Macitilo 20 - Chinsenga New Testament

Paulo akuya ku Masedoniya na ku Gilisi

¹ Vyongo vala pevesila, Paulo eyita asambili ŵala, noŵakosesha mtima. Nipo pecisilizyana nawo, efumako nakuya ku Masedoniya.

² Eyendela minzi ya kwamene uko noŵakosesha mtima ŵanthu na malizu anyinji. Pa vuli pake eluta ku Gilisi,

³ nonkhalako myezi itatu. Peenze pafupi kuya ku Siliya mu wato, Ayuda emucitila msikila. Tetyo, yeve esimikizya zopitila ku Masedoniya.

⁴ Emupelekezya na Sopatele, mwana wa Pilo, wa ku Beleya; Alistaliko na Sekundo wa ku Tesalonika; Gayo wa ku Delibe; na Timoteyo; na Tikiko na Tlofimo wa ku Asiya.

⁵ Ŵeve etangula na kuyolindilila ku Tloasi.

⁶ Koma sewo tiyenda pa wato kufumila ku Filipi, peyisila Pasaka, Cisangalalo ca mikate iliye cofufumishila. Nipo pepepita masiku asanu, tikumana nawo ku Tloasi. Kwamene uko, tinkhalako masiku asanu na aŵili.

Paulo owukisha Yutiko ku Tloasi

⁷ Pa nsiku yotatika ya Sabata, tiwungana kuti tilye cakulya ca mcingulo, nipo Paulo enzolaŵila na ŵanthu. Pakuti enzolindila kuya mmawa mwake, epitilizya kulaŵila mpaka pakati pa usiku.

⁸ Mu cipinda ca palulu cetiwunganamo mwenze nyale zinyinji.

⁹ Mulumbwana, zina yake Yutiko, enkhala pa windo. Lomba Paulo penzeakalulaŵila na ŵanthu ŵala, Yutiko wala enzokusila, mpaka elala tulo, nopona pansi kufuma pa windo. Ŵanthu emutola, nipo enze wakufwa.

¹⁰ Pamene apo Paulo eseluka, nozipoza pa mulumbwana wala nomufungatila nolaŵila kuti, “Osavutika, ali moyo.”

¹¹ Nipo Paulo ekwela soti, nakuyosuna nawo mkate, nakulya nawo. Pa vuli pake epitilizya soti kulaŵila nawo nsita itali, efumako kwaca kale.

¹² Ŵanthu ŵala etola mulumbwana wala ali moyo, nipo wonse etemwa ngako.

Ulwendo ofumila ku Tloasi kuya ku Mileto

¹³ Sewo titangula nokwela wato kuya ku Asosi, kwetenzokuyotola Paulo. Yeve ewamya motetyo, cikomo enzopangwa kupitila ku silya.

¹⁴ Yeve pecikumana nase ku Asosi, ekwela nase mu wato mwala, nipo tifwika ku Mitilene.

¹⁵ Tifumako soti kwamene uko, nipo mmawa mwake ticiyofwika kufupi na Kiyo. Mmawa mwake soti titawukila ku Samo, nipo mmawa mwake tifwika ku Mileto.

¹⁶ Paulo enzeesimikizya volambalala Aifeso, kuyopa kutaya nsita ku calo ca Asiya. Enzofulumila kuti keno ni cokwanilishiwa akaŵe ku Yelusalemu pa nsiku ya Pentekosti.

Paulo olayilana na akulu ŵa mpingo ŵa ku Aifeso

¹⁷ Paulo peenze ku Mileto, etumizya malizu ku Aifeso kuyita akulu ŵa mpingo.

¹⁸ Ŵeve pecifwika ku mbali kwa cimmana, eŵawuzya kuti, “Mwewo muziŵa mwenenzonkhalila namwe masiku wonse, kutatikila nsiku yotatika yala penefwika ku Asiya.

¹⁹ Nenzotumikila Asikulu molicefya ngako, pakati pa cisoni na matamano eniponela cikomo ca msikila wa Ayuda.

²⁰ Muziŵa kuti niliyomfisileni kanthu kakuti kakokuyavyani. Nenzokuŵilizyilani nokusambizyani patuŵa nipo soti mu mangʼanda ŵanu.

²¹ Ayuda na Agiliki niŵasenga motangʼa kuti ayalukile kwa Mulungu molapa, nocetekela Asikulu ŵasu Yesu.”

²² “Nipo lomba, nusimikizyila va kuya ku Yelusalemu, pakuti Mzimu Mtuŵa unilamulila. Vativikaniponele kwamene uko nuviziŵalini.

²³ Canuziŵa ni cakuti Mzimu Mtuŵa wanicenjezya mu mzinda mulimonse kuti jele na manzunzo vunilindila.

²⁴ Koma numekelalini va moyo wangu, ngani kuti ni va mtengo ngako kwa newo, malinga nikasilizye nchito yangu, na utumiki wecinipa Asikulu Yesu, woŵilizya patuŵa Malizu Aweme olaŵila va cisomo ca Mulungu.”

²⁵ “Lomba nuziŵa kuti mwewo monse ŵeneyendela nomuŵilizyilani va Ufumu wa Mulungu, muzewonelini soti cinso cangu yayi.

²⁶ Ni cikomo cake nukuwuzyani mosimikizya lelo, kuti ayakine mwa mwewo atayike, ivo ni vawo; newo niliye mlandu.

²⁷ Pakuti niliyokufiseni kanthu yayi, koma nikuŵilizyilani vonse vakupangwa Mulungu.

²⁸ “Mzimu Mtuŵa ekuyikani kuti muwolindilila mpingo wonse. Lomba muzisamale mweka, nipo musamale soti mpingo uyu. Ŵetelani mbelele za mpingo wa Asikulu wecinunula na mlopa wawo.

²⁹ Nuziŵa kuti nikazofumapo newo, pazeloŵe mimbulu yoyofya pakati panu, yatiyikasiyelini mbelele zala.

³⁰ Cukanga pakati pa mwewo, pazewuke ayakine olaŵila va wenye nonyengelela asambili kuti aŵakonkhe.

³¹ Niye mwewo, ŵani menso. Kumbukani kuti pa vyaka vitatu mzuŵa na usiku niliyoleke kucimula aliyense mwa mwewo na misozi.”

³² “Tetyo, lomba numuyikani mu manja mwa Mulungu, na cisambizyo cowonesha cisomo cake cokusungani luweme. Malizu awo ali na mphamvu zokulisha mpingo, nokupani cisomo cakusungila ŵanthu ŵake Mulungu.

³³ Niliyokumbwile ndalama keno vovwala va munthu aliyense yayi.

³⁴ Mwewo muziŵa kuti manja ŵangu aŵa ekata nchito kuti nifwane vetenzeve pamo na ayangu.

³⁵ Pa vonse nakuwoneshani kuti pokata nchito motangʼa moteti, tuwamila kuyavya wolefuka, kumbukani malizu ŵala ŵa Asikulu Yesu olaŵila kuti, ‘Kupa kushukisha munthu kupula kupokela.’”

³⁶ Paulo pecilaŵila ivi, efukama pansi nolomba nawo pamo ayakine wonse ŵala.

³⁷ Wonse ŵala elila ngako, emukumbatila Paulo wala nomumpsompsona polayilana naye.

³⁸ Ngako–ngako ecita cisoni cikomo ca malizu ŵake ŵala olaŵila kuti ŵeve azeaciwonelini soti cinso cake. Pa vuli pake emupelekezya ku wato.