Tito 1 - Chinsenga New Testament

¹ Ni newo Paulo muzya wa Mulungu, na nthumi ya Yesu Kristu. Enituma kwa ŵala ŵecisalula Mulungu, kuti acetekele mwa Yesu, na kuti aziŵe vyendi, vuŵalengesha kusamala va Mulungu,

² noŵapa cilolelo ca moyo wosasila. Mulungu wocetekeleka, elayizya moyo wosasila uyu nsita ikaliyotatika.

³ Pa nsita yake Mulungu, Mpulumushi wasu, ewulula cendi malizu ŵake poŵilizya na kuti nipiwe mphamvu nga nine nthumi.

⁴ Nikulembela wewo Tito, mwana wangu ngaye–ngaye cikomo cakuti newo na wewo tili na cicetekelo cimo. Mulungu Atata na Kristu Yesu, Mpulumushi wasu, akucitileni cisomo nokupani mtendele.

Nchito ya Tito

⁵ Nikusiya ku Klete kuti ukonkholole vonse venzevikaliyokonkhololewa, na kuti uyike akulu ŵa mpingo mu mzinda uliwonse, ngani mwenikulamulila.

⁶ Mkulu wa mpingo aŵe munthu wa ngwilyo, nipo aŵe wa mwanakazi yumo yeka. Ŵana ŵake aŵe soti wocetekela Kristu, aliye mbili yoceneka keno yosapingulika.

⁷ Wolindilila mpingo awokuŵa wa ngwilyo, cikomo ali ngani kapitawo mu banja ya Mulungu. Osati awokumvwa va yeka, keno wakupya mtima mmangu, keno cakolwa, keno wa ndewo, keno soti na mtima wopangwishisha ndalama.

⁸ Koma aŵe wopokela luweme alwendo, wotemwa viweme, woziŵa kulilamulila, wolungama, mtuŵa mtima, nipo soti wozilesha.

⁹ Asunge mokatisha malizu wocetekeleka ali wokatizyana na vetisambilizyiwa. Potetyo azeatweshe kukosesha ayakine posambizya vyendi, nipo soti nocimfya osushana navo.

¹⁰ Pala pali ŵanthu anyinji, ngako–ngako ŵala Akristu ofumila kwa Ayuda, otalizya wenye nopumvya ayawo polaŵila vopusa.

¹¹ Ni cowamila kuŵankhalisha celele, cikomo opumvya mabanja ayakine wonse poŵasambizya vasawamila kuŵasambizya. Oyingocita ivi na volinga viyipa, popangwa kupokela ndalama mwa wenye.

¹² Munthu muyakine wenzotola kuti ni mneneli ku Klete, yumo mwa ŵeve awo, elaŵila kuti, “Akilete nsita zonse ni ŵa wenye, vinyama viyipa, awulesi akulya ngako.”

¹³ Malizu aŵa ni wosimikizyika. Ni cikomo cake uŵalaŵile ngako mwa mphamvu ŵanthu ŵamene awo, kuti aŵe na cicetekelo cotangʼa,

¹⁴ mu malo mosamala visali vyendi va Ciyuda, na myambo ya ŵanthu okana vyendi.

¹⁵ Ku ŵanthu atuŵa mtima, vinthu vonse ni vowamila. Koma kwa wofipishiwa na wosacetekela, paliye kanthu kaweme; mitima yawo na nzelu zawo kumo, vonse ni vofipishiwa.

¹⁶ Olaŵila kuti omuziŵa Mulungu, koma na vocita vawo omukana, pakuti ni ŵanthu wonyansa, wosamvwila, wowamilalini kucita kanthu kalikonse kaweme.