Aanlyn Bybel

Mattĕo 28 - Geba Roman New Testament

Jezŭ Htaboge Dèthĭ Aklè̆
( Mărko 16.1-10 ; Lŭka 24.1-12 ; Zowănnī 20.1-10 )

¹ B́ĕ Munisòd́è̆ hwă, dòsòd́è̆ aŭsu dini lumuwòthab́ĭ nu, Marĭa Madalè̆nā kî Marĭa alewe dèbwè legè d́ŏ lūkho nu.

² Tcabò̄, Lākho jijā dèbogè, manè̄, Kib́ĭcè Abwèzo dèbwè ò d́ŏ Mò̄kho la kî leb́ôhtî hwă saphlòḿĭnigè lo kî sanălăò d́ŏ akho nu.

³ Zu mūkă mè acab́ô̆ hlăgolî nu kî zè dèkô̆dèthò mè acab́ô̆ dèscihtĭphò̆ nu.

⁴ D́ŏ dèscisă ni ze le abu, klĭpho adôi lū dalā mègè acab́ô̆ athĭ tòcò akhò̆pha nu.

⁵ Kib́ĭcè Abwèzo jî̄b́èhta kî d́ògè amihmu tòcò, “Scisă ḿè, manè̄ ji thîhè̆ tèpwè thĭ wāhlè Jezŭ htè ab́èhtalaglothĭgè dèbwè nu.

⁶ Cò tò ò b́ĕjo ńò. Manè̄, Za htaboge htŏ acab́ô̆ Cò d́ò nu. Le kî tcabò̄ alleaklè htè Jezŭ òsòḿî̆lagè nu.

⁷ Kî geplaplă, d́ò̆sabò̄ Zo bōhmubicè tòcò htè Za htaboge htŏ nu. Kî tcabò̄ Ze legè thĭ hlò̆mò̄ d́ŏ Galilĕage bu, d́ŏnu thĭ gā tcahtîkò̆ Cè. Tcabò̄, Jò d́ò̆sadòlò htŏ thĭ.”

⁸ Cè tòcò hèhtaplaplăgè lūkho d́ŏ dèscisă kî dèthalōthalai abu kî cwèlegè d́ŏ bōhmubicè tòcò ò, cab́ô̆htè cò kò̄ d́ò̆sa lōwa dè awîakè̆ ajo nu.

⁹ Kî tcabò̄, Jezŭ htèglè̄ni cè tòcò, Cò d́ò, “B́èmò!” Cè tòcò le kî phòb́a Jezŭ akhahlèkho kî thèb́è̆htagè Cè.

¹⁰ Jezŭ d́ò cè tòcò, “Scisăbò̄ ḿè. Le d́ò̆sabò̄ Jè thè̆buwe tòcò agē le d́ŏ Galilĕage nu. D́ŏnu ca ka tcahtîkò̆ Jè.”

Adôidè Adèd́ò̆sage

¹¹ B́ĕnu cè tòcò lekô klè nu, tcabò̄, klĭpho adôi lū aklè̆ tòcò genī U bu kî d́ò̆sagè Phŭgido tòcò dè aphî̆hta hwăgè tòcò nu.

¹² Cè tòcò ladēplo hwă akhoane athobwethabwe tòcò, ci i òè hwă klĭpho tòcò hô̆ d́ō,

¹³ zè hmèla lōwa, “D́òbò̄ htè Zo bōhmubicè tòcò le b́ĕ klăḿè̆lumu d́ō ahugè Zo co b́ĕ wa sòḿĭthebĕ akhî nu.

¹⁴ Agò̄ phlò̆nī b́eḿĕ Mādo anigu bu d́ō, wò kò d́òmò d́ò̆è cè cab́ô̆htè thĭ gô̄ hlô̆htabò̄ dèba nu.”

¹⁵ Cè tòcò phî hô̆ kî mègè acab́ô̆ cè b́è dèhtulahmèla adĕ nu. Kî bija dòdò̄tòthò̆ ikò̆ d́ŏ Jŭdapho tòcò aklè̆ htô̆ dola khŏdini jo nu.

Jezŭ D́è̆lî̄hta Ane
( Mărko 16.14-18 ; Lŭka 24.36-49 ; Zowănnī 20.19-23 ; Thodŏpho 1.6-8 )

¹⁶ Bōhmubicè scidèbwè legè d́ŏ Galilĕage nu, d́ŏ khòlò̆ dèmè̆ akho acab́ô̆ Jezŭ hmèla cè tòcò adĕ nu.

¹⁷ Kîd́ò̆ b́ĕ cè tòcò tcahtî Cè nu, zò gò̄la thèb́è̆hta lōwa, barasă tòcò cò htèniwĭniwa we tèpwè.

¹⁸ Jezŭ leb́ôhtî cè kî Zi jî̄b́èhtî lōwa, Cò d́ò, “Dèphlŭdèthere lŏcăcè d́ŏ Mò̄kho kî Lākho b́è ilagè Jè.

¹⁹ Mègōnu, le kî mèphî̆hta bijakhwĭpho lŏcăcè Jo bōhmubicè, ŭsab́ăbò̄ cè htĭ d́ŏ Pa kî Pho kî Spirito Tcahtĭ ami abu nu.

²⁰ Kî thôithò̆i cè agè̄ mèkô lŏ Jè hmèlagè thĭ tòcò nu. Kî tcabò̄, Jò òkô thĭ kă gô̆ amuni htô̆ munilēdū nu.”

« Vorige

Bible Society of Myanmar

Volg ons:

Geborgde skakels

Advertensies