Aanlyn Bybel

Philippiăno 1 - Geba Roman New Testament

¹ Jezŭ Krĭstu akhî̆abwè, Păulu kî Timò̆theo hweni Kib́ĭcè abijakhwĭpho aò Philippiăno adèòplo akhoane kî amèzodè lŏcăcè, htè aḿî domokhwĭ lò d́ŏ B́ĭcè Jezŭ Krĭstu abu tòcò nu:

² Wa Pa Kib́ĭcè kî B́ĭcè Jezŭ Krĭstu ki ila d́ò̆è thĭ ahluată kî dèjīdèd́wă.

Păulu Adèda Philippiăno Adèòplo Anikhĭ

³ B́ĕ jo gomohtani thĭ adĕ nu, ja htăhtai tèpwè Kib́ĭcè ahluată,

⁴ kî b́ĕ ja dathèb́è̆dè thĭ lŏcăcè anikhĭ adĕ nu, jè thèb́è̆hta d́ŏ dèthalōthala abu,

⁵ manè̄, thĭ mèzogè jè d́ŏ Vanzĕlō anikhĭ hlĕ akăhtî htô̆ khŏdini jo nu.

⁶ Mègōnu d́ō, ju b́u thĕbwe d́ŏ Kib́ĭcè, htè atcahta adèmè awîaè d́ŏ thĭ bu nu, Zè gè̄ mèwe ahlò̆mò̄ htô̆do d́ŏ dèpĕhtazòhta b́ĕ Jezŭ Krĭstu Amuni nu.

⁷ Thĭ ò thèjô̆ tèpwè d́ŏ ja thabu nu. Mègōnu d́ō, jè dèbè̄thobè̄tha thĭ kho acab́ô̆ gōjo nu ḿî ab́èabò tèpwè. Manè̄, b́ĕ jò òwe dèkî̆dî̄ abu khŏnujo ḿîwî, kî b́ĕ jò òhlô̆òlawe kî khad́îd́ăi Vanzĕlō kî mèhmemèglo za akhè̆ ḿîwî, thĭ nib́èkô tèpwè ja kă dèhludètă htè Kib́ĭcè ila jè nu.

⁸ Kib́ĭcè ḿî akhathè̆thî ji nikhĭ htè b́ĕ jò d́ò d́ŏ jè b́èlò̄ thĭ lŏcăcè nu ahèhta d́ŏ Jezŭ Krĭstu thè̆ne atha bu nu.

⁹ Jè thèb́è̆dahta thĭ nikhĭ cab́ô̆htè thĭ dèb́èlò̄, dèthîhè̆ dèdî̄dèhma gō dohta derederebò̄ anikhĭ, khaĺè thĭ gē bēphad́apha zakò̆ dè ab́è kî atè b́è ńò,

¹⁰ kî thĭ gô̄ rô zabò̄ dè aègudŭ nu. Anu d́ō, thĭ gô̄ hlô̆ gā la kîkò̆ dè ta tcă di htĭ ńò lŏcăcè kî dèd́òdèsa b́ĕ Krĭstu Amuni dini nu.

¹¹ Thĭ dèòthôḿô̆ gē pĕhtakîkò̆ dèdî̄dèhma, dèwîdèè htè amèni za thĭ ḿî htĕ Jezŭ Krĭstu d́ŏ Kib́ĭcè adòathe anikhĭ kî dèkòihtăi anikhĭ nu.

Ji Nikhĭ Dèò ḿî Krĭstu

¹² Thè̆buthè̆we tòcò, ja thaèni thĭ thîhè̆ dè aphî̆htani jè tòcò nu ahtòthakă hnèhnè Vanzĕlō lò.

¹³ Adôidè na abu klĭpho aò b́ĕjo gŏ abwè kî bija alewe tòcò thîhè̆b́ègè htè jè b́èhtînī dèkî̆dî̄ abu d́ŏ jî ḿî Krĭstu akhî̆abwè akhoacè̆ nu.

¹⁴ D́ŏ jò ògè dèkî̆dî̄ bu gōjo acè̆, amèòèhta thè̆buwe tòcò adèb́u d́ŏ Kib́ĭcè abu, kî ca tha khŭhtagè gŏ asŏakhè̆ d́ŏ akò d́ò̆htôla dèthalōthala awîakè̆ d́ŏ dèkhŭdèhè̆ abu nu.

¹⁵ Nòthò̆ hnò̆nu, tòcò cò d́ò̆htôla Krĭstu awîakè̆ d́ŏ dèthakla kî dègodètra abu, barasă tòcò cò d́ò̆htôla tèpwè d́ŏ dèbè̄thobè̄tha adî̄ahma abu lò.

¹⁶ Cè tòcò thîhè̆ htè Kib́ĭcè ila jè agō woikhai Vanzĕlō akhoacè̆, cè tòcò d́ò̆htôla tèpwè d́ŏ dèb́èlò̄ abu nu.

¹⁷ Alewe tòcò tò d́ò̆sa Krĭstu awîakè̆ d́ŏ dètha danā abu ńò, ḿî d́ŏ dèthaèni amiathè anikhĭ lò. Cè tòcò gomo d́ŏ aki ibaisè̆ jè d́olĭ kî ale, b́ĕ jò òwe dèkî̆dî̄ bu akhè̆ jo nu.

¹⁸ Cadè̄ cadè̄ hwahwă, atè b́èkhè tèpwè ńò. Ja thaganāi tèpwè dèmè ane gōjo akhoacè̆. Dèbè̄thobè̄tha ab́è ḿîwî atè b́è ńò ḿîwî, Krĭstu awîakè̆ ḿî b́èd́ò̆htôla d́ŏ klè òè̆b́ò̆ abu nòthò̆ hnò̆nu, ja thaganāi tèpwè. D́ŏ alekă ḿî ḿî ja gā thaganāi we tèpwè.

¹⁹ Manè̄, d́ŏ thĭ dèthèb́è̆ ji nikhĭ kî d́ŏ Jezŭ Krĭstu aSpirito Tcahtĭ adèmèzo acè̆ jô gô̄ hlô̆htab́è tèpwè dècŏglo nu.

²⁰ Jè dèthaganāi kî jè dèmulè̄sascĭ adogudŭ ḿî jè gè̄ dè bè̄ladēda b́èbò̄ dèphîdèmè alab́è jè dimĭ ńò, ḿî gŏ asŏakhè̆ nu, lasăd́è̆è khŏnujo, tha adèkhŭdèhè̆ gē pĕhtazòhtabò̄ ju bu, thĭ ḿîwî, thôḿô̆ ḿîwî, Krĭstu kè̄ b́è dèmèhĭmèhtè̆ d́ŏ je neb́î̆cè thèd́è̆bwè nu.

²¹ Dèthôḿô̆ ḿîbò̄ danè̄? Ji nikhĭ nu, dèthôḿô̆ ḿî Krĭstu lò. Mègōnu d́ō, dèthĭ nu ahluată ò d́okhlŏ lò.

²² Barasă d́ō, ḿî d́ŏ jò ò thôḿô̆we acè̆ d́ō, jè mèdè ahtanilani tòcò gā za d́okhlŏ d́ō, ja ta rô b́èlè̄ domomo? Ji dî thîhè̆ ladîlase ńò.

²³ Ja tha b́ècwid́ahto d́ŏ dègīmo amēzo nu. Ja thaòsô d́ŏ agè̄ bè̄dakè̆ jè dèò kî ge ò thôḿô̆plo Krĭstu,

²⁴ Barasă d́ō, d́ŏ dèmèzo thĭ anikhĭ nu, ajwīamo d́okhlŏ ḿî jò kò ò thôḿô̆b́è we lò.

²⁵ D́ŏ dèjo akhoacè̆, jè dè htèniwĭniwa tèpwè ńò. Mègōnu akhoacè̆, jò kò ò thôḿô̆kô we thĭ kă lò. Jò kò ò thôḿô̆kô we thĭ lŏcăcè akă, cab́ô̆htè jè gè̄ mè òèhta thĭ dèdohtahtô̆hta kî dèdohtahtô̆hta kî dèthalōthalai d́ŏ dèb́u abu,

²⁶ cab́ô̆htè b́ĕ gè kèhtîhlè we kòd́ò̆ lōwa tapla be nu. Thĭgè bè̄dobè̄mu d́okhlŏ thĭ ne jo kho jè cè̆ d́ŏ thĭ dèòthôḿô̆ abu ploplo kî Krĭstu Jezŭ nu.

²⁷ Khŏnujo, dè ajwīdomodo dimi ḿî thĭ thathôḿô̆ aklè kè̄ b́è ḿî acab́ô̆ Krĭstu aVanzĕlo adèloba ò akhò̆ nu, cab́ô̆htè je gē lehtî za thĭ ḿîwî, da za ńò ḿîwî, jî gî̄ thîhè̆b́èbò̄ thĭ dèsò̆hto òhmeòglo d́ŏ dèlè̄latha domo lò abu, thĭ kō d́o jīplo lōwa d́ŏ Vanzĕlō adèb́udènè anikhĭ nu.

²⁸ Scisănibò̄ ḿè thĭ d́ĕd́òròkhè ale ḿè. Òibò̄ dèthakhŭthahè̆ thèjô̆, kî dè ajo ki i tcahtî cè tòcò ḿî asu, kî thĭ ḿî amèbèdè nu. Manè̄ kòd́òdo dō, Kib́ĭcè ḿî ai thĭ dèmèbè lò.

²⁹ Thĭ nib́è dè akhwèaj́a agè̄ mèdè d́ŏ Krĭstu anikhĭ, tè b́è htĕ thĭ b́u Cè lò ńò, ḿî thĭ gū dub́èkhab́è d́ŏ zi nikhĭ khĭ.

³⁰ Thĭ kî jè, ko d́o jī lōwa dèd́o domo lò. Ḿî dèd́o htè thĭ kèhtî jo d́ogè hlĕ aŭsu kî thĭ thîhè̆gè akhò̆ nu, jo d́o we khŏnujo lò.

« Vorige

Bible Society of Myanmar

Volg ons:

Geborgde skakels

Advertensies