2 Minwiinmunu lé Wezuofe Sɛbɛ 1 - Kazambale lé Sebe Sauunu 1979

Bale wedɔɔle valé fua nɔ Salomɔn lɛ

¹ David be Salomɔn pla munu nwiin gligli; Gakelebale, alé Bale a a va, yé é Salomɔn lé plɛplɛ gi gyɛ é baba.

² Salomɔn we fe Izraɛl munu faa lɛ; mi wuru soru soru nwiinzannu valé mi yɔ soru soru nwiinzannu koo, weblezannu koo, Izraɛl mi blɛnnu faa koo, guniwuonu faa koo, Salomɔn we fe wo lɛ.

³ Yé Salomɔn valé munu faa lé wo zén ékeva bɛ, wo go gɔ lé é ke Gabaɔn, a nwiin. Bale lé zén‐ékevasɔkɔn lé Gakelebale wuozan Moizi a kɛlɛ bwi gi, ’bɛna lé ’bɛ ke.

⁴ É kyɛn David sɔkɔn do dɔ Bale lé kɛsu zé nya Jérusalɛm yé é yee kɛsu si Kiijat‐Jéarim yé é go a nya fɛ lé é ana ma’lɛrɛ bɛ, ana.

⁵ Balebanna lé Uru be Uri be Bɛsaléɛl a kɛlɛ zéné nya, ’bɛ a é ziin Gakelebale lé sɔkɔn ’lɛ. Yé Salomɔn valé zén‐ékevamunu Gakelebale nagini ’bɛna.

⁶ Yé Salomɔn trubɛ wuru soru nɔ Gakelebale lɛ ’bɛna, balebanwi lé wa kyɛ blé, a nya; é a nɔ balebanna lé wa kɛlɛ zéné nya, Bale lé sɔkɔn ’lɛ, a ta.

⁷ É béli Kazambale bɔra Salomɔn va, yé é lé a lɛ léé: Wean sɔ i lɛ, bé laa an lee.

⁸ Salomɔn a zi pa Kazambale lɛ léé: I wezin kɛlɛ an ti David lɛ é baba, yé i an dɔ minwiinzan blɛn nya a pa gi.

⁹ Migɔnɔ do lé wo ’léé ke kiɛre bélé vun zo, i an dɔ wo nwiinzan nya. Amalé, sin, Gakelebale, blivolɛdére lé bé fe an ti David lɛ, bé lɛ sɔɔ ma.

¹⁰ Amalé, ’i wedɔɔle valé gikinile nɔ an lɛ, fɛan zo lé é a lé an tawo munu ’ko nwiinzan nya yé maa a dɔɔ. Naa, ilé munu kiɛre ’ko, de ɛ bɔa wolé weblele lɛɛ?

¹¹ Kazambale lé Salomɔn lɛ léé: I ’ka fua valé tɛrɛlafɛnu ma laa lɛ an lee lo; i ’ka a laa lɛ an lee léé, i tɔ ’é kɛlɛ blɛn lo, i ’ka a laa lɛ an lee léé, i nyanézannu ’é ga lo; é ziin, i ’ka a laa lɛ an lee léé, i mɔn tɛrɛ la lo, naa, i wedɔɔle valé gikinile ma laa an lee, léé, anlé munu lé maa i dɔ wo nwiinzan nya bɛ, i wolé we ble.

¹² Wean é ke i bli gi, yee lé ke bɛ; amalé maa wedɔɔle valé gikinile nɔ i lɛ. Yé ’bɛ ta loru, fua koo, tɛrɛlafɛnu koo, tɔbɔle koo, maa dan a nɔ lɛ i lɛ, yé wo dan mini lɛ minwiinzannu lé wo ke i ’lɛ, wo faa zé ta. Yé minwiinzannu lé wo dan kɛlɛ lɛ i zuo, wo va mi do kpen zé ’ka dan kɛlɛ lɛ blɛn bélé izé zo lo.

¹³ ’Bɛ zuo Salomɔn si zén‐ékevasɔkɔn gi, yé é si gɔ lé é ke Gabaɔn, a nwiin, yé é go Jérusalɛm. Yé é pla Izraɛlnu nwiin ’bɛna.

¹⁴ Salomɔn gulidangoronu valé wisoota sunyanu zén ékeva. Alé gulidangoronu a wuru sɔrafié yé alé wisoota sunyanu a baa suiɛdo. É wo nyana flanu lé gulidangoronu ke ana, wona, ’é valé Jérusalɛm, minwiinzan blɛn sɔnɔ.

¹⁵ Minwiinzan lé gɔɔlifu valé kyan kɛlɛ kiɛre Jérusalɛm bélé gɔlɛnu zo. Sɛdrɛyilinu é ziin, wo kɛlɛ kiɛre bélé sikomɔyilinu lé woo tin‐é fɛna pɛblɛɛna, a zo.

¹⁶ Woo Salomɔn lé wisoonu lɔa Éjipiti tɛrɛ la. Minwiinzan lé yaawozannu palu do éé goo yé woo a lɔa é palu ma palu ma, a vlɛ lé wa nyi si, a nya.

¹⁷ Woo gulidangoro do lɔa Éjipiti tɛrɛ la yé woo goo a nya Jérusalɛm gɔɔlifu sikla wuru yaa nya. Yé wisoo do vlɛ kɛlɛ sikla yɔ sɔrafié wɔlɛ vu. Yé woo dan Étinu valé Sirinu nwiinzannu zé nya é ziin.