Luka 1 - Chinsenga New Testament

¹ Ateyofilo wocinzikiwa, ŵanthu anyinji eyesa kuyika pamo mbili ya vinthu vicitika pakati pasu.

² Ŵala ewona vonse potatikila, na kuti enze otumikila Malizu, etiwuzya veciwona na menso ŵawo.

³ Tetyo, pakuti nane nakonkholola ngako vonse vicitika kufuma potatika, nalingilila kuti ni ciweme nikulembeleni vamene ivo mwa mndandanda.

⁴ Nacita teti kuti muziŵe cendi kuti vecikusambizyani ni vyendi.

Mngelo olaŵililatu va kuvyalika kwa Yohane Mbatizi

⁵ Pa nsita Helode peenze mfumu ya calo ca Yudeya, kwenze wansembe muyakine zina yake Zakaliya, wa umba ya ansembe ya Abiya. Mkazi wake Elizabeti enze wa banja ya Aloni.

⁶ Aŵa wonse aŵili enze ŵanthu wolungama pa menso pa Mulungu, nipo enzokonkha mwa cicetekelo Matetulo na malangizyo wonse ŵa Asikulu.

⁷ Enzeve mwana, cikomo cakuti Elizabeti enze cumba, nipo wonse aŵili enze akulukazi.

⁸ Nsiku iyakine, wansembe Zakaliya enzokata nchito yake ya unsembe pa menso pa Mulungu.

⁹ Kulingana na mwambo wawo wa ansembe, Zakaliya esaluliwa na mayele kuloŵa mu ngʼanda ya Asikulu kuyoshoka lubani.

¹⁰ Umba yonse ya ŵanthu yenzolombela kunja pa nsita yoshoka lubani.

¹¹ Lomba mngelo wa Asikulu, ewonekela kwa Zakaliya. Mngelo wala epanama ku kwanja kwendi kwa guwa yoshokelapo lubani.

¹² Zakaliya ezizimuka pomuwona, nocita wowa.

¹³ Koma mngelo wala emuwuzya kuti “Usayope, Zakaliya, Mulungu wamvwa lombelo yako. Mkazi wako Elizabeti azeakuvyalile mwana mwanalume, nipo uzeumteye zina yakuti Yohane.

¹⁴ Uzeukondwele nosekelela, ŵanthu anyinji soti azeasangalale cikomo covyalika kwake,

¹⁵ pakuti yeve azeaŵe mkulu pa menso pa Asikulu. Awokumwalini vinyu keno cokolwesha ciliconse, nipo aŵe wozuzyiwa na Mzimu Mtuŵa cukanga pa akaliyovyalika.

¹⁶ Azeayalushe mtima Aisilayeli anyinji kuti awelele kwa Asikulu, Mulungu wawo.

¹⁷ Motangʼa mtima na mwa mphamvu kulingana na mneneli Eliya, azeatangulile Asikulu akuza, nipo azeayikishe pamo avyazi na ŵana, azeatembenule ŵanthu osamwva kuti aŵe na nzelu ngani za ŵanthu wolungama. Azeawamyile Asikulu ŵanthu owamyiwilatu kuwatumikila.”

¹⁸ Zakaliya ekonsha mngelo wala kuti, “Kansi niziŵe tyani kuti vamene ivi ni va vyendi? Newo nine mkulukazi, na mwanakazi wangu naye ni mkulukazi.”

¹⁹ Mngelo wala elaŵila kuti, “Newo nine Gabiliyeli, wamene onkhala pa menso pa Mulungu. Yeve wacitonituma kuti nilaŵile nawe nokuwuzya malizu aweme teti.

²⁰ Wewo uliyocetekele vanalaŵila, koma vizecitike pa nsita yake. Ni cikomo cake unkhale celele, ukalaŵilelini, kufwikila nsiku pavitivikacitike ivi.”

²¹ Nsita yonse iyi, ŵanthu enzolindila Zakaliya, enzokanganishiwa kuti camucelwesha ni cinji mu Ngʼanda ya Mulungu.

²² Pecifuma, aliyolaŵile nawo. Pamene apo niye peciziŵa kuti wawona mensomphenya mu Ngʼanda ya Mulungu. Yeve elaŵila nawo na manja ŵeka, osati na malizu.

²³ Pecisila masiku ŵake wotumikila mu Ngʼanda ya Mulungu, eluta kwawo.

²⁴ Pa vuli pake mkazi wake Elizabeti eciŵa na pakati, efisa kwa miyezi isanu.

²⁵ Elaŵila kuti, “Asikulu anicitila voteti: nsita yamene ino aniwonesha lusungu wawo, anifumya nsoni pakati pa ŵanthu.”

Mngelo Gabiliyeli olaŵililatu va kuyvalika kwa Yesu

²⁶ Elizabeti peenze na pakati pa miyezi isanu na umo, Mulungu etuma mngelo Gabiliyeli ku munzi uyakine wa ku Galileya, zina yake Nazaleti.

²⁷ Emutuma ku msimbi wosaziŵa mwanalume zina yake Maliya enzoyendelewa na mwanalume zina yake Yosefe, wa ku banja ya mfumu Davide.

²⁸ Mngelo wala ewela kwa yeve nolaŵila kuti, “Moni Maliya. Mulungu wakuwamilani mtima. Asikulu aŵe na mwewo!”

²⁹ Maliya ezizimuka nawo ngako malizu aŵa, notatika kulingilila kuti kansi moni uyu utanthauza vinji?

³⁰ Mngelo emuwuzya kuti, “Musayope, Maliya, Mulungu wakucitilani cisomo.

³¹ Muzaŵe na pakati, nipo muzemuvyale mwana mwanalume, muzemumteye zina yakuti Yesu.

³² Azaŵe mkulu, nipo azeayitiwe Mwana wa Mulungu Wopula vonse. Asikulu Mulungu azeamulovye Ufumu wa kolo yake Davide,

³³ nipo azeaŵe mfumu ya Aisilayeli nsita yonse. Ufumu wake uzesilelini.”

³⁴ Koma Maliya ekonsha mngelo wala elaŵila kuti, “Ivi vizevicitike tyani, pakuti newo nuziŵalini mwanalume?”

³⁵ Mngelo wala eyasuka kuti, “Mzimu Mtuŵa azeawele pali mwewo, nipo mphamvu za Mulungu Wopula vonse zizezimvwinikileni. Ni cikomo cake Mwana watiazeavyalike akayitiwe Mtuŵa – Mwana wa Mulungu.

³⁶ Wonani, wala mkwanu Elizabeti, naye soti olindila mwana mwanalume ku ukulukazi wake. Ŵanthu enze kuti ni cumba, koma uno ni mwezi wake wa cisanu na umo.

³⁷ Paliye kanthu kokangiwa na Mulungu.”

³⁸ Apo Maliya elaŵila kuti, “Nine mtumiki wa Asikulu; vicitike ngani mwamwalaŵilila.” Nipo mngelo wala emusiya.

³⁹ Pecipita masiku atontho, Maliya eyima nakuya mofulumila ku malo ŵa ku malupili ku munzi uyakine wa ku Yudeya.

⁴⁰ Peciloŵa mu ngʼanda ya Zakaliya ecipa moni Elizabeti.

⁴¹ Elizabeti pecimvwa moni wa Maliya, mwana etatika kulumpha–lumpha mu mala mwake. Nipo Elizabeti ezuzyiwa na Mzimu Mtuŵa,

⁴² nolaŵila na malizu moŵilikizya kuti, “Nimwe woshukishiwa ngako pakati pa anakazi ayakine wonse, ni woshukishiwa soti mwana wanu.

⁴³ Nine ŵani newo kuti mwewo anyina ŵa Asikulu ŵangu, muzemuniyendele?

⁴⁴ Cikomo panamvwa moni wanu, mwana watatika kulumpha–lumpha na cinthemwa mu mala mwangu.

⁴⁵ Nimwe woshukishiwa cikomo cakuti mwicetekela kuti Asikulu vecikuwuzyani, vizecitike cendi.”

Nzimbo ya Maliya yotembezya Mulungu

⁴⁶ Pamene apo Maliya elaŵila kuti, “Mtima wangu utembezya Asikulu,

⁴⁷ nipo mzimu wangu usangalala mwa Mulungu Mpulumushi wangu.

⁴⁸ Pakuti walolesha kulicefya kwa mtumiki wake. Ni cendi kutatika lomba ŵanthu ŵa luko yonse azeaniyite woshukishiwa.

⁴⁹ Pakuti wa mphamvu wanicitila vikulu, nipo zina yake ni ituŵa.

⁵⁰ Oŵacitila lusungu ŵanthu ŵa luko na luko ŵala omupa mcinzi,

⁵¹ Wacita va mphamvu na kwanja kwake; wamwazyisha ŵanthu ŵa mtima womeka.

⁵² Waselusha mafumu ŵa mphamvu pa mipando yawo ya cifumu; ŵanthu tyala aŵakweza.

⁵³ Wakutisha ŵanthu na viweme; ŵanthu wolemela owawezya osaŵapa kanthu.

⁵⁴ Azeayavye ŵanthu ŵake Aisilayeli, pokumbuka lusungu yake.

⁵⁵ Ivi niye vecilayizya kuti akaŵacitile makolo ŵasu ŵa macezo ŵala, Abulahamu na azikulu ŵake mpaka nsita zonse.”

⁵⁶ Maliya eciŵa na Elizabeti myezi itatu nowelela kwawo.

Kuvyalika kwa Yohane Mbatizi

⁵⁷ Nsita yakuti Elizabeti awone mwana ikumana, nipo evyala mwana mwanalume.

⁵⁸ Ayake na enekwawo pecimvwa kuti Asikulu amucitila lusungu ikulu yoteti, esekelela naye pamo.

⁵⁹ Pa nsiku ya cisanu na citatu mwana wala pecivyalika, ewela naye kuti amusilimule, nopangwa kumuteya zina ya awusu wake Zakaliya

⁶⁰ Koma anyina wake ekana, elaŵila kuti, “Yayi, mumuteye Yohane.”

⁶¹ Pamene apo ŵanthu emuwuzya kuti, “Koma pakati ponekwanu paliye ali na zina yoteti.”

⁶² Tetyo, elaŵila na awisi na manja, emukonsha kuti, “Mupangwa kuti timuteye zina yanji?”

⁶³ Zakaliya esenga colembelapo, na kuti elemba kuti, “Zina yake ni Yohane.” Ŵanthu wonse ekanganishiwa.

⁶⁴ Pamene apo Zakaliya etatika soti kulaŵila, notatika kutembezya Mulungu.

⁶⁵ Ayawo wonse ekatiwa na wowa, nipo mbili iŵilikila ku mbali konse kwa malupili ŵa ku Yudeya.

⁶⁶ Ŵanthu wonse ecimvwa, enzozilingilila mu mitima mwawo nozikonsha kuti, “Kansi mwana uyu azeaŵe munthu wotyani?” Pakuti venzowonekelatu vocitika kuti Asikulu ali naye.

Nzimbo ya Zakaliya

⁶⁷ Zakaliya, awisi wa Yohane wala ezuzyiwa na Mzimu Mtuŵa, etatika kulaŵila malizu ofumila kwa Mulungu. Elaŵila kuti,

⁶⁸ “Atembezyewe Asikulu, Mulungu wa Aisilayeli, cikomo cakuti ecizoŵayavya ŵanthu ŵawo, noŵapulumusha.

⁶⁹ Ewusha muyakine, wa mtundu wa mtumiki wake Davide, kuti aŵe Mpulumushi wasu wa mphamvu.

⁷⁰ Ivi niye vecinenelatu yeve macezo kupitila mwa aneneli ŵake atuŵa mtima.

⁷¹ Elayizya kuti azeatipulumushe kwa alwani wasu, na kwa wonse otitinkha.

⁷² Tetyo, yeve eŵacitila lusungu makolo wasu ŵa macezo, nipo wakumbuka umvwano wake utuŵa.

⁷³ Umvwano wecimvwana nolumbila kwa kolo yasu Abulahamu, kuti atipe,

⁷⁴ kuti azeatipulumushe kwa alwani wasu, kuti tomutumikila paliye wowa,

⁷⁵ kuti tiŵe atuŵa mtima na wolungama pa menso pake, masiku wonse ŵa moyo wasu.

⁷⁶ “Lomba wewo mwanawe, uzeuyitiwe mneneli wa Mulungu Wopula vonse, cikomo uzeuthangule pa menso pa Asikulu, kuti uwamyiletu njila zawo.

⁷⁷ Uzeuziŵishe ŵanthu ŵawo kuti Mulungu azeaŵapulumushe poŵalekelela macimo ŵawo.

⁷⁸ Cikomo ca lusungu yake ikulu, azeatitumizyile kuŵala kwa zuŵa ya mmawa kufumila Kululu.

⁷⁹ Kuŵala kwake kuzesanikile wonse onkhala mu mfinzi ngani imfwa, kuzotithangulila pa njila ya mtendele.”

⁸⁰ Mwana wala Yohane enzokula nakuŵa na unkhalo wa mphamvu. Pa vuli pake enkhala ku cipululu kufwika nsiku yeciziwonesha patuŵa pakati pa Aisilayeli.