ፍልጵስዩሳ 1 - Geeshsha Maxaafa

¹ Kiristoos Yesuusara issifida gisho, Xoossaba gidida, Filphisiyuusa kataman de7iya woosa keethaa cimatasinne daaqoneta ubbaas. Yesuus Kiristoosa aylle gidida, Phawuloosapenne Ximotiyoosape kiitetida kiitaa.

² Nu Aawa Xoossaafenne Godaa Yesuus Kiristoosape aadho keehatethaynne sarotethay hintew gido.

Phawuloosa Galata Woosa

³ Taani hintena qopiya wode ubban, ta Xoossaa galatayis.

⁴ Taani hinte ubbaas Xoossaa woossiya wode ufaysan woossayis.

⁵ Hinte koyro gallasape ha77i gakanaw, Wongela markateysan taara issife gididi, tana maaddida gisho, Xoossaa galatayis.

⁶ Hinte giddon lo77o ooso doomida Xoossay, Kiristoos Yesuusi simmiya gallasay gakanaw, polanaysa erayis.

⁷ Hinte ubba wode ta wozanan de7eeta. Taani ubba wodeka hessada qopanaw bessees. Ha77i taani qashon de7ashenne qashetanaape sinthe Wongela naagoninne Wongela mintha eson Xoossay taw qaadida qaada hinteka taara shaaketideta.

⁸ Taani hintena ubbaa Kiristoos Yesuusa siiquwan ay mela laamotiyako Xoossay taw marka.

⁹ Hinte siiqoy tuma eratetharanne akeekara issife guji guji diccana mela Xoossaa woossayis.

¹⁰ Hessan hinte lo77oba shaakidi, dooreyisata, Kiristoosi simmiya gallasan geeshshatanne boretonayisata gidana.

¹¹ Hinte de7oy Xoossaa bonchuwasinne galatas Yesuus Kiristoosa baggara bentiya xillotethaa ayfiyan kumidi ayfana.

Phawuloosa Qashoy Wongela Dalgisis

¹² Ta ishato, tana gakida ubbay Wongelay dalgana mela tuma maaddidaysa hinte erana mela koyayis.

¹³ Taani Kiristoosa gisho qashetidaysa, kawo gadho naageysatinne haysan de7iya harati ubbay eroosona.

¹⁴ Ta qashuwa gaason nu ishatape daroti Godan keehi ammanetidosona. Hessa gisho, Xoossaa qaala yashshi bayna kasepe minnidi odana mela minotethi demmidosona.

¹⁵ Gidoshin, issoti issoti qanaateninne palaman Kiristoosaba odoosona, shin harati suure wozanape odoosona.

¹⁶ Suure wozanape odeysati, Xoossay taw Wongela naagana mela hadara immidaysa eriya gisho, siiqon odoosona.

¹⁷ Shin tana qanaateysati ta qashuwa bolla hara meto ehanaba entaw daanin bantana dosidi Kiristoosaba odoosonape attishin, tuma wozanape odokona.

¹⁸ Hessi aykoka metenna. Tuma ogen gidin woyko wordo ogen gidin he ubban Kiristoosi sabbaketees. Tana hessi ufaysees. Qassi harabay tana ufaysiyabay,

¹⁹ taani hinte woosaninne Yesuus Kiristoosa Ayyaana maaduwan attanaysa eriya gisho tana ufaysees.

²⁰ Ta gita amoynne ufaysan naagiya naagoy ta yeellatonna attanaysa. Shin ubba wode ootheysada, ha77ika taani paxa de7in woyko hayqin yayyonna ta kumetha asatethan Kiristoosi bonchetana gada minotethan odayis.

²¹ Ta de7ikoka Kiristoosa xalaalas de7ayis; qassi ta hayqikoka taw aadhida wodhe.

²² Shin ta paxa de7iko ayfey de7iya ooso oothana. Shin paxa de7eysafenne hayqope awusa dooraneko taw eretenna.

²³ Taani ha nam7atape awusa dooraneko un7etas. Ha de7uwape shaaketada Kiristoosara issife daanaw amottayis; Kiristoosara issife de7eysi ubbaafe aadhida lo77o.

²⁴ Shin taani hinte gisho paxa de7eysi hintew daro koshshiyaba.

²⁵ Hessa taani geeshshada erayis; taani, hinte ammanon diccanaadanne ufaytanaada hintera paxa daana.

²⁶ Hessa gisho, taani hinteko simmada yaa wode, Kiristoos Yesuusara hinte de7iya de7uwan tanan de7iya ceeqetethay hintew darana.

²⁷ Ubbaafe aathidi, hinte Kiristoosa Wongelas boncho ehiya de7o de7ite. Ta hintena be7in woyko be7onna ixin, hinte issi qofan minni eqidi, harati Wongelan ammanana mela issi wozanan gididi issife baaxeteysa ta si7ana.

²⁸ Hinte morketas yayyofite. Enti hintera eqetiyaba gidiko hessi hintew atotethas, entaw dhayos Xoossaafe gidida malla.

²⁹ Kiristoosas oothiya qaaday hintew imetiday, hinte iya ammanana mela xalaala gidonashin hinte iya gisho meto ekana melasa.

³⁰ Hessa gisho, hinte ta waayiya kase be7ideta; ha77ika ta waayeteysa si7eeta. Hinteka ta waayiya mela waayeteta.