Filemoni 1 - Chinsenga New Testament

¹ Nine Paulo, wamene nili mu jele cikomo ca Kristu Yesu, pamo na munekwasu Timoteyo. Tulembela wewo Filimoni, wotemweka munekwasu, nyanchito muyasu.

² Kalata iyi soti tulembela Afiya, mlongosi wasu, na Alikipo, msilikali muyasu pa nkhondo ya Mulungu, koma soti mpingo wonse ukumana mu ngʼanda mwanu.

³ Mulungu Awusu wasu na Asikulu ŵasu Yesu Kristu akucitileni cisomo nokupani mtendele.

Cinthemwa na cicetekelo ca Filimoni

⁴ Munekwasu Filimoni, nsita zonse mu malombelo ŵangu nukukumbuka notembezya Mulungu wangu.

⁵ Nukumvwa kuti ucetekela mwa Asikulu Yesu, na kuti usangalala na atuŵa mtima wonse ŵa Mulungu.

⁶ Lombelo yangu ni yakuti cicetekelo cauyaŵana nawo, ciŵe cakuya kuti uziŵishishe viweme vonse vawupokela, mwa Kristu.

⁷ Wewo munekwasu, cinthemwa cako canisangalasha cikomo cakuti watangʼisha mitima ya ŵanthu ŵa Mulungu.

Paulo osenga Filimoni kuti amupokelele soti Onesimo

⁸ Cukanga ni cotwesheka kuti nicite kukupingula mu zina ya Kristu vawupangwika kucita,

⁹ koma cikomo ca cinthemwa nicite mosenga. Newo Paulo nemkulukazi koma soti nili mu jele cikomo ca Kristu Yesu.

¹⁰ Nusenga mu malo mwa mwana wangu mwa Kristu, wamene nili awusu wake mu uzimu panili mu jele muno. Uyu ni Onesimo.

¹¹ Kale enzeve nchito kwa wewo koma lomba angatiyavye tonse wewo na newo.

¹² Numtumizya soti kwa wewo lomba, nipo potetyo nucita nga kuti nakutumizyila mtima wangu wamene.

¹³ Nenzopangwa mphela–mphela kuti aŵe na newo kuno, kuti akonitumikila mu malo mwako, pakuti nili mu jele cikomo cotumikila Malizu Aweme.

¹⁴ Koma nupangwalini kucita kanthu osakukonsha, kuyopa kuti, unganicitile cinthu ciweme mokakamizyiwa osati mwa ufulu.

¹⁵ Keno Onesimo eyingokusiya kwa kansita katontho, kuti uzeuŵe naye nsita zonse,

¹⁶ osati ngani muzya, koma ngani munekwasu wotemweka.

¹⁷ Lomba keno ukuti nine muyako, mupokelele uyo ngani mwawungapokelele newo.

¹⁸ Keno ekuyifyilapo, keno enze na nkhongole kwako, nkhongole iyo iŵe yangu.

¹⁹ Malizu ŵanulemba pano, nulemba na kwanja kwangu kuti, “Newo Paulo nilipile.” Tetyo, nukukumbusha kuti, pala wewo, wenikongolela moyo wako wa Cikristu!

²⁰ Munekwasu, nusenga kuti nane soti uniyavyeko cikomo ca Asikulu Yesu, kuti mtima wangu unisangulushe mwa Kristu.

²¹ Cukanga panutumizya kalata iyi, nuziŵa kuti ucite vanakusenga na kupulamo.

²² Ciyakine ni ici, uniwamyile cipinda ca alwendo nili naco cilolelo kuti kufumila mu malombelo wanu Mulungu apange njila yakuti nimangululiwe na kuti nizekuwoneni soti.

Malizu osilizyila

²³ Epaflasi ali mu jele pamo na newo cikomo ca Kristu Yesu okupani moni.

²⁴ Anyanchito ayangu wonse okupani moni, Maliko, Alistaliko, Dema na Luka.

²⁵ Cisomo ca Asikulu ŵasu Yesu Kristu ciŵe na mwewo.