Macitilo 15 - Chinsenga New Testament

Msonkhano wa ku Yelusalemu

¹ Ŵanthu ayakine ofumila ku Yudeya ewela ku Antiyokeya, nosambizya enekwawo kuti, “Keno musilimukiwalini kukonkha Matetulo ŵa Mose, mungapulumukelini.”

² Paulo na Banabasi esushana nawo ngako. Lomba enekwawo epangana kuti alute ku Yelusalemu Paulo na Banabasi, nipo enekwawo ayakine ŵa ku Antiyokeya, kuti akalaŵizyane na atumiki na akulu ŵa mpingo va nkhani iyi.

³ Mpingo pawiŵatuma, epitila ku Fenisiya na Samaliya okonkholola mweciyalukila mtima ŵanthu asali Ayuda. Malizu aŵa etemwesha ngako enekwawo wonse.

⁴ Pecifwika ku Yelusalemu, epokelelewa na mpingo na nthumi na akulu ŵa mpingo. Paulo na Banabasi eŵakonkhololela nchito zonse zecicita Mulungu mwa ŵeve.

⁵ Koma wocetekela ayakine ŵamene kale enze ŵa mu cipani ca Afalisi, epanama nolaŵila kuti, “Ni copangwika kuti wocetekela ŵa mitundu iyakine asilimukiwe, nipo soti kuti aŵalamule kuti awokonkha Matetulo ŵa Mose.”

⁶ Lomba nthumi na akulu ŵa mpingo ewungana kuti awone luweme nkhani iyi.

⁷ Pecilaŵizyana nsita itali, Petulo epanama noŵawuzya kuti, “Mwenekwasu, muziŵa kuti pa masiku wotatika ŵala Mulungu enisalula pakati pa mwewo kuti nikaŵilizye Malizu Aweme ku ŵanthu ŵa mitundu iyakine, kuti amvwe nocetekela.

⁸ Nipo Mulungu oziŵa mitima ya ŵanthu, eŵacitila umboni poŵapa Mzimu Mtuŵa, ngani mwecipela sewo.

⁹ Mulungu aliyosiyanishe pakati pa sewo na ŵeve, koma eyesa mitima yawo na cicetekelo cawo.

¹⁰ Lomba mumuyeselanji Mulungu poyika mu mkosi mwa asambili ŵala goli yakuti cukanga makolo ŵasu keno sewo ŵamene tiliyotweshe kuyitakula?

¹¹ Yayi, tucetekela kuti copulumusha ŵeve, na sewo pamo, ni cisomo ca Asikulu Yesu.”

¹² Wonse mu msonkhano mwala enze celele omvwishila Banabasi na Paulo okonkholola va mwecicitila Mulungu viziŵikilo na vokanganisha pakati pa ŵa kunja kupitila mwa ŵeve.

¹³ Ŵeve ŵala pecisilizya kulaŵila, Yakobe elaŵila kuti, “Mwenekwasu, munimvwishishe.

¹⁴ Petulo wakonkholola Mulungu mwecikumbukila ŵanthu asali Ayuda potatikila, popatula ayakine pakati pawo kuti aŵe ŵanthu ŵake–ŵake.

¹⁵ Vuzomelezyana na malizu ŵa aneneli, pala kwelembewa kuti,

¹⁶ ‘Vikasila ivi nikawelele, nizenimange soti ngʼanda ya Davide ipona. Nizenimange soti vopasuka vake, noyiwamya soti,

¹⁷ Nizecite tetyo kuti ŵanthu ayakine wonse na ŵanthu ŵa mitundu yonse, ŵala woziŵika na zina yangu, azeasakile–sakile Asikulu

¹⁸ Olaŵila tetyo Leza, ewulula ivi kutatikila na kale–kale.’

¹⁹ “Ni cikomo cake newo nulaŵila kuti, osati tiŵavute ŵanthu asali Ayuda oyaluka mtima nokonkha Mulungu.

²⁰ Koma tiŵalembele kalata kuŵawuzya kuti osati awokulya vililini vituŵa cikomo vitwaliwa ku mafano, alewe kacenche, nipo asalye nyama zocitonyongolola, nipo soti milopa.

²¹ Pala kutatikila na kale mu mzinda uliwonse muli ŵanthu osambizya Matetulo ŵa Mose, nipo oŵelenga malizu ŵake mu kacisi wa Ayuda pa nsiku ya Sabata iliyonse.”

Msonkhano utumizya yasuko

²² Pamene apo atumiki na akulu ŵa mpingo, pamo na mpingo wonse, ezomelezyana kusalula ŵanthu ayakine pakati pawo kuti aŵatume ku Antiyokeya pamo na Paulo na Banabasi. Esalula Yudasi, woyitiwa Basabasi, nipo soti Sila, ŵanthu ŵa mcinzi pakati penekwawo,

²³ kuti akatwale kalata yolaŵila kuti: “Mwenekwasu sewo nthumi, pamo na akulu ŵa mpingo; Tikuti moni mwewo mwenekwasu ŵa ku Antiyokeya, ŵa ku Siliya, na ŵa ku Silisiya, ŵamene mulilini Ayuda.

²⁴ Tamvwa kuti ŵanthu ayakine ofumila mu umba yasu omutamanishani nokusokonezani malingililo. Ŵamene awo ni sewolini teŵatuma yayi.

²⁵ Lomba petiwungana, tazomelezyana kusalula ŵanthu noŵatuma kwanu. Azeawele pamo na wotemweka ŵasu Banabasi na Paulo.

²⁶ Ezitwala kuti atumikile Asikulu ŵasu Yesu Kristu.

²⁷ Ni cikomo cake tatuma Yudasi na Sila kuti azemukonkhololeni pa kamwa vatalemba mu kalata iyi.

²⁸ Malingililo ŵasu akatizyana na ŵa Mzimu Mtuŵa kuti osati tikutakulisheni katundu uyakine, kufumyako vopangwika ivi:

²⁹ Osalya cakulya citwaliwa nsembe ku mafano, musalye milopa keno nyama yocita kunyongolola, nipo soti osacita ucende. Mukalewa ivi, muzecite luweme. Salani luweme.”

³⁰ Lomba nthumi zala zeyima nofwika ku Antiyokeya. Zewunganisha mpingo wonse notwala kalata yala.

³¹ Ŵeve peciyiŵelenga, esangalala cikomo ca malizu ŵake oŵakosesha.

³² Yudasi na Sila enze soti aŵilizyi, nipo ekosesha enekwawo ŵala na malizu anyinji noŵankhazikisha mtima.

³³ Pecinkhala kwala kwa kansita, enekwawo ŵala eŵazomezya mwa mtendele kuti awelele kwa ŵala eŵatuma. [

³⁴ Koma Sila esimikizya kuti asalile.]

³⁵ Paulo na Banabasi eciŵa mphela ku Antiyokeya, osambizya noŵilizya malizu ŵa Asikulu pamo na ŵanthu ayakine anyinji.

Paulo na Banabasi okangana

³⁶ Pepepita masiku atontho, Paulo ewuzya Banabasi kuti, “Tiyeni tiwelele tikatandalile enekwasu ku munzi uliwonse kwetiŵilizya Malizu ŵa Asikulu.”

³⁷ Banabasi epangwa kutola soti Yohane woyitiwa Maliko, kuti alute naye.

³⁸ Koma Paulo elingilila kuti ni ciwemelini kumtola soti, cikomo yeve eŵasiya ku Pamfiliya, osaluta nawo ku nchito.

³⁹ Pamene apo ŵeve ekangana ngako, nipo epatukana. Banabasi etola Yohane Maliko wala noloŵa mu wato kuya ku Kiplo.

⁴⁰ Koma Paulo esalula Sila, nipo enekwawo eŵalombela kuti Asikulu aŵashukishe, akayima.

⁴¹ Epitila ku Siliya na ku Silisiya okosesha ŵanthu ŵa mu mpingo.