Milalsa 1 - Geeshsha Maxaafa

Yerusalaame Waaye

¹ Kase asi kumida katamiya ha77i waanada asi bayna bessi gidadee? Kase kawotethata giddon gita gididaara ha77i waanada am7o gidadee? Katamata giddon kawo gididaara ha77i waanada aylle gidadee?

² Qamma yibbata yeeho yeekashe aqawusu; afuthi I ayfe karera duge wodhees. Kase iyo doseysatape ha77i iyo minthethiya issoyka baawa. I laggeti iyo aathidi immidosona; iw morke gididosona.

³ Yihudi naaqetada; aylletada di7etasu; ha77i kawotethata giddon de7awusu; shin shempo bessi demmabuku. Iya metootada de7ishin, yedetheysati iyo demmidosona.

⁴ Laytha ba7aale bonchanaw yaa asi bayna gisho, Xiyoone ogeti yeekosona. I dirsa pengeti baysatidosona; I kahineti oolosona. Yan de7iya geela7o nayti un7etidosona; iyaka un7etada yeekawusu.

⁵ I morketi iw godaa gididosona; entaw injetin de7idosona. I, nagaraa gaason Goday iyo un7ethis; I nayti morketan di7etidi bidosona.

⁶ Xiyooni bonchoy iipe qaaretis; I, halaqatika miya bessi dhayida gaarada hanidosona; Enti wolqa dhayidi bantana yedetheyisata sinthafe baqatidosona.

⁷ Yerusalaamey ba metuwanne ba un7a gallasan, beni ba boncho shaluwa hassayawusu. I, asay morketa kushen aadhidi imetida wode, iyo maaddiya issoyka bentibeenna. I morketi iyo xeellidi, I dhayuwan miicidosona.

⁸ Yerusalaamey gita nagara oothida gisho tunasu; iyo bonchida ubbay I kalluwa be7ida gisho kadhees; iya oolashe guye simmasu.

⁹ Tunatethi I afilaa bolla bentis; sinthafe ba bolla yaanaba qopabuuku. I kundethay daganthiyaba gidis; iyo minthethiya oonika baawa. Iya, “Abeeti Godaw, ta un7etetha be7a! ta morketi tana xoonidosona” yaagasu.

¹⁰ Morketi I boncho shaluwa bonqidosona; kase ne maabara giddo gelonna mela, neeni diggida asati, I keethaa gelishin be7asu.

¹¹ I asati koshatidi kathi demmanaw oolosona; enti de7on daanaw banta shaluwa kathan laammoosona. Yerusalaamey haysada yaagasu; Abeeti Godaw, tana xeella; ta kawushatethaa be7a!

¹² Hinteno, haysara aadheysato, haysi hintew aykoka daanennee? Ane be7ite; akeekite; ba eexiya hanqo gallasan, Xoossay ta bolla ehida metuwa mela metoy de7ii?

¹³ Bollafe tama duge yeddis; he tamay ta meqethaa giddo gelis. Ta tohoy xihen oyketis; tana guye zaaris; tana gallas ubbaa labbanthidi yeggi aggis.

¹⁴ Ta oothida nagara ubbaa shiishi qachidi, qambarada ta gannan wothis; yaatidi ta wolqaa wursis. Ta eqetanaw danda7onna asaas, tana aathidi immis.

¹⁵ Goday ta giddon de7iya wolqaama olanchota ubbaa diggis. Ta yalagata dhaysanaw wode qachis; woyne yedheysada, Goday Yihuda geela7ota yedhis.

¹⁶ Taani yeekashe ta afuthaa gussey hessasa; tana minthetheynne katisiya oonika baawa; morkey goobin, ta nayti un7etidosona.

¹⁷ Xiyooney ba kushiya miccasu; shin iyo minthethiya oonika baawa. I yuushuwan de7eysati iyo morkanaada Goday oothis. Yerusalaamey enta giddon tuna gidasu.

¹⁸ Iya haysada yaagasu; “Goday xillo; iya kiitetonna ixiday tana. Hinteno, asato ubbay si7ite; ta metuwaka be7ite; ta panthatinne ta geela7oti di7etidosona.

¹⁹ Ta laggeta xeegas; shin enti tana cimmidosona; kahinetinne cimati banta shempuwa ashshanaw, kathi koyishe katama giddon hayqidosona.

²⁰ Abeeti Godaw, ta waayiya be7a! ta garsay dagammis. Taani daro makallida gisho, ta wozanay meqis; karen mashshi wursees; son hayqoy de7ees.

²¹ Asay ta zelelsa si7idosona; shin tana minthethiya issi asika baawa. Ta morketi ta metuwa si7idosona; ne ta bolla oothidaban ufaytidosona. Enti taada hanana mela, enta bolla ne awaajida gallasaa eha!

²² Enta iitatetha ubbay ne sinthe gako; ta nagaraa gisho tana seeridaysada entaka seera; ta zelelsay daris; ta wozanayka meqis.”