Aefeso 1 - Chinsenga New Testament

¹ Paulo, nthumi ya Kristu Yesu mu kupangwa kwa Mulungu, kwa atuŵa mtima onkhala ku Aifeso, wocetekeleka mwa Yesu Kristu.

² Mulungu Awusu wasu na Asikulu ŵasu Yesu Kristu akucitileni cisomo nokupani mtendele.

Mashukisho ŵa uzimu mwa Kristu

³ Titembezye Mulungu na Awisi wa Asikulu Yesu Kristu! Atishukisha potipa mashukisho wonse ŵa uzimu mwa Kristu, mu calo ca Kululu.

⁴ Cukanga calo pecenze cikaliyolengewa, Mulungu enzeetisalulilatu kuŵa ŵake mwa Kristu, kuti tiŵe atuŵa aliye ŵanga pa menso pake. Cikomo ca cinthemwa cake,

⁵ Mulungu enzeepanga kale kuti kupitila mwa Yesu Kristu azeatipange ŵana ŵake – uku kwenze kupangwa kwake.

⁶ Tiyeni timutembezye Mulungu pa cisomo ciweme cecitipa mu Mwana wake wotemweka.

⁷ Pakuti mu mlopa wa Kristu tonse timangululiwa, niye kuti macimo ŵasu elekelelewa. Cawanzi ca Mulungu ni cikulu ngako,

⁸ catupewa mwa winji wake mu nzelu zake zonse na kumvwisha.

⁹ Mulungu etiwululila cisinsi cenzopangwa kuti acite kupitila mwa Kristu,

¹⁰ nsita ikazokwanila. Iyi lingililo yenze yoleta pamo vonse va Kululu na va pansi, noyika Kristu kuŵa mutu wa volengewa vonse.

¹¹ Ici cuyikililapo na sewo – Mulungu etisalulilatu kuti tikaŵe ŵanthu ŵake kupitila mwa Kristu. Ici cenze mukulingana na kupangwa kwake, na kuti opanga vonse kucitika ngani mwakupangwila mwine.

¹² Mulungu ecita ivi pakuti sewo, tenze wotatika mu cicetekelo mwa Kristu, titembezye ulemelelo wa Mulungu.

¹³ Pemwicimvwa malizu ŵa vyendi, ŵamene ali Malizu Aweme ŵa cipulumusho, mwicetekela mwa Kristu, na kuti Mulungu eyika ciziŵikilo cake pa mwewo pecimupani Mzimu Mtuŵa olayizyiwa.

¹⁴ Mzimu uyu ni cisimikizyilo ca cecilayizya kufwikila cimasuko ca ŵala ŵanthu ali mu manja mwa Mulungu – mukutembezya kwa ulemelelo wake.

Lombelo ya Paulo

¹⁵ Pa cikomo ici, kutatikila penicimvwa va cicetekelo canu mwa Asikulu Yesu, na cinthemwa ku ŵanthu wonse ŵa Mulungu,

¹⁶ nikaliyolekezya kumtembezya Mulungu cikomo ca mwewo. Numukumbukani mu malombelo ŵangu,

¹⁷ nipo nusenga Mulungu wa Asikulu ŵasu Yesu Kristu, Awusu ŵasu ŵa ulemelelo, kumupani mzimu watiumpeni nzelu nowulula Mulungu kwa mwewo, kuti mumuziŵe luweme.

¹⁸ Nusenga kuti mtima ŵanu uvuliwe kuti uwone kuŵala kwake na kuti muziŵe ni cilolelo canji camwayitiwila, kulemela kwa mashukisho ŵa ulemelelo ŵecilayizya ŵanthu ŵake,

¹⁹ na mphamvu zake zosalinganizyiwa kwa sewo omucetekela. Iyi mphamvu yuseŵenza mwa sewo, yulingana na yala mphamvu yotangʼa,

²⁰ yeciseŵenzesha Mulungu kuwusha Kristu ku imfwa nomuyika ku kwanja kwake kwendi mu calo ca Kululu.

²¹ Kristu olamulila kwamene uko ali palulu pa wopingula Kululu wonse, ŵa maulamulilo, na ŵa mphamvu, ali na zina ikulu pa mazina wonse ŵa mu calo cino na cikuza.

²² Mulungu eyika vonse kuti viŵe pansi pa mendo ŵa Kristu nipo emuyika kuŵa mutu wa vinthu vonse vowamila mpingo.

²³ Mpingo ni muŵili wa Kristu, kuzuzya kwa yeve wamene wozuzyilatu vinthu vonse kulikonse.