اوّل یوحنا 1 - گیله ماز

زندگی یه کَلام

¹ اونچه که شروعِ جی دَبا، اونچه که بِشنَوِسّیم و اَمی چِشمِ هَمرَه بَدییَیم، اونچه که اونه بِیشییَیم و اَمی دَسه هَمرَه لَمس هَکُردیم، یَعنی زندگی کَلام که اونِهِ شِمِرِه اعلام کانیم.

² زندگی ظاهر هَبا؛ اَما اونِهِ بَدییَیم و اونِه گَواهی دَنیم. اَبدی زندگی رِه شِمِرِه اعلام کانیم، همون اَبدی زندگی که پیَرهِ هَمرَه دَبا و اَمَرِه ظاهر هَبا.

³ اون کَلام که اَما بَدییَیم و بِشنَوِسّیم رِه شِمِرِه اِعلام کانیم تا شُما هَم اَمیِ هَمرَه رِفاقت بِدارین؛ راس راسی هَم که اَمیی رِفاقت پیَرهِ هَمرَه و اونه ریکا عیسیِ مَسیح هَمَرَئِه.

⁴ اَما اینه شِمِره نِویسِنیم تا اَمیِ خُشحالی کامِل هَبو.

نورِ دِلِه زندگی هَکُردَن

⁵ اینه پِیغامی که اونه جی بِشنَوِسّیم و شِمِرِه اعلام کانیم که: خُدا نورِ و هیچ ظُلَماتی اَصلاً اونه دِلِه دَنیِه.

⁶ اَگه اَما باگوییم اونه هَمرَه رِفاقَت داریم، در حالی که ظُلَمات دِلِه زندگی کانیم، دُرو زَنیم و حَقیقَتِ عَمَل نُکانیم.

⁷ وَلی اَگه نورِ دِلِه زندگی هَکُنیم، هَمونجور که اون نورِ دِلِه دَرِه، هَمدِیگَرِ هَمرَه رِفاقت داریم و اونه ریکا عیسی یِه خون اَمَرِه هر گُناه جی پاک کانه.

⁸ اَگه باگوییم که گُناه نِداریم، خودِمان رِه گول بَزییم و اَمیِ دِلِه حَقیقتی دَنیِه.

⁹ اَگه اَما اَمی گُناهان رِه اعتراف هَکُنیم، او که وَفادار و عادلِ، اَمیِ گُناهانِ بَخشِنِه و هر نادُرسّیی یه جی اَمَرِه پاک کانه.

¹⁰ اَگه باگوییم گُناه نَکُردیم، اَما اونه دُروزَن کانیم و اونه کَلام اَمیی دِلِه دَنیِه.