ፍልጵስዩሳ 4 - ጌሻ ማፃፋ

ዉርሰ ዞረ

¹ ታ እሻቶ፥ ታ ዶሰይሳቶ፥ ታ ላሞተይሳቶ፥ ታና ኡፋይሰይሳቶ፥ ታና ግታየይሳቶ፥ ህዛ፥ ጎዳን ምንድ ኤቅተ።

² ኤዎዳነ ስንፅካ፥ ህንተ ናምአይ፥ እስ ቆፋን፥ ምችዳ ጎዳን ዳናዳ ታኒ ህንተና ዞራይስ።

³ ታራ ኦያ አማንይሶ፥ ኔኒ ሀ ማጫሳታ ማዳና መላ ታ ነና ዎሳይስ። ሀ ማጫሳት ታራ፥ ቀለምንፆሳራነ ኤንታ ሱንይ ፆሳ ደኦ ማፃፋን ፃፈትዳ ሀራታራ እስፈ ዎንገላ ኡባ በሳ ጋናዉ ዳቡርዶሶና።

⁴ ጎዳራ ህንተ ደእያ ደኡዋን ኡባ ዎደ ኡፋይትተ። ታኒ ሄሳ ጉጃዳካ ኦዳይስ፤ ኡፋይትተ።

⁵ አስ ኡባይ ህንተ አሽከተ ኤሮ፤ ጎዳይ ማታን ያና።

⁶ ህንተ ፆሳ ዎስያ ዎደ ኡባን እያ ጋላትሸ፥ ህንተና ኮሽያባ ኡባስ ዎስተፐ አትሽን፥ አይብባስካ ህርጎፍተ።

⁷ አሳ ኤራተ ኡባፈ አያ ፆሳ ሳሮተይ፥ ህንተ ዎዛናነ ህንተ ቆፋ ጎዳ የሱስ ክርስቶሳ ባጋራ ናጋና።

⁸ ዉርሰን፥ ታ እሻቶ፥ ህንተ ዎዛናን ሎኦባነ ጋላትስያባ ቆፕተ። ቱማ ግድያባ ኡባ፥ ቦንቾባ ኡባ፥ ቆሆ ግዶናባ ኡባ፥ ጌሻባ ኡባ፥ ሲቆባ ኡባነ ኡፋይስያባ ኡባ ቆፕተ።

⁹ ህንተ ታፐ ታማርዳባ፥ ኤክዳባ፥ ስእዳባነ በእዳባ ኡባ ኦተ። ሳሮተ እምያ ፆሳይ ህንተራ እስፈ ግዳና።

ጳዉሎስ ሺቅዳ እሞታስ ጋላትስ

¹⁰ ዳሮ ዎደፐ ጉየ፥ ህንተ ታባ ዛሪድ ቆፓናዉ ዶምዳ ግሾ ታኒ ጎዳን ዳሮ ኡፋይታይስ። ሄሳ ጉሳይ፥ ታዉ ቆፓናዉ ህንተዉ እንጀቶና እፅዳይሳፈ አትሽን፥ ታዉ ቆፋ አግበከታ።

¹¹ ታኒ ሄሳ ታና መትዳ ግሾ ጊከ፤ ታዉ ደእያባይ ግዳና ጉሱ ታማራስ።

¹² ታኒ መቶተትድ ደእያ ዱስ ኤራይስ፤ ቃስ ዱረትድ ደእያ ዱስካ ኤራይስ። አዉን ግድን ቃስ አይ ዎደካ ታኒ ካሎነ ኮሻ፥ ፓጨነ ፓላሀ ታማራስ።

¹³ ክርስቶስ ታዉ እምያ ዎልቃን ኡባባ ኦናዉ ዳንዳአይስ።

¹⁴ ግድኮካ፥ ህንተ ታ መቱዋ ታራ ኤክዳይሳን ሎኦ ኦደታ።

¹⁵ ፍልጵስዩሳ አሳቶ፥ ዎንገላ ኮይሮ ኦዳናዉ ታኒ ማቀዶነፐ ከይያ ዎደ እምያባንካ ኤክያባንካ ህንተ ዎሳ ኬፈ አትሽን፥ ሀር ታና ማድቦናይሳ ህንተ ኤሬታ።

¹⁶ ተሰሎንቀን መቶይ ጋክዳ ዎደካ ታና ዛር ዛሪድ ማድደታ።

¹⁷ ታኒ፥ ህንተፈ እሞታ ኤካናዉ ኮያዳ ግዶናሽን፥ እሞፐ ያ አንጁዋ ህንተ ኤካና መላሳ።

¹⁸ ታኒ፥ ህንተ እምዳ ኡባነ ግድድ ፓላሄይሳ ኤካስ። ህንተ የድዳ ኡባ ኤጳፍራድቱሳፐ ኤካስ፤ ኮሽያባ ኡባይ ታዉ ደኤስ። ህንተ ታዉ የድዳ እሞይ ፆሳስ ሳዎ ቶንኩ ግያ፥ እ ዶስያ፥ እ ኡፋይትያ ያርሾ መላ።

¹⁹ ታ ፆሳይ ባ ቦንቾ ዱረተፈ፥ ክርስቶስ የሱሳ ባጋራ ህንተዉ ኮሽያባ ኡባ እማና።

²⁰ ኑ አዋ ፆሳስ መርናፐ መርና ጋካናዉ ቦንቾይ ግዶ። አምንእ።

ሳሮ

²¹ ክርስቶስ የሱሳ ባጋራ ፆሳባ ግድዳ ኡባ ሳሮ ጊተ። ታራ ደእያ እሻት ህንተና ሳሮ ጎሶና።

²² ፆሳባ ግድዳ አሳ ኡባይ፥ ኡባፈ አድ ካዋ ቄሳረ ኬን ደኤይሳት ህንተና ሳሮ ጎሶና።

²³ ጎዳ የሱስ ክርስቶሳ አ ኬሀተይ ህንተራ ግዶ።