Yuda 1 - Chinsenga New Testament

¹ Ni newo Yuda, muzya wa Yesu Kristu, mkwawo wa Yakobe. Nulembela kwa mwewo woyitiwa, wotemweka na Mulungu Atata nipo osungiwa na Yesu Kristu.

² Lusungu, mtendele na cinthemwa viŵe vanu vukuya vupakilako.

Asambizyi ŵa wenye

³ Mwewo otemweka, nenzopangwishisha kukulembelani kalata, yokukonkhololelani va cipulumusho cokumya tonse, koma mtima wangu wanikakamizya kuti nikulembeleni lomba nokukoseshani motangʼa, kuti mulwe nkhondo yocingilizya cicetekelo, Mulungu cecipa atuŵa mtima limo tyala.

⁴ Pakuti ŵanthu ayakine asasamala va Mulungu eloŵa mofisika pakati panu, oyaluzya cisomo ca Mulungu wasu kutwala kuvonyansa nokana mwine yeka na Asikulu ŵasu Yesu Kristu. Va cipingulo ca ŵanthu aŵa velaŵiliwa kale.

⁵ Lomba nupangwa kukukumbushani, cukanga kuti mwenzoziziŵa kale, kuti Yesu epulumusha ŵanthu ŵake ku calo ca Ejipito, koma pa vuli pake eceneka ŵala aliyocetekele.

⁶ Mukumbuke soti va angelo, enzotemwalini nawo ulamulilo, koma esiya ngʼanda yawo. Mulungu eŵamanga na unyolo wosasila mu mfinzi pa nyansi, pakuŵasungila mpaka nsiku ikulu yala patiakaŵapingule.

⁷ Mukumbuke soti mizinda ya Sodoma, Gomola na mizinda iyakine yozungulukana nayo. Ŵanthu ŵamene soti enzoyingocita tucenche, nocita ucende wa anakazi ŵeka–ŵeka na analume ŵeka–ŵeka. Mulungu eŵayika ngani cisanzo poŵalanga na mulilo wosasila.

⁸ Koma mu njila imo na imo ŵanthu aŵa asasamala va Mulungu, oyika nzelu zawo pa maloto ŵawo, woyifya miŵili yawo, okana ulamulilo, nipo ocita msikila ŵa Maulemelelo ŵa Kululu.

⁹ Koma cukanga Mikayele, mngelo mkulu, penzokangana na Satana va citanda ca Mose, aliyoyezye kumupingula momutafulila, koma elaŵila kuti, “Asikulu akucimule!”

¹⁰ Koma ŵanthu aŵa otafulila vinthu vasaziŵa. Ngani nyama zosalingilila, oyingocita vazuŵawuzya nzelu zawo, nipo oliletela ŵeka kucenekeka.

¹¹ Shamu kwa ŵeve! Pakuti eyenda mu njila ya Kaini. Ngani mwecicitila Balamu, nawo epona mu coyifya cikomo cokonkha phindu ya ndalama. Ecenekeka cikomo coukila Mulungu, mwecicitila Kola.

¹² Aŵa niye woyifya malyelelo ŵanu ŵa cinthemwa. Akulya namwe mosacita wowa, oyingolilyesha ŵeka. Ali ngani mikumbi yufuzililiwa na mphepo, koma osaleta mvula. Ali ngani vimiti vosatwala vitwalo cukanga pa nsita yake, vefwilatu nipo ŵanthu evinyula.

¹³ Ali ngani matambazi ŵa ukali ŵa pa cimmana, ofumya povu ya vonyansa vawo. Ali ngani nyenyezi zosoŵa, nipo Mulungu oŵasungila mfinzi yosasila.

¹⁴ Enoki enze wa luko ya cisanu na ciŵili kufuma pali Adamu, enenela va aŵa ŵanthu kuti, “Onani, Asikulu akawele na angelo ŵake wosaŵelengeka,

¹⁵ kuti azepingule ŵanthu wonse. Azepingule kuti ni woyifya wonse asasamala va Mulungu, cikomo ca nchito zawo zonse zosalungama, zecicita mosayopa Mulungu. Akaŵasushe cikomo ca malizu wonse ŵa msikila ŵecitafulila nawo Asikulu, ŵanthu wocimwa na wotafulila va Mulungu.”

¹⁶ Ŵanthu ŵake ni aŵa: Ongʼungʼunzila, odandaula, na ŵala akungokonkha vilako–lako vawo viyipa. Olaŵila momeka, nipo oyingotama ŵanthu mwa wenye kuti afwanemo phindu.

Macenjezyo na malango

¹⁷ Koma mwewo wotemweka, mukokumbuka malizu wezilaŵililatu nthumi ŵa Asikulu ŵasu Yesu Kristu.

¹⁸ Elaŵila kuti, “Mu masiku osilizya, kukawele ŵanthu otafulila, okonkha vilako–lako vawo vosasamala va Mulungu.”

¹⁹ Aŵa niye ŵanthu oleta kupatukana pakati pa Akristu, ŵanthu ŵa va mu calo, nipo aliye Mzimu wa Mulungu.

²⁰ Koma mwewo wotemweka, muliwamye mweka mu cicetekelo cituŵa ngako; lombani mu Mzimu Mtuŵa.

²¹ Mulisunge mu cinthemwa ca Mulungu, polindila lusungu ya Asikulu ŵasu Yesu Kristu, yamene yutangulila ku moyo wosasila.

²² Mukoŵacitila lusungu ŵala okayika,

²³ pulumushani ayanu powalondesha ku mulilo, kwa ayakine woneshani lusungu na wowa, kutinkha cukanga covwala cawo coyifyiwa na macimo.

Malizu ocinzika Mulungu

²⁴ Lomba kwa wala otwesha kukusungani kuti musakumbulwe, nokutwalani muliye coyifya pa menso pa ulemelelo wake na cimwemwe cikulu,

²⁵ kwa Mulungu yeka, Mpulumushi wasu, kupitila mwa Yesu Kristu Asikulu ŵasu, kuŵe ulemelelo, ukulu, mphamvu na ulamulilo, ikaliyotatika nsita ya lomba na nsita yosasila. Amen.