Macitilo 11 - Chinsenga New Testament

Petulo okonkhololela mpingo wa ku Yelusalemu vicitika

¹ Nthumi zala, na enekwawo wonse enze ku Yudeya, ecimvwa kuti ŵanthu ŵa kunja nawo soti epokela Malizu ŵa Mulungu.

² Tetyo, Petulo peciwela ku Yelusalemu, ŵa mu cipani cokoselela pa va msilimuko esushana naye.

³ Ŵeve elaŵila kuti, “Mwewo mwiloŵa mu ngʼanda ya ŵanthu wosasilimukiwa, nolyela nawo pamo.”

⁴ Pamene apo Petulo etatika kuŵakonkhololela mwa mndandanda vicitika, elaŵila kuti,

⁵ “Newo nenzolomba mu munzi wa Yopa. Nicita nga nakomoka, nipo niwona ngani kutulo cinthu ciyakine cuseluka pansi kufuma kululu. Cenzowoneka ngani cinyula cikulu comangiwa mu vitwa vake vinayi, nipo cifwika penenze newo.

⁶ Penicilolesha, niwonamo nyama zoŵeta na za msanga nipo soti na vokalaŵa na tunyoni.

⁷ Lomba nicimvwa malizu oniwuzya kuti, ‘Petulo uka, paya, ulye.’

⁸ “Koma newo nelaŵila kuti, ‘Yayi pepani Asikulu, newo na kale konse cinthu cisali cituŵa keno conyansa cikaliyoloŵamo mu kamwa mwangu umu.’

⁹ “Koma malizu ofuma Kululu ŵala elaŵila soti ka ciŵili kuti, ‘Mulungu wavituŵisha wewo osati ulaŵile kuti ni vituŵalini.’

¹⁰ Ivi vicitika katatu, nipo vonse ivo vitolewa nakuya kululu.

¹¹ “Nsita iyo, kwiwela ŵanthu atatu ku ngʼanda kwenenzonkhala. Etumiwa kwa newo kufumila ku Kayisaliya.

¹² Mzimu Mtuŵa enze eniwuzya kuti nisakayike, koma nilute nawo. Enekwasu asanu na yumo aŵa nawo soti enipelekezya, nipo ticiyoloŵa mu ngʼanda ya Koloneliyo.

¹³ Yeve ekonkholola mweciwonela mngelo wapanama mu ngʼanda mwake nomuwuzya kuti, ‘Tuma ŵanthu ku Yopa kuti akayite Simoni, woyitiwa Petulo.

¹⁴ Yeve akakuwuzye malizu ŵatiukapulumuke nawo, na wonse ŵa mu banja mwako.’

¹⁵ “Tetyo, penitatika kulaŵila, Mzimu Mtuŵa wiŵaponela ŵeve, ngani mwewiponela soti na sewo potatika pala.

¹⁶ Pamene apo nikumbuka malizu ŵecilaŵila Asikulu kuti, ‘Yohane ebatiza na manzi, koma mwewo muzebatiziwe na Mzimu Mtuŵa.’

¹⁷ Lomba keno Mulungu eŵapa cawanzi cecipa sewo peticetekela Asikulu Yesu Kristu, nga newo nine ŵani kuti nimusushe Mulungu?”

¹⁸ Osushana naye ŵala pecimvwa ivi, eleka misusho yala. Etembezya Mulungu nolaŵila kuti, “Kansi niye mwacilili! Niye kuti Mulungu waŵapa cendi ŵa kunja shuko yakuti ayaluke mtima nopokela moyo!”

Mpingo wa ku Antiyokeya

¹⁹ Ŵala wocetekela Kristu, enzeemwazyikana cikomo ca manzunzo etatika pa nkhani ya Stefano, efwika mpaka ku Fenisiya, ku Kiplo, nipo soti na ku Antiyokeya. Enzoŵilizyalini malizu ku munthu aliyense, koma kwa Ayuda ŵeka.

²⁰ Koma pakati pawo penze ayakine ofumila ku Kiplo nipo soti ku Kilene. Aŵa efwika ku Antiyokeya notatika kulaŵila soti na Agiliki noŵilizya Malizu Aweme olaŵila va Asikulu Yesu.

²¹ Asikulu enzoŵakosesha, mwakuti ŵanthu anyinji ecetekela noyalukila kwa Asikulu.

²² Mpingo wa ku Yelusalemu pewicimvwa vicitika, wituma Banabasi ku Antiyokeya.

²³ Yeve pecifwika uko nowona Mulungu mweciŵashukishila, esangalala, nokosesha wonse ŵala kuti asimikizye mtima kuŵa wocetekela mwa Asikulu.

²⁴ Banabasi wala enze munthu wolungama, wozuzyiwa na Mzimu Mtuŵa na cicetekelo. Tetyo, ŵanthu anyinji ngako ekopeka nolitwala kwa Asikulu.

²⁵ Pamene apo Banabasi eluta ku Taliso kuyosakila Saulo.

²⁶ Pecimufwana, ewela naye ku Antiyokeya. Yeve eciŵa naye pamo mu mpingo wala caka conse, nosambizya ŵanthu anyinji. Ni ku Antiyokeya, asambili kwecitatikila kuyitiwa “Akristu.”

²⁷ Pa masiku ŵala kwifwika aneneli ayakine ku Antiyokeya ofumila ku Yelusalemu.

²⁸ Yumo mwa ŵeve, zina yake Agabu, epanama, nipo na mphamvu ya Mzimu Mtuŵa elota kuti pazaŵe njala ikulu pa calo conse ca pansi. Njala yala iwela cendi pa nsita ya Kilawudiya.

²⁹ Pamene apo Akristu ŵala esimikizya votumizya voyavya kwa enekwawo onkhala ku Yudeya, nipo kuti aliyense atumizye kulingana na ca ali naco.

³⁰ Ivo vicitika cendi, nipo etuma Banabasi na Saulo kuyotwala voyavya vala kwa akulu ŵa mpingo.