Aanlyn Bybel

Wlɔmʋ‑dunyʋä 1 - GOD - u2

Bhäälɩ

¹ ‑Amʋ Pɔlʋ, ‑amʋ Zozi Klisöö' ‑gänʋnyɔɔ, kä Laagɔ ‑sä'ä lä nynä ‑mä n 'plö ʋʋ' lobho lobhonyɔ. Kä ʋ ŋʋʋ'ʋ 'naa dä nynä n 'kä ʋʋ' 'Nägädöö bie.

² Laagɔ cii‑ bhä nynä ‑mä ʋʋ' 'Nägädöö' 'tänyɩ yi bhä ŋëë. 'Nägädönöö' wälɩɩ nä, Laagɔ ŋʋʋ‑ wɛzä ɩɩ' wälɩɩ ‑gɔgɔbhlää' 'plɔfɛtɩnyʋa nëë' 'nɩ wa ‑jɩjlɩ Kplɔɔkplɔɔ‑bɔɔgwɩɩ 'mnö.

³ Laagɔ ‑Yowlii' yëkuu' wälɩ wa ci bhlä. Wlä Laagɔ yio bhä ɔ tötɔ Davidöö' 'lɔlʋʋ 'mnö ghlää 'nɩ ɔ yi bhä gänöɔ nyɩkpɔ 'bhisäkʋ.

⁴ ‑Mä Laagɔɔ' Kplɔɔkplɔɔ‑wugɔɔ' 'päwaa gbä 'nɩ ɔɔ' 'kuëë glɔɔlɩɩ 'mnö, ʋ pana nynä ‑mä ɔmɔɔ‑ plöö‑ Laagɔ ‑Yowli.

⁵ Ɔmɔɔ‑ plöö‑ lä ‑anyɩa Kwlienyɔɔ Zozi Klisö. Ɔɔ' ‑bɔɔ 'nɩ n plöö‑ lä ɔɔ' lobho lobhonyɔ ‑yä n 'kä gbä 'ylʋzɔkʋnyʋa 'fɩɩn 'kä ɔɔ' pɔlötɛtɛ kään ɩyä wa 'kɔ 'klʋkpää 'ŋʋ.

⁶ Nyɩkpaa ‑wanö ‑zä Laagɔ ‑lobho'o lä nä, anyɩmɔ Klisö yä lä laa nä, anyɩmä 'sɩɩ, a 'plömʋwa.

⁷ Anyɩmɔ 'fɩɩn‑ ‑kʋ lä Wlɔmʋduu' nä, kä Laagɔ ‑waa'anyɩ kpänyɩ ɩɩ' ‑zä ʋ laa'anyɩ lä ‑yä a 'käyɩ ʋʋ' ‑za kplɔɔ. Nä ‑a 'Bä Laagɔ, ʋ ‑yä Kwlienyɔɔ Zozi Klisö, wa 'panyɩ 'nyu ‑yä wa 'nyɩanyɩ 'kʋ wɔtɔlɩ.

Pɔlʋ ylä nynä ɔ 'kä Wlɔmʋduu' 'cɔcɩnyʋa 'yi 'ni kää mʋ
( Wlɔmʋ 15.23‑32 )

⁸ N bhään 'fɩa 'naa Laagɔ anyɩa' ‑za, Zozi Klisöö' 'ŋnöö 'mnö. ‑Ɔnöza bhää? 'Ylʋzɔɔ' dää 'fɩɩn kä nyɩkpa lü ‑mɔɔ anyɩa' pɔlötɛtɛɛ' ‑dläfʋɛ.

⁹ Laagɔ 'titi yi 'naa ‑dläfʋɛ lü nynä ‑mä n kä ʋ ‑Yowlii' 'Nägädöö bie nä, 'naa 'wugɔɔ 'mnö n nʋnʋ ‑gä. 'Nɩ n bhibhie 'kɔɔkɔ anyɩa' ‑za.

¹⁰ 'Nɩ n ylä 'kɔɔkɔ 'naa bhibhie 'mnö nynä ‑mä Laagɔ gbä ‑yä n 'ni 'tänyɩ ‑yä n 'kanyɩ 'yi 'ni kää yi.

¹¹ ‑Ɛɛɛ, 'zaazɩ nä, n ‑waa 'sää 'titi nynä ‑mä n 'kanyɩ 'yi ni kää yi. Ɩyä sä Kplɔɔkplɔɔ‑wugɔɔ nyɛɛ'ɛ lä nä, n 'kanyɩ sɔɔ 'nyɛmʋ. Ɩ yi gbä 'nɩ a yi kpänyɩ 'tɛtɩ kään.

¹² Kɩ ‑kʋ lä 'sɩɩ nynä ‑mä n kä ‑yi nä, anyɩa' pɔlötɛtɛɛ ‑yä 'naa ‑lɛɛ 'sɔ yi 'jɛnyɩ 'nɩ ‑a yi däbhloo' 'tɛtɩ 'nii. Nyɩkpɔ nyɩkpɔɔ' pɔlötɛtɛ yi ɔ ‑lie 'tɛtɩɩ 'ŋʋ.

¹³ Bhelie ‑yä bhɛŋwnɩänyɩ‑, n ‑waa nynä ‑mä a yibhë sɔɔ nynä n tään 'kɔɔkɔ n 'kanyɩ 'yi 'ni kää yi, ɩyä sä 'naa lebhee ‑tlʋ lä 'bhü ‑mɔɔ 'yigäda‑bhlɩɩ 'mnö nä, ɛ kä 'sɩɩ sɔɔ anyɩ nëëdë 'bhü tlʋ nä, n 'kä 'sɔɔ 'yi 'ni. ‑Maa, nn' ‑lätee 'casɩ nii‑.

¹⁴ ‑N plöö‑ 'Glɛköyu ‑o, ‑nn ‑wʋ 'Glɛköyu plöö‑ ‑o, ‑n ‑yi 'bɔɔgʋ ‑o, ‑nn ‑wʋ 'bɔɔgʋ ‑yi ‑o, ‑amʋ nä, n ‑kä 'nɩ n 'kä nyɩkpaa 'fɩɩn 'kʋ wloo.

¹⁵ Nä, anyɩmɔɔ‑ ‑kʋ lä Wlɔmʋduu' nä, anyɩ ‑mä 'sɩɩ, n ‑waa 'sää 'titi nynä ‑mä n 'kä yi n 'kanyɩ 'Nägädöö ‑sää.

¹⁶ ‑Amʋ nä, 'Nägädöö' bielɩɩ nö'ö ‑wʋ zoo 'kʋ ‑kä. Ɩ ‑glö Laagɔɔ' 'päwä. Nyɩkpaa' ‑lefɩɩn ‑kä lä ɩɩ' pɔlötɛtɛ nä, ɩ ‑glö waa' ‑za 'päwaa laa‑ sʋwa lä ‑lɔɔ nëë nä. Ɩ plöö‑ 'pawä 'Zufʋnyʋää' ‑za 'fɩa, 'nɩ ɩ ‑yi 'nɩ ɩ plöö‑ 'sɩɩ 'päwä 'Glɛkönyʋää' ‑za.

¹⁷ Kä 'Nägädöö panö‑anyɩ lä nynä ‑mä, nyɩkpaa 'fɩɩn‑ ‑kä lä Laagɔɔ' pɔlötɛtɛ nä, waa' pɔlötɛtɛɛ ‑bhlo 'coo 'mnö wa ghlä 'nɩ wa plöö‑ ylä 'yigënyʋä. Ɩ ‑jɩjlɔ Laagɔ‑bɔɔgʋʋ 'mnö nynä ‑mä, nyɩkpɔɔ' lɔɔ‑ ‑kä ylä pɔlötɛtɛ nä, ɔ ‑glö yɩ 'yigëënyɔ. 'Nɩ ɔɔ' pɔlötɛtɛɛ yio 'pʋpʋɛ 'nyɛ.

Nyenyii yä dää 'fɩɩn 'kʋ 'bhlü

¹⁸ Laagɔ ‑kʋ ‑mɔɔ Laagɔduu' 'nɩ ʋ pä gbʋgblɛ. Ʋ pä gbʋgblɛ 'ylʋzɔkʋnyʋää' nyenyii ‑yä waa' gbenyenyii' ‑za. Waa' gbenyenyii yä ‑nʋawlɛɛ 'kpɔɔ 'ŋʋ.

¹⁹ 'Nɩ Laagɔ yëkuu' wälɩɩ 'fɩɩn nyɩkpɔ yi bhlä tään nynä ‑mä ɔ 'kä yibhë nä, wa ‑yii wɛzä. Laagɔ yʋwanyɩ pana wɩa.

²⁰ Laagɔɔ' 'päwaa ɩyä sä ʋmʋ Laagɔ ‑kʋ lä nä, sɔɔ nio ‑wʋ 'yi. ‑Mä 'bhää yɩ 'kɔɔn cieda nä, Laagɔɔ' nʋnʋlɩɩ 'fɩɩn sä ‑a nii lä 'gää 'yi nä ka ‑a yibhënɩ wɩa. Nä 'ylʋzɔkʋnyʋää' ‑wʋ ciesä ‑kä.

²¹ Wa ‑yi Laagɔ ‑mä waa' fänʋ ‑wʋ 'ŋnu nynä Laagɔ. 'Nɩ waa' bhänʋ ‑wʋ ʋʋ' 'nää ‑za ‑bhlɛ sɔɔ wa 'kä bhlä nʋ. Waa ciciwälɩɩ ‑wʋ gba ‑kä 'nɩ wa toonɩ 'mnö. 'Fike 'nʋwa yɩɔ 'wluu 'kʋ. 'Nɩ waa' pɔlöö ‑kʋ yɩ 'cucuu 'mnö.

²² Wa bhobho nynä dɩgälɩ‑ wa ‑yi ‑mä pɔlö bhlʋwa lä.

²³ Laagɔɔ ‑ʋ ‑kä lä 'klʋagbaa 'nɩ ‑ʋʋ ‑wʋ lä 'kɔɔkɔ 'kʋ bhɩäsä ‑kä nä, wa 'kʋ lä bʋbɔ nä, suyuë‑ wa ‑dögbänʋ 'mʋ 'nɩ wa bʋbɔ. Nyɩkpɔɔ' ‑lɔɔ ‑ɔ yi lä zëkü 'ku nä, ɔmɔ wa tɛɛ suyu 'kʋ. Wa tɛɛ nümnü, 'nɩ wa tɛɛ ‑gbɔmna ‑yä kotü ‑kään mnaa ‑yä gbisio gbisio‑mna.

²⁴ ‑Nɩnɩ 'mɩɩ‑ ‑kä lä 'ŋnö 'nɩ Laagɔ ‑tanʋwa ‑lä 'yi 'nɩ wa nää lä plʋplälɩɩ 'mnö. 'Nɩ gbenyenyii ‑ɩ ‑kʋwa lä pleyii nä, wa nämnönɩ lä 'mnö ‑yä wa 'kä wa yëkuu' 'yɛkɛɛ ‑didi plaa.

²⁵ Wa yi 'nɩ Laagɔɔ' ‑nʋawlɛɛ wa ‑dögbänɩɛ ‑kpläkplaa 'mʋ. 'Nɩ ‑lɩɩ Laagɔ wlʋa‑ lä nä, ɩmɩ wa nʋ ‑gä 'nɩ wa bʋbɔ, 'nɩ Laagɔɔ‑ wlʋa‑ lä ‑lɔɔ' ‑lɩɩ 'fɩɩn nä, waa' nʋʋ ‑wʋ ‑gä 'nɩ waa' bʋbɔnʋ ‑wʋ. Nä 'klʋagba ŋëë Laagɔ 'kɔɔkɔ ‑za! Ɩ kʋ sɔɔ!

²⁶ ‑Nɩnɩ 'mɩɩ‑ ‑kä 'ŋnö 'nɩ Laagɔ ‑tanʋwa lä 'yi 'nɩ wa ‑kʋ lä ‑lɔɔ' zoogbɩɩ 'mnö. Wa 'ŋwnɩä yä ‑bɔwlägä 'cɩcɩ 'nɩ wa ‑yä wa lüŋwnɩä 'sɔɔ mʋʋ yɩ yëkuu'. 'Nɩ ‑lää' 'klünö nä, ɩɩ' yɩɔ zëkpë 'kʋ nʋnʋgbɩ 'wlʋʋ.

²⁷ 'Nɩ ŋwadia ‑mä wa nää 'sɩɩ saa ‑bhlo. Wa ‑yä 'ŋwnɩä 'sɔɔ mʋʋ yɩɔ yëkuu ‑mä, wa ‑yä wa lü‑ŋwadie 'sɔɔ yëkuu' mʋʋlɩɩ 'kpäkpää‑ sinʋwa yëku. Kä ŋwadie ‑yä ŋwadie 'sɔ mʋʋ yɩ yëkuu'. Zoogbɩ 'kädɩ lä. ‑Mä ‑lɔɔ' gbenyenyi wa nʋ lä nä, wa yi ɩɩ' dluu' plʋʋlɩɩ 'ni.

²⁸ Sä waa' ‑wʋ lä ‑waa nynä wa 'kä Laagɔ 'kʋ 'bhlü nynä Laagɔ nä, kʋ ‑tanʋwa 'yi 'nɩ wa gëë‑ yɩ waa' bhobhowlu ‑nyënyuu 'kʋ, 'nɩ wa nʋ ylä sä waa' lä bhɛ lä nʋ nä.

²⁹ Gbenyenyii' nü nü nü 'mnö wa nämnö ylä. Wa ‑nyu, 'nɩ wa liesɩɩ' kääkäälɩɩ zɛlɩänʋwa 'yii, wa ‑nyu 'mnö, 'nɩ wa ‑kä 'sää kpänyɩ luëzü. Wa plöö‑ nyɩkpa‑bhlänyʋä. Wa ‑yä wa ‑liesɩ 'sɔ yɔɔ. Wa 'nyigë wa ‑liesɩ, 'nɩ wa nää 'sɩɩ ‑käpä ‑käpäsä. Wa nyima wa ‑liesɩ yëku,

³⁰ wa ‑kä ‑nümnünënüë, 'nɩ wa plöö‑ 'sɩɩ Laagɔɔ' ‑zɔbhlɛgbänyʋä. Wa 'luglu wa ‑liesɩ, wa täkpɔ 'nɩ wa pä ‑bli. 'Nɩ wa nʋ saa 'fɩɩn ‑yä wa 'kä 'kɔɔkɔ gbenyenyii 'mnö kʋ. Wa cɩcɩɔ wa 'bäsɩ ‑yä wa 'nɔsɩ 'yii.

³¹ Waa ‑wʋ dɩgälɩ 'wluu ‑kä, sä wa ci lä nä, waa' 'ŋʋ ‑wʋ sɔɔ 'klʋkpää, 'nɩ waa' 'mänyɩ ‑wʋ. 'Nɩ waa' ‑wʋ 'sɩɩ nyɩkpɔɔ' ŋäzö ‑yi.

³² ‑Bhlɛ wa ‑yi sɔɔ nynä ‑mä nyɩkpaa' ‑lʋa ‑wa nʋ lä ‑lɔɔ' gbenyenyii nä, kä Laagɔ ŋʋʋ‑ nynä ‑mä 'kwie nëë' wa 'kä 'kʋ bhɩä. ‑Mä sɔɔ ɩ ‑kʋ 'nɩ wa nämnö 'kɔɔkɔ ‑lɔɔ' gbenyenyii 'mnö. 'Nɩ nyɩkpaa' ‑lʋa ‑wa nʋ lä 'sɔɔ gbenyenyii nä, wa klʋwa 'sɩɩ ‑kpacɛ.

« Vorige

Wycliffe Bible Translators, Inc.

Volg ons:

Geborgde skakels

Advertensies