab́ô̆htè agā kha thè̆thî d́ŏ dèhlî̆ awîakè̆ anikhĭ nu.

⁹ Dèhlî̆ thè̆ne htè ai bija dèhlî̆ gŏ abwè lelagè d́ŏ Lākho akho jo.

¹⁰ Za la ògè d́ŏ Lākho jo kî Lākho phî̆htakôgè Zo kho Cè cè̆, barasă Lākhopho dî thîhè̆gè Cè ńò.

¹¹ Ze lelagè d́ŏ Zi htĭ Ze ge abu, barasă Zi khwĭpho dî phînigè Cè ńò.

¹² Gajă aphîni Cè kî ab́u Zi mi tcahtĭ tòcò nu, Ci igè lōwa agî̄ phî̆htab́è Kib́ĭcè aphoali.

¹³ Cè tòcò phî̆hta Kib́ĭcè aphoali ḿî tè b́è dèthwidèhtĭ dèphedèhî acè̆ ńò, ḿî cò òla acab́ô̆ Kib́ĭcè thè̆ne aphoali tòcò nu.

¹⁴ Dèjî̄b́è phî̆htagè bija, pĕhtakîgè ahluată, dèdî̄dèhma, kî Cò ògè wè klè̆. Kî wa tcahtîb́ègè Zò dò Ze the. B́ĭcè Pho dèbwè lò adòathe htè aò d́ŏ B́ĭcè Pa ò dèdè̆ nu.

¹⁵ Zowănnī khagè Zi nikhĭ thè̆thî d́ŏ dèjî̄b́è abu gōjo, “Ajo dèbwè ḿîgè jò d́ò̆sai awîakè̆ htè agē lekôkò̆ je le, ḿî ado d́olĭ jè, manè̄, Zî ḿîgè aò ŭsu jè dèbwè nu.”

¹⁶ D́ŏ Zè dèhludètă pĕhtazòhta abu nu, wa lŏcăcè nib́èkôgè Ca kă dèhôwî domo hwă domo lò.

¹⁷ Kib́ĭcè ila Adèhmèla d́ŏ Mŏzè ò nu. Ḿî ahluată kî dèdî̄dèhma nu dè ilakô Jezŭ Krĭstu lò.

¹⁸ Bija ta tcahtîgè B́ĭcè dèbwè̆ ńò, ḿî Zo Pho thè̆ne d́è̆lî̄ hlî̆htaphlò̆htagè Cè.

Zowănnī Baptĭsta Adèkhathè̆thî
( Mattĕo 3.1-12 ; Mărko 1.1-8 ; Lŭka 3.1-18 )

¹⁹ Kîd́ò̆ ajo ḿî Zowănnī adèkhathè̆thî htè b́ĕ Jŭdapho aò Jerŭsalèm u bu tòcò thodŏlegè phŭgi tòcò kî Lĕvipho tòcò htôtcad́è̆tca cè, “Nî ḿî bò̄bwè?”

²⁰ Zowănnī da jab́i tèpwè ńò, kî d́òphlò̆htagè, “Jî dî ḿî Krĭstu ńò.”

²¹ Cè tòcò d́è̆ Zowănnī, “Mègōnu d́ō, nî ḿî bò̄bwè? Nî ḿî Elĭjah ā?” Cò d́òscĭge lōwa tòcò, “Jî dî ḿî Elĭjah ńò.” “Mègōnu nî ḿî prò̆fèt ā?” Kî cò d́òscĭge “Ńò!”

²² Mègōnu d́ō, cè d́è̆ lōwa, “Nî ḿî d́ò̆ bò̄bwè? Cab́ô̆htè wò kò d́ò̆sage zabò̄ bija athodŏ wa tòcò nu. Ńò kò d́òlage ne ne danè̄?”

²³ Cò d́ò lōwa tòcò; “Jî ḿî dèlē athèhta d́ŏ hmîlè̄klè̆, mèdanāgebò̄ B́ĭcè aklè, acab́ô̆ Prò̆fèt Izaĭah d́ògè nu,” cò d́ò̆sagè lōwa tòcò do.

²⁴ Bija ab́è thodŏle tòcò aklè̆ tòcò cò ḿîgè Pharizè̆pho.

²⁵ Zô htôtcad́è̆tca lōwa, cò d́ò, “Ni gî̄ dî ḿî b́eḿĕ ma Mèssĭah ńò, Elĭjah ńò, Prò̆fèt ńò ńò dō, nu ŭsab́ă ma bija htĭ nè?”

²⁶ Zowănnī d́òscĭgegè cè tòcò, “Ju ŭsab́ă thĭ kî htĭ, barasă d́ŏ thĭ klè̆ nu asò̆hto ògè dèbwè, htè thĭ dî thîhè̆gè Cè ńò nu.

²⁷ Zî ḿî agē lekò̆ d́ŏ je lekă dèbwè, htè ja da ta mè pwĕ agā b́ăplè Za khatòkò abi hnò̆nu ńò,” cò d́ò̆sagè lōwa tòcò do.

²⁸ Dè ajo tòcò phî̆htagè d́ŏ Bèthăniad́ŏ aò d́ŏ Jòrdăno Gòlò̄wē lumuhta htè Zowănnī ŭsab́ă bija htĭ alle nu.

Kib́ĭcè Athŏpho

²⁹ Alekă dini Zowănnī kèhtî Jezŭ le d́ŏ cò ò kî cò d́ò lōwa, “Tcabò̄ Kib́ĭcè Athŏpho, htè aphîkè̆ Lākho adèkhòwè nu.

³⁰ Zî ḿî bija htè jò d́ò, ‘Bija agē le je lekă dèbwè nu ḿî Zo do d́olĭ jè, manè̄, Cò ò ŭsu jè,’ nu.

³¹ Jî dî thîhè̆gè Cè ńò hŏ. Barasă jè kè d́è̆lî̄bò̄ Cè d́ŏ Israè̆lpho tòcò nu, ju ŭsab́ăkò̆ bija kî htĭ,” cò d́ò̆sage bija do.

³² Mèhwă Zowănnī kha thè̆thî, cò d́ò, “Ja tcahtî Spirito Tcahtĭ acab́ô̆ thokŏdru aò d́ŏ Mò̄kho kî alela d́ŏ Zo kho nu.

³³ Jî dî thîhè̆gè Cè ńò, barasă Cè htè athodŏle jè aku ŭsab́ă bija kî htĭ Dèbwè d́ògè jè, ‘Cè htè na gā tcahtî Spirito Tcahtĭ la kî sò̆la Zo kho Dèbwè ḿî Cè htè aku ŭsab́ă bija kî Spirito Tcahtĭ Dèbwè nu,’ ad́ò jè do.

³⁴ Ja tcahtî htŏ kî kha thè̆thî htè Zî ḿî Kib́ĭcè Apho nu,” cò d́ò̆sagè bija do.

Bōhmubicè Aŭsu Tòcò

³⁵ Alekă dini Zowănnī sò̆hto òwe b́ĕnu, ploplo kî zo bōhmubicè gībwè.

³⁶ Ca tca hwă Jezŭ lekô klè d́ō, cò d́ò, “Tcabò̄, Kib́ĭcè Athŏpho!”

³⁷ Zo bōhmubicè gībwè thîhè̆b́è zè dèjî̄b́è d́ō, zô lôkôgè Jezŭ ale.

³⁸ Jezŭ tcab́age alekă, Za tcahtî lōwa tòcò lekô Ze le d́ō, Cò d́ò lōwa, “Thĭ wāhlègè danè̄?” Cè d́è̆ lōwa do. Cè tòcò d́ò, “Sara, ńò ò d́òlè̄?” cè d́è̆gè lōwa do.

³⁹ Cò d́òscĭge, “Le tcabò̄!” Cò d́ò lōwa tòcò do. (B́ĕnu ḿî b́ĕ lumulab́a lwīnare akhî nu.) Cè tòcò le kî tcahtîgè Jezŭ ò ale; anu dini cò òkôgè lōwa akă htô̆do dŏ lumuladē nu.

⁴⁰ Athîhè̆b́è hwă Zowănnī adèjî̄b́è d́ō alôkôgè Jezŭ ale dèbwè ḿîgè Andrĕa htè Simŏnè Petru apîkò̆ nu.

⁴¹ Za tcahtî ŭsugè zè mè̄ Simŏnè d́o, cò d́ò lōwa, “Wa pahtî htŏ Mèssĭah htŏ,” cò d́ò̆sa lōwa do. (Ahtabohtab́ă ḿî “Krĭstu”)

⁴² Mèhwă d́ō, ze leihŭgè lōwa d́ŏ Jezŭ ò nu. Jezŭ tcahtî Simŏnè d́ō, cò d́ò lōwa, “Nî ḿî Simŏnè, Zowănnī apho; barasă nè kè̄ b́èjokò̆ Kĕphas,” Cò d́ò lōwa do. (Khĕphas nu ajāthô Petru kî ahtabohtab́ă ḿî “Lo.”)

Jezŭ Jo Philĭpo kî Nathaniĕlè

⁴³ Alekă dini b́ĕ Za thamò̆ le d́ŏ Galilĕage nu d́ō, Ca tcahtîgè philĭpo. Jezŭ d́ò cè, “Lekôbò̄ je le.”

⁴⁴ Philĭpo ḿî cò ò d́ŏ Bèthsaĭda u htè Andrĕa kî Petru au nu.

⁴⁵ Philĭpo tcahtî Nathaniĕlè d́ō, cò d́ò lōwa, “Wa pahtî htŏ Cè, htè Mŏzè d́ŏ zè dèhmèla Acèbu kî prò̆fèt tòcò adèhweladòlò awîakè̆ htè Zŏzè apho Jezŭ, Nazarè̆th upho nu,” cò d́ò̆sa lōwa do.

⁴⁶ Ḿî Nathaniĕlè d́ògè cè, “Dè aè phlòhta zabò̄ d́ŏ Nazarè̆th u bu dimimi ā?” cò d́è̆gè lōwa do. Philĭpo d́òge cè, “Le kî tcabò̄,” cò d́òscĭgegè lōwa do.

⁴⁷ Jezŭ kèhtî Nathaniĕlè le d́ŏ Cò ò d́ō, Cò d́ò̆sa bija, “Tcabò̄, Israè̆lpho akhwĭ atcă, htè adèkèḿè tò ò ńò dèbwè nu,” Cò d́ò do.

⁴⁸ Nathaniĕlè d́ò Cè, “Nî thîhè̆ d́ò̆ jè hlekadè̄?” cè d́è̆gè Jezŭ do. Jezŭ d́òge cè, “Dukhlŭkî Philĭpo jo nè hnî̆ńò nu, ja tcahtî nè d́ŏ thod́ohtĭthè amulè̄ nu,” Cò d́òge lōwa do.

⁴⁹ Nathaniĕlè d́òscĭge Cè, “Sara, Nî ḿî Kib́ĭcè Apho, Israè̆l Asaphra,” cò d́ò lōwa do.

⁵⁰ Jezŭ d́òscĭge cè, “Ja tcahtî nè d́ŏ thod́ohtĭthè amulè̄ nu jò d́ò do d́ō, nu b́ugè hŏ. Na gā tcahtîb́èkò̆ dè adoamu d́olĭ ajo,” Cò d́ò lōwa do.

⁵¹ Kîd́ò̆ Cò d́òwe lōwa, “Jò d́ò̆sa thĭ adî̄ahma, thĭ gā tcahtîkò̆ Mò̄kho ò tab́ă kî B́ĭcè Amò̄khobwèzo tòcò gā htahtalalakò̆ d́ŏ Bija Apho akho nu,” Cò d́ò̆sagè lōwa tòcò do.

« Vorige

Bible Society of Myanmar

Volg ons:

Geborgde skakels

Advertensies