Macitilo 14 - Chinsenga New Testament

Banabasi na Paulo ku Ikoniyo

¹ Vicitika ku Antiyokeya, vicitika soti ku Ikoniyo. Paulo na Banabasi eloŵa mu kacisi wa Ayuda. Esambizya motangʼa, motetyo, ŵanthu anyinji ngako, Ayuda na ŵanthu ŵa mitundu iyakine ecetekela.

² Koma Ayuda aliyocetekele, ewusha mitima ya ŵa kunja ŵala kuti atinkhane na Akristu.

³ Paulo na Banabasi eciŵa uko pa kansita cendi, oŵilizya motangʼa mtima vowama mtima kwa Asikulu. Nipo Asikulu enzocitila umboni malizu ŵawo poŵapa mphamvu zocitila viziŵikilo na vokanganisha.

⁴ Koma ŵanthu ŵa mu mzinda mwala eyaŵanikana, ayakine enze ku mbali ya Ayuda, ayakine enze ku mbali ya nthumi.

⁵ Pamene apo ŵanthu ŵa kunja na Ayuda, pamo na akulu ŵawo, esimikizya voŵanzunza noŵatema myala.

⁶ Atumiki ŵala pecimvwa ivi, ewutukila ku Listala na ku Delibe, mizinda ya ku Likawoniya, nipo soti ku calo cozunguluka mizinda yala.

⁷ Kwamene uko soti etatika kuŵilizya Malizu Aweme.

Banabasi na Paulo ku Listala

⁸ Ku Listala kwenze munthu wopunduka mendo inzoyingonkhala pansi. Evyalika wolemala nipo cinkhalile cake enzoyendalini.

⁹ Yeve uyo enzomvwilila penzolaŵila Paulo. Paulo emulolesha, nipo peciwona kuti munthu wala enze na cicetekelo cakuti angapole,

¹⁰ elaŵila moŵilikizya kuti, “Yondolola mendo wako, panama.” Pamene apo munthu wala epanama notatika kuyenda.

¹¹ Ŵanthu wonse ŵala peciwona vecicita Paulo, eŵilikizya mu cilaŵilo ca Cilikawoniya kuti, “Yatiselukila milungu yowoneka ngani ŵanthu.”

¹² Motetyo, Banabasi emuyita Zewusi nipo Paulo emuyita Helemesi, cikomo niye enzotangulila polaŵila.

¹³ Ngʼanda yolombelamo Zewusi wala yenze kunja pafupi na mzinda wala. Lomba wansembe wake ewela ku milyango pecitola ngʼombe yomangiwa maluŵa mu mkosi. Yeve pamo na ŵanthu wonse ŵala epangwa kuyotwala nsembe.

¹⁴ Koma nthumi zala, Banabasi na Paulo pezicimvwa ivi, zengʼamba vovwala vawo, nowutukila pakati pa ŵanthu ŵala. Elaŵila moŵilikizya malizu kuti,

¹⁵ “Mwewo mwe ŵanthu, ni cikomo canji mucita ivi? Nase soti nise ŵanthu ngani mwamulili mwewo. Tumuŵilizyilani Malizu Aweme olaŵila kuti muleke vinthu va tyala–tyala nokonkha Mulungu wa moyo elenga kululu, calo ca pansi, cimmana, na vonse vilimo.

¹⁶ Kale yeve elekelela ŵanthu ŵa mitundu yonse kukonkha njila zawo–zawo.

¹⁷ Koma aliyoleke kuvicitila umboni mu vinthu viweme venzocita. Kufumila Kululu omupani mvula na nsita yavotwala. Okupani vakulya na viyakine vinyinji vozuzya mitima yanu na cimwemwe.”

¹⁸ Cukanga na malizu aŵa, evutika kuŵalesha ŵanthu ŵala kuti asaŵatwalile nsembe.

¹⁹ Koma kwiwela Ayuda ayakine ofumila ku Antiyokeya na ku Ikoniyo nonyengelela ŵala ŵanthu. Lomba ŵanthu ŵala etema Paulo myala, nomuguguzila kunja kwa mzinda, cikomo eyesa kuti wafwa.

²⁰ Koma asambili ayakine peciwungana nomuzungulila, yeve ewuka noloŵa soti mu mzinda mwala. Mmawa mwake yeve na Banabasi eluta ku Delibe.

Paulo na Banabasi owelela ku Antiyokeya mu citwa ca Siliya

²¹ Paulo na Banabasi peciŵilizya Malizu Aweme kwala ku Delibe, nonyengelela wocetekela anyinji, ewelela ku Listala, ku Ikoniyo na ku Antiyokeya mu citwa ca Pisidiya.

²² Eŵakosesha mtima asambili ŵala, kuti asataye cicetekelo cawo. Eŵawuzya kuti, “Kuti tiloŵe mu Ufumu wa Mulungu, tuwamila kukoselela manzunzo anyinji.”

²³ Pa mpingo uliwonse eyikapo akulu ŵa mpingo. Nipo polombela nolilesha kulya eŵatwala kwa Asikulu ŵecicetekela lomba.

²⁴ Pa vuli pake epitila ku Pisidiya nofwika ku Pamfiliya.

²⁵ Nipo peciŵilizya Malizu ŵa Mulungu ku Pega, eluta ku Ataliya.

²⁶ Pecifuna ku Ataliya eloŵa mu wato nozyokela ku Antiyokeya, kwecitwaliwa ku cisomo ca Mulungu pa nchito yecisilizya.

²⁷ Pecifwika kwala, ewunganisha mpingo wonse, nowukonkhololela vonse vecicita Mulungu mwa ŵeve, nipo soti yeve mwecivulila ŵanthu ŵa mitundu iyakine njila kuti acetekele.

²⁸ Lomba eciŵa kwala na asambili wala nsita itali.