Aanlyn Bybel

Lŭka 1 - Geba Roman New Testament

Dèd́ò̆sa Ŭsu Bwèdo Theò̆philo

¹ Acab́ô̆ bija òè̆bwè̆ d́ò̆sa wa dèwîdèkè̆ aphî̆hta htŏ d́ŏ wo kho wè klè̆ tòcò nu,

² atcahtî thè̆ne hlĕ mocè̆kho nu ògè tòcò d́ō, d́ŏ dèjî̄b́èdòdò aklè̆ nu, zi phîlailani tèpwè wa,

³ mègōnu d́ō jè ḿî ḿî jè bè̄lagè ja tha agô̄ lô wāhlè dè awîakè̆ ajo lŏcăcè kî agē hwe d́ò̆sa nè, Bwèdo Theò̆philo,

⁴ cab́ô̆htè ni gī thîhè̆bò̄ dèjî̄b́è htè ab́èila nè tòcò ḿî aladilase lò nu.

Dèd́ò̆sadòlò Zowănnī Baptĭsta Adèòla

⁵ Hlĕ Judĕage Saphra Èrŏdè alethîkhè̆ nu, phŭgi ami ḿî Zakarĭa ògè dèbwè, htè Abbĭa acô klè̆ bu nu, kî zè hmè̆ ami ḿî Èlĭzabèt. Zè hmè̆ Èlĭzabèt nu ḿîgè Aaròn akhwĭ aklè̆ lò.

⁶ D́ŏ Kib́ĭcè ahlò̆mò̄ nu, cè gībwè lōlō ḿî bija adî̄ahma, aòi thoŏthèè Kib́ĭcè adèhmèla kî amèkô pĕhtazòhta akă.

⁷ Barasă zo pho tò ò ńò. Manè̄ d́ō, Èlĭzabèt ḿî asò̆dopho; kî cè tòcò thobwethabwesôgè.

^8-9 Khŏnujo dèphî̆htagè gōjo; acab́ô̆ anuad́ò̆ ò adĕ nu, dèmè ladēgè Zakarĭa akho htè zè gè̄ mèb́è phŭgi adèmè d́ō, ze lenīb́ègè Zarādo bu kî scwigè dèhnŭẃi d́ŏ B́ĭcè ahlò̆mò̄ nu.

¹⁰ Kî bija aboahò thèb́è̆htagè d́ŏ akhlŏ b́ĕ dèhluhta dèhnŭẃi akhî nu.

¹¹ Kib́ĭcè Amò̄khobwèzo pòhtahtîgè cè, kî sò̆htoògè d́ŏ dèscwigè̄hòi dèhnŭẃi adèthèb́è̆kho adèhtwè dòkhò̆ nu.

¹² Zakarĭa tcahtî cè d́ō, cè b́èhjŏb́èma kî thaphuthaganāgè.

¹³ Barasă Mò̄khobwèzo d́ògè cè, “Scisăbò̄ ḿè, Zakarĭa, manè̄, Kib́ĭcè sòkhĕńe htŏ nè dèdahta kî nè hmè̆ Èlĭzabèt nu gō phozelaikò̆ zo phokhŏ dèbwè. Kî na gā htăb́èkò̆ zi mi Zowănnī.

¹⁴ Ni gī nib́èkò̆ dèthalōthala, dèthaganāi kî bija òè̆bwè gō thalōthalaikò̆ d́ŏ Zè dè òla acè̆ nu.

¹⁵ Zî gî̄ ḿîkò̆ Bija Adoamu d́ŏ B́ĭcè ahlò̆mò̄ nu. Cò kò tò ò̆kò̆ thobiscihtĭ ńò kî dèhmupò ńò ńò, kî cò kò òi pĕhtakò̆ Spirito Tcahtĭ b́ĕ cò òwe zo mo aphŭbu lò nu.

¹⁶ Cè kè thè̆geihŭkò̆ Israè̆lpho òè̆bwè d́ŏ Kib́ĭcè Dèado ò nu.

¹⁷ Kî ze gē leŭsukò̆ d́ŏ Dèado ahlò̆mò̄ acab́ô̆ Prò̆fèt Elĭjah atha kî adèkhodèă nu, Ca ka d́ab́akò̆ apa tòcò atha d́ŏ apho ò nu, kî ka d́ab́agekò̆ bija htè atu b́ugè bija adî̄ahma tòcò adèhtî̆nigô̄ni ńò nu. Ze gē le lōwa tòcò ahlò̆mò̄ kî pradòlò Kib́ĭcè anikhĭ bija apĕhtazòhta dikhwĭ.”

¹⁸ Kî Zakarĭa d́ògè Mò̄khobwèzo gōjo, “Jî gî̄ thîhè̆bò̄ dè ajo cadè̄? Manè̄ jî ḿî bija aphŭbwe dèbwè kî jè hmè̆ ḿî athabwegè gè.”

¹⁹ Mò̄khobwèzo d́òscĭ cè kî cò d́ò lōwa, “Ji ḿî Gabriĕlè̄, htè asò̆hto ò d́ŏ Kib́ĭcè ahlò̆mò̄ dèbwè nu, kî jè b́è thodŏlegè agî̄ jî̄b́èhtî nè kî akò d́ò̆htôlani nè Vanzĕlō jo nu.

²⁰ Kî tcabò̄, nî blî gō glo kî ni di jî̄b́è zakò̆ ńò htô̆do muni dini htè dè ajo tòcò gî̄ phî̆hta hwă nu, d́ŏ nu tu b́u jè dèjî̄b́è htè ake pĕhtazòhtab́è d́ŏ akhîagla bu tòcò ńò akhoacè̆ nu.”

²¹ Bija tòcò òsô̆wô̄ Zakarĭa kî htèniwĭniwagè d́ŏ cò ò thôklôthebĕ ma d́ŏ Zarādo dèthèb́è̆kho gōnu nè acè̆ nu.

²² B́ĕ zè hèhta tapla nu, zî dî jî̄b́èhtî zagè lōwa tòcò ńò. Kî cè tòcò thîhè̆gè ca tcahtî htŏ dèd́è̆lî̄ cè d́ŏ Zarādo bu nu. Zô jô̄ cu jô̄ kha hwă lò d́ō cò ògè ablîglo gōnu be lò.

²³ Zakarĭa adèphîdèmè d́ŏ Zarādo bu hwă d́ō, ze gegè d́ŏ zi hi nu.

²⁴ Munimuthè̆ tòcò jo phlòtôlô hwă zè hmè̆ Èlĭzabèt muthèd́ŏ kî òhuzòlògè d́ŏ hibu nu jè̄hlè̆ adābu.

²⁵ Cò d́ò, “Kib́ĭcè thaè phîkè̆ bija adèdòbijīla d́ŏ jo kho nu d́ō, Zè mèni htŏ jè dè ajo d́ŏ munimuthè̆ tòcò abu nu.”

Dèd́ò̆sadòlò Jezŭ Adèòla

²⁶ Ò hwă ahlè̆thăthô d́ō, Mò̄khobwèzo Gabriĕlè̄ nu, Kib́ĭcè thodŏlegè cè d́ŏ Galilĕage, Nazarè̆th U,

²⁷ d́ŏ Aphôthèmo htè ab́èd́è̆nigè agî̄ phîcu amikhŏ ami ḿî Zŏzè dèbwè ò nu. Zî ḿî Dăvid akhwĭathèlè̆ kî aphôthè ami ḿî Marĭa.

²⁸ B́ĕ Mò̄khobwèzo dohtî cè nu, cò d́ò, “B́èmò, aòpĕhta kî dèwîdèmò dèbwè, Kib́ĭcè òkô na kă. Amihmu aklè̆ ab́è dèhôwî ḿî nè.”

²⁹ B́ĕ zi thîhè̆b́è lōwa adèjî̄b́è nu, zè htèniwĭniwagè, kî gomocahlègè dèhnŭsè ajo dèdè̆ ḿîgè danè̄ nu.

³⁰ Kî Mò̄khobwèzo d́ògè cè, “Scisă ḿè, Marĭa. Manè̄ ni nib́ègè Kib́ĭcè adèwîdèmò.

³¹ Tcabò̄, nu gū muthèd́ŏhta ikò̆ d́ŏ nu phŭbu kî phozelaikò̆ no phokhŏ dèbwè kî na gā htăb́èkò̆ Zi mi Jezŭ.

³² Zo gō do gū mukò̆, kî Cè kè b́èjokò̆ Ahtajîgudŭ Aphokhŏ kî Dèado B́ĭcè ki ilakò̆ Cè Ca Pa Dăvid ana,

³³ kî Zi gî̄ ḿîkò̆ Jăkòb akhwĭ Asaphra thèjô̆ lahtŭlablo kî Zi htĭ Ze ge gū du kŭdu zakò̆ ńò.”

³⁴ Kîd́ò̆ Marĭa d́òge Mò̄khobwèzo, “Jî dî thîhè̆gè amikhŏ ńò d́ō, dè ajo gî̄ phî̆hta za cadè̄?”

³⁵ Kî Mò̄khobwèzo d́òscĭ cè kî d́ò, “Spirito Tcahtĭ gē lelakò̆ no kho kî Ahtajîgudŭ acô̆thèlè̆ gā lagāb́ikò̆ nè; kî Atcahtĭ akò òlab́è dèbwè kè b́èjokò̆ Kib́ĭcè Apho.

³⁶ Kî tcabò̄, ni khwĭ ńò khò̆ htè Èlĭzabèt nu, mubwe nòthò̆gè hnò̆nu apho kò̄ òla dèbwè, cè htè bija d́ò ḿî mob́î dèbwè nu muthèd́ŏ b́ahtŏ ahlè̆thăthô htŏ.

³⁷ Manè̄, Kib́ĭcè anikhĭ nu, dè di phî̆hta za ńò tò ògè dimĭ ńò.”

³⁸ Mègōnu, Marĭa d́ò, “Jè ḿî Kib́ĭcè azômo. Dè gî̄ phî̆htani d́ò̆è jè acab́ô̆ ńò d́ògè nu.” Kîd́ò̆ Mò̄khobwèzo hèhtabāḿĭ tèpwègè d́ŏ cò ò nu.

Marĭa Lehtî Èlĭzabèt

³⁹ Anu Hwă d́ō, Marĭa wè̄hto kî le plaplăgè d́ŏ Jŭda u tu u htè aò d́ŏ khò̆mukhòlò̆ lò nu.

⁴⁰ Ze lenīgè Zakarĭa ahibu kî hnŭsègè Èlĭzabèt.

⁴¹ B́ĕ Èlĭzabèt thîhè̆b́è Marĭa adèhnŭsè alē nu, abĭsèpho ò d́ŏ zu phŭbu bè̄htagè akă, kî Èlĭzabèt ò pĕhtakî Spirito Tcahtĭ lò.

⁴² Cò d́òhta sôtèklè ze lē kî d́ògè, “Amihmu aklè̆ nu, ab́è dèhôwî ḿî nè, kîd́ò̆ ab́è dèhôwî ḿî Abĭsèpho htè nu muthèd́ŏhtai dèbwè nu!

⁴³ Ja tanid́ò̆ dè adoamu phî̆htani jè, htè jî B́ĭcè Amo gē lehtî jè cadè̄?

⁴⁴ Manè̄ d́ō, tcabò̄, b́ĕ nè dèhnŭsè alē thènī ji nigubu lò, abĭsèpho ò d́ŏ ju phŭbu bēhta tèpwè akă d́ŏ dèthalōthalai abu nu.

⁴⁵ Kîd́ò̆ ab́èhôwî ḿî cè htè ab́u htŏ dèbwè nu, manè̄ d́ō Kib́ĭcè gè̄ mè pĕhtazòhtakò̆ dè htè Co ŏlăphlala lōwa tòcò nu.”

Marĭa Adèhtăhtai Adèthăbô̄

⁴⁶ Kî Marĭa d́ògè; “Ja tha dèmè̆ bè̄dobè̄mu jî B́ĭcè,

⁴⁷ kî thalōthalaigè amèhlô̆htage jè Kib́ĭcè akhoacè̆;

⁴⁸ manè̄ Ca tcala hmòb́ègè Zô zômo adèphî̆dèjā; manè̄, khŏnujo phlò̆ ahlò̆mò̄, bija dôzô hwă dôzô gō jokò̆ jè ab́èhôwî.

⁴⁹ Manè̄ kò̄ d́òdo dō, Amèzadè lŏcăcè dèbwè mènigè ji nikhĭ dè adoamu, kîd́ò̆ Zi mi ḿî Atcahtĭ.

⁵⁰ Zè dèkhòwèhmòb́è gā lab́èkò̆ bija ascisăni Ze le tòcò akho, dôzô hwă dôzô.

⁵¹ Cè d́è̆lî̄hta htŏ Zè dècô̆dèthèlè̆ d́ŏ Ze wehta Zu cukhò abu nu, Zè mèphrulaphrî̆hta htŏ bija abè̄htahtô̆ ane d́ŏ Zè dèlîḿakakwè̆ abu tòcò nu.

⁵² Zî htîladē htŏ bija akhob́ăădo tòcò d́ŏ za na abu, kî Zè bè̄htajîkò̆ abè̄b́ôla ane tòcò nu.

⁵³ Co b́oakogè athaẃithaò̆ tòcò dèẃidèscĭ, kî hnage hlòthô̆gè aniò̆jòa tòcò nu.

⁵⁴ Ci ila htŏ dèmèzo d́ŏ Israè̆l Zô zôpho nu, Zo gomohtanigè Zè dèkhòwèhmòb́è,

⁵⁵ Zî jî̄b́èhtîgè wa pa tòcò, htè Abraham kî zo pho zi li tòcò thèjô̆ lahtŭlablo.”

⁵⁶ Kî Marĭa òkô hwă ca kă thŏhlè̆ adābu d́ō, ze gegè d́ŏ zi hi za phă nu.

Zowănnī Baptĭsta Adèòla

⁵⁷ Èlĭzabèt anikhĭ akhîb́èglab́ègè d́ō, zo phozelaigè zo phokhŏ dèbwè.

⁵⁸ Bija aòb́ôhtîb́ôwa cè kî zi khwĭ zò khò̆ tòcò thîhè̆b́è Kib́ĭcè adèkhòwèhmòb́è dohta d́ŏ Zò lò nu d́ō, thaganāikôgè ca kă.

⁵⁹ B́ĕ zo pho òla hwă athè̆ lwīthô nu, cè tòcò legè d́ŏ dèhô̆rîkî̆ abĭsèpho apwè̆bu nu, kî cò kòmò̆ htă lōwa ami Zakarĭa acab́ô̆ ca pa ami nu.

⁶⁰ Barasă zo mo d́òscĭge cè tòcò, “Tè b́è gōnu ńò, gā htăb́è zi mi Zowănnī.”

⁶¹ Ḿî cè tòcò d́ò lōwa, “D́ŏ ni khwĭ nè thèlè̆ aklè̆ ami b́èhtă gōnu tò ò mè dèbwè̆ ńò.”

⁶² Cè tòcò d́è̆lî̄ cu d́è̆lî̄ kha hwă d́è̆gè ca pa htè ca thaè htăgè abĭsèpho ami danè̄ nu.

⁶³ Za da hwă bija lob́e d́ō, ze hwegè gōjo, “Zi mi ḿî Zowănnī.” Cè tòcò htèdômô̄dahmă lōgè.

⁶⁴ B́ĕnu lò zò lòmò tab́ă kî zî blî b́ăplè d́ō, zî jî̄b́è zagè, kî htăhtaigè Kib́ĭcè.

⁶⁵ Akhwĭakhò̆ lŏcăcè scisăgè, kî bija hè d́òigè dèwîdèkè̆ ajo d́ŏ Judĕage kî khò̆mukhòlò̆ tòcò akho nu.

⁶⁶ Kî gajă bija athîhè̆b́è dè ajo tòcò òigè d́ŏ atha bu kî cò d́ò, “Abĭsèpho ajo dèbwè gî̄ phî̆htagè bija danè̄?” Manè̄ B́ĭcè acô̆thèlè̆ òkôgè ca kă.

Zakarĭa Adèd́òdòlò

⁶⁷ Ca pa Zakarĭa nu ò pĕhtakî Spirito Tcahtĭ, kî d́òdòlògè dè, cò d́ò;

⁶⁸ “Israè̆l Ab́ĭcè Dèado kè̄ b́è d́ò̆è dèhôwî, manè̄ kòd́òdo dō, Ze lehtîgè Za bija kî mènigè lōwa tòcò dèhlô̆htage.

⁶⁹ Zè mènigè wa dèhlô̆htage akhob́ăădo d́ŏ Zô zôpho Dăvid akhwĭathèlè̆ abu nu.

⁷⁰ Co ŏlăphlala htŏ Prò̆fèt Atcahtĭ hlemo tòcò alòmò bu,

⁷¹ dèhlô̆hta d́ĕd́òròkhè tòcò acukhòbu, kî gajă bija adèwè̄dèsè̆ wa ńò tòcò acô̆thèlè̆ abu nu.

⁷² Cè kè̄ d́è̆lî̄ wi phĭ wu phŭ tòcò Zè dèkhòwèhmòb́è d́ŏ dègomohtani dèŏlăphlala tcahtĭ tòcò nu,

^73-74 Dèhôd́ă htè Zô hôd́ănigè wa pa Abraham htè Zè gè̄ mèhlô̆htagekò̆ wa d́ŏ d́ĕd́òròkhè tòcò acukhòbu nu akhoacè̆, wa gā khazôkò̆ cè d́ŏ dè di scisăthabob́è ńò abu,

⁷⁵ d́ŏ dèwîdètcă kî dèdî̄dèhma abu d́ŏ wu munimuthè̆ ò atherĕ nu.

⁷⁶ Nè, abĭsèpho nu, nè kè b́èjokò̆ Ahtajîgudŭ Aprò̆fèt, manè̄ ne gē lekò̆ d́ŏ Dèado ahlò̆mò̄ cab́ô̆htè na gā pradòlò cè klè nu.

⁷⁷ Ni ki ikò̆ ji bijakhwĭpho tòcò dèhlô̆htage adèthîhè̆ d́ŏ dèb́ahlô̆ dèkhòwè abu nu.

⁷⁸ D́ŏ Kib́ĭcè adèkhòwèhmòb́è adèb́èlò̄ akhoacè̆, aò d́ŏ lumuhta dèbwè lehtîgè wa,

⁷⁹ zî hlî̆lab́ègè bija aò d́ŏ dèkhiklè̆ kî dèthĭ adèolab́è tòcò akho, agē leihŭ cè tòcò d́ŏ dècodèkhli aklèbu nu.”

⁸⁰ Abĭsèpho dohtagè phehî kî thotha, kî cò ògè d́ŏ lothĭḿizekho htô̆ Zè d́è̆lî̄ Ze ne d́ŏ Israè̆lpho tòcò ahlò̆mò̄ nu.

« Vorige

Bible Society of Myanmar

Volg ons:

Geborgde skakels

Advertensies