ፍልጵስዩሳ 2 - ጌሻ ማፃፋ

ቱማ አሽከተ

¹ ክርስቶሳን ህንተ ደእያ ደኦይ ህንተና ምንስ፤ ቃስ እያ ሲቆይካ ህንተና ምንስ። ጌሻ አያናራ ህንተዉ እስፈተ ደኤስ፤ ህንተ ሀራታስ ኬሄታነ ቃተታ።

² ህዛ፥ ህንተ እስ ቆፋን፥ ሲቆን፥ እስ ዎዛናንነ አያናን እስኖ ግድድ ታና ፖሎ ኡፋይስተ።

³ ህንተና ዶሶን ዎይኮ ጬቀትያ ሀዳ አሞን እስባካ ኦፍተ። ሽን ህንተ እሶይ እሱዋፈ ግታታይስ ያግድ ቆፖና ህንተና ካዉሽተ።

⁴ ህንተ እሶይ እሶይ፥ ሀራ አስ ማድያባ ኮይተፐ አትሽን፥ ህንተና ማድያባ ፃላላ ኮዮፕተ።

⁵ ክርስቶስ የሱሳን ደእያ ቆፋይ ህንተናን ዳናዉ በሴስ።

⁶ እያዉ ኡባ ዎደ ፆሳ ሀኖት ደኤስ። ግዶሽን፥ እያ ፆሳራ እስኖ ኦያ ሀኖታ፥ ዎልቃን ኤካናዉ ኮይቤና።

⁷ ግዶሽን፥ እ ባዉ ደእያ ቦንቹዋ ኡባ አግድ፥ አይለ መታ ኤክስ፤ አሰ ዳንድ ቆንጭስ።

⁸ እ ባና ካዉሽስ፤ ሀይቃና ጋካናዉ፥ ሀር አቶሽን ማስቃልያ ቦላ ሀይቃናዉ ኪተትስ።

⁹ ሄሳ ግሾ፥ ፆሳይ እያ ዳሮ ቁ ቁ ኦስ፤ ቃስ ሱን ኡባፈካ አያ ቃ ሱን እሚስ።

¹⁰ ሳሎንነ ሳአን፥ ሳአፐ ጋርሳን ደእያ ኡባይ፥ የሱሳ ሱን ቦንቹዋስ ጉልባታና።

¹¹ አሳ ኡባይ ባንታ እንፃርሳን፥ የሱስ ክርስቶሳ ጎዳ ያግድ፥ ፆሳ አዋ ቦንቹዋስ ማርካታና።

አላመስ ፖኦ ግዶ

¹² ታ እሻቶ፥ ታኒ ህንተራ ደእያ ዎደ ኡባን ህንተ ኪተትዳይሳዳ፥ ሀእ ታኒ ህንተ ማታፐ ሃክንካ፥ ካሰይሳፈ አድ፥ ኪተታናዉ በሴስ። ፆሳስ ያሻንነ ኮኮርሳን ህንተ አቶተ ፖላናዉ ኦተ።

¹³ ፆሳይ፥ ህንተ እያዉ ኤሮ ግድ ኪተታና መላ ኡባ ዎደ ህንተ ግዶን ኦስ።

¹⁴ አይ ኦሶ ኦሸካ ዙዙሞና ዎይኮ ፓላሞና ኦተ።

¹⁵ ጌላነ ናጋራንቾ አሳ ግዶን ቦረቶናይሳታ፥ ጌሻታነ ፖኮይ ባይና ፆሳ ናይታዳ ግድተ። ህንተ ኤንታ ግዶን ሳሎ ፆልንቶዳ ፖእሸ፥

¹⁶ ደኦ እምያ ኪታ ኤንታዉ ኦድተ። ሄ ዎደ ታ ዳቡርሳይነ ታ ኦሶይ መላ አትቦና ግሾ፥ ክርስቶስ ያ ጋላስ ታ ህንተናን ጬቀታና።

¹⁷ ህንተ ፆሳስ እምያ አማኖ እሞታ ቦላ ታ ሱይ ኡሻ ያርሾዳ ጉክኮካ ታና ኡፋይሴስ። ህንተካ ታራ ኡፋይታና።

¹⁸ ሄሳዳ ህንተካ ኡፋይትድ ታናካ ኡፋይሳናዉ በሴስ።

ፅሞትዮሳነ ኤጳፍራድቱሳ

¹⁹ ታኒ ህንተ ደኡዋባ ስአዳ ኡፋይታናዉ ፅሞትዮሳ ህንተኮ ኤለሳዳ የዳና መላ ጎዳ የሱሲ ታና ማዳናይሳ አማነታይስ።

²⁰ ህንተ ደኡዋስ ዎዛናፐ ቆፕያ እያ መላ አስ ሀር ኦንካ ባዋ።

²¹ ሀራት ባንታና ጎእያባ ኮዮሶናፐ አትሽን፥ የሱስ ክርስቶሲ ኮያባ ኦኮና።

²² እ ታራ እስፈ ግድድ ናእ ባ አዋስ ኦይሳዳ ዎንገላ ኦሶ ኦዳይሳነ አማነትያ አስ ግደይሳ ህንተ ኤሬታ።

²³ ሄሳ ግሾ፥ ታባይ ሀንያባ በአዳ ኤለሳዳ እያ ህንተኮ የዳና ጋዳ ቆፓይስ።

²⁴ ታኒ፥ ታ ሁጰን ማታ ዎደን ህንተኮ ባናይሳ ጎዳን አማነታይስ።

²⁵ ሄሳዳካ፥ ታኒ፥ ታ እሻ ኤጳፍራድቱሳ፥ ታራ እስፈ ታ ባጋ ግድድ ኦዳይሳ፥ ኦለትዳይሳነ፥ ታና ማዳናዉ ህንተዉ ኪተትዳይሳ፥ ህንተኮ ኪታናዉ ቆፓስ።

²⁶ እ ህንተና ኡባ በአናዉ ዳሮ ላሞቴስ። ቃስ እ ሀርገትዳይሳ ህንተ ስእዳ ግሾ፥ ባ ዎዛናን ዳሮ ኡንኤትስ።

²⁷ እ ቱማ ሀርገትድ፥ ሀይቅ ክችድ አትስ። ሽን ፆሳይ እያዉ ቃትስ። እያ ፃላላስ ግዶናሽን፥ አዛኖይ አዛኖ ቦላ ጉዠቶናዳ ታዉካ ቃትስ።

²⁸ ህዛ፥ ህንተ እያ ዛር በእድ ኡፋይታናዳ ታዉካ ታ ዎዛና ሴላይ እርፃናዳ ታኒ እያ ኤለሳዳ ህንተኮ የዳናዉ አሞታይስ።

²⁹ ጎዳስ ሀጋዝያ አሳዳ እያ ኩመ ኡፋይሳን ሞክተ። ቃስ እያ መላ አሳ ኡባ ቦንችተ።

³⁰ ህንተ ታ ማታን ግድድ ኦናዉ ዳንዳኦና ማድያ ማድድ ክርስቶሳ ኦሱዋ ግሾ፥ ባ ሸምፑዋስ ምሸቶና እፅድ ሀይቅ ክችድ አትስ።