Aanlyn Bybel

1 Kòrĭn 12 - Geba Roman New Testament

Spirito Tcahtĭ Adèila tòcò

¹ B́èlò̄ thĭ thè̆buthè̆we tòcò, khŏnujo ja thaè d́òhlî̆hta dè ab́èkja Spirito Tcahtĭ adèila tòcò nu.

² Thĭ gomohtani tèpwè htè hlĕ thĭ ḿîwe bwèthŭkupho tòcò akhî nu, thĭ thaè lôkô tèpwè bwèjò adî jî̄b́è za ńò tòcò nu tè b́è ńò ā?

³ Ja thaèni thĭ gî̄ thîhè̆ htè bija anib́è Spirito Tcahtĭ adèthodŏ dèbwè tò d́ò za, “Hôkî̆kkèbò̄ Jezŭ,” ńò, adi nib́è Spirito Tcahtĭ adèikhoiă ńò dèbwè d́òhta, “Jezŭ ḿî B́ĭcè,” ńò nu.

⁴ Dèila ḿî aò amŏamo lò barasă aila ḿî Spirito Tcahtĭ ò dèdè̆ lò.

⁵ Dèmè ḿî aò amŏamo barasă ḿî B́ĭcè anikhĭ dèbwè lò.

⁶ Amèdè d́ŏ klèthòò̆ amŏamo abu, d́ŏ bija akhwĭathèlè̆ amŏamo aklè̆, aḿî Kib́ĭcè dèbwè lò d́ŏ dèmè lŏcăcè aklè̆ nu.

⁷ Dèila Spirito Tcahtĭ bija dèbwè dèbwè ladū anikhĭ ḿî ze dè è dè ò̆ anikhĭ lò.

⁸ Spirito Tcahtĭ ila dèd́ò̆htôd́ò̆dèlè aòpĕhta kî dèthîd́ôthîhè̆, ḿî d́ò̆ alewe dèbwè anikhĭ Spirito Tcahtĭ ḿî zè dèd́ò̆htôd́ò̆dèlè adèzadèbla;

⁹ kî Spirito Tcahtĭ anu lò ilad́ò̆ alewe dèbwè anikhĭ ḿî za dèb́udènè, alewe dèbwè anikhĭ ḿî za dèmèhmage bija,

¹⁰ Spirito Tcahtĭ ila alewe dèbwè anikhĭ ḿî d́ò̆ dèbòdèba; alewe dèbwè anikhĭ gî̄ ḿî za d́ò̆ dèd́òdòlò; alewe dèbwè anikhĭ gî̄ ḿî za d́ò̆ dèbēpha bija adègomo; alewe dèbwè anikhĭ gî̄ ḿî za dèd́ò za dèlēdèhwè amŏamo kî alewe dèbwè kò d́ò̆sa za kòd́ò̆ ahtabohtab́ă nu.

¹¹ Ajo ḿî lŏ Spirito Tcahtĭ dèbwè lò adèmè htè abelani bija dèbwè dèbwè acab́ô̆ Ca tha ò atherĕ nu.

Ge Neb́î̆cè Thèd́è̆bwè

¹² Bija anebî̆cè dèbwè alò nu, phehî ò nòthò̆ domo domo hnò̆nu, zî ḿî neb́î̆cè tôklô̆ lò. Gōnu akhò̆ Krĭstu anebî̆cè ḿî gōnu lò lò.

¹³ Wi nib́è dèŭsab́ăhtĭ d́ŏ neb́î̆cè dèdè̆ lò kî Spirito Tcahtĭ dèdè̆ lò. Jŭdapho ḿîwî, Grĭspho ḿîwî, zôbwè ḿîwî, htĭgepho ḿîwî, wa lŏcăcè iò̆ b́ègè Spirito Tcahtĭ dèdè̆ lò.

¹⁴ Gè dè lè̄ za ge neb́î̆cè dagla dagla kî ge neb́î̆cè thèd́è̆bwè ńò.

¹⁵ Khakhò kò d́ò ma jî dî ḿî cukhò ńò akhoacè̆ jè tè b́èkja kî neb́î̆cè ńò d́ō, zî dî ḿîbe neb́î̆cè thèd́è̆bwè amēaphă ńò ā?

¹⁶ Nigu kò d́ò ma zî d́î ḿî gādŭphlo ńò akhoacè̆, jè tè b́èkja kî neb́î̆cè ńò d́ō, zî dî ḿîbe neb́î̆cè thèd́è̆bwè amēaphă ńò ā?

¹⁷ Thĭ neb́î̆cè thèd́è̆bwè gî̄ ḿî ma gādŭ dophlo lò, thĭ gī thîhè̆ zabò̄ ā? Thĭ ne thèd́è̆bwè gî̄ ḿî ma nigu lò d́ō, thĭ gū hnŭnizabò̄ dè dimimi ā?

¹⁸ Kib́ĭcè b́è̆plo we neb́î̆cè amēaphă ḿî cab́ô̆htè agè̄ mè pĕhtabò̄ Zè dè thaèni nu.

¹⁹ Lŏcăcè gî̄ ḿî ma domo lò d́ō, agî̄ ḿî za neb́î̆cè tôklô̆ cadè̄?

²⁰ Ḿî khŏnujo amēaphă òèòcara nòthò̆ hnò̆nu, aḿî neb́î̆cè tôklô̆ lò.

²¹ Gādŭ tò d́ò za cukhò, “Jo do loba nè ńò,” ńò. Gōnu akhò̆, ko tò d́ò za khakhò, “Jo do loba nè ńò,” ńò.

²² Ahnèhnè ḿî òè̆ tîkî ge neb́î̆cè akhoaă tò ò ńò gudu dokhlo ḿî awanè gudu;

²³ kîd́ò̆ neb́î̆cè alò atè b́è lè̄dolè̄mu gudu ńò dokhlo b́è b́ò̆b́ib́ò̆gā kî b́è tcaikhwèi d́okhlŏ dòkhò̆.

²⁴ Neb́î̆cè awîamò d́olĭ anu tòcò do loba dètcaikhwèi ladŭ tèpwè ńò. Kib́ĭcè mèni we phe wî hî dagla dagla cab́ô̆htè ahĭahtè̆ tò ò ńò dokhlo khlo gī nib́è d́okhlŏbò̄ dèwōikhwèi nu.

²⁵ Gōnu akhoacè̆ d́ŏ we neb́î̆cè alò nu, dèlamulapha tò ò ńò, ḿî lŏcăcè tcaikhwèi hlè lōwa lò.

²⁶ Akè b́èhtîb́èd́ô̆ dokhlo khlo ḿî akhab́è ploplo lŏ, kî agī nib́è dèhĭdèhtè̆ dokhlo khlo ḿî ḿî anib́è lŏ tèpwègè.

²⁷ Khŏnujo ploplo thĭ ḿî Krĭstu anebî̆cè; ḿî aladū dokhlo dokhlo lò.

²⁸ D́ŏ Dèòplo abu nu, Kib́ĭcè b́è̆lă lŏ alleaklè d́è̆ aè̆ lò. Bōhmubicè d́ŏ ale aŭsu nu kî Prò̆fèt tòcò d́ŏ gīgla dagla; athôithò̆idè tòcò d́ŏ thŏgla dagla nu; cè tòcò hwă amè dèbòdèba tòcò, mèhwă amèhmage bwèsè̆ tòcò, hwă amèzo cè tòcò nu, mèhwă akhoane tòcò kî aza dèlēdèhwè amŏamo tòcò nu.

²⁹ Cè tòcò ḿî lŏ bōhmubicè ā? Prò̆fèt tòcò ā? Ḿî̆dîḿî ńò athôithò̆i dè tòcò nu ā? Cè tòcò ḿî lŏ amè dèbòdèba tòcò nu ā?

³⁰ Ḿî̆dîḿî ńò amèhmage bwèsè̆ tòcò nu ā? Cè ḿî lŏ ajî̄b́è za dèlēdèhwè amŏamo lò ā? Ḿî̆dîḿî ńò ab́ahtèkhlège za dèjî̄b́è tòcò nu ā?

³¹ Mègōnu d́ō, bè̄thobè̄thabò̄ dèthaèni ajwīamo d́okhlŏ tòcò nu. Barasă d́ō, Jè kè̄ d́è̆lî̄kò̆ thĭ klèthòò̆ aègudŭ tòb́ò̆.

« Vorige

Bible Society of Myanmar

Volg ons:

Geborgde skakels

Advertensies