ፍልጵስዩሳ 1 - ጌሻ ማፃፋ

¹ ክርስቶስ የሱሳራ እስፍዳ ግሾ፥ ፆሳባ ግድዳ፥ ፍልጵስዩሳ ካታማን ደእያ ዎሳ ኬ ጭማታስነ ዳቆነታ ኡባስ። የሱስ ክርስቶሳ አይለ ግድዳ፥ ጳዉሎሳፐነ ፅሞትዮሳፐ ኪተትዳ ኪታ።

² ኑ አዋ ፆሳፈነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።

ጳዉሎሳ ጋላታ ዎሳ

³ ታኒ ህንተና ቆፕያ ዎደ ኡባን፥ ታ ፆሳ ጋላታይስ።

⁴ ታኒ ህንተ ኡባስ ፆሳ ዎስያ ዎደ ኡፋይሳን ዎሳይስ።

⁵ ህንተ ኮይሮ ጋላሳፐ ሀእ ጋካናዉ፥ ዎንገላ ማርካተይሳን ታራ እስፈ ግድድ፥ ታና ማድዳ ግሾ፥ ፆሳ ጋላታይስ።

⁶ ህንተ ግዶን ሎኦ ኦሶ ዶምዳ ፆሳይ፥ ክርስቶስ የሱሲ ስምያ ጋላሳይ ጋካናዉ፥ ፖላናይሳ ኤራይስ።

⁷ ህንተ ኡባ ዎደ ታ ዎዛናን ደኤታ። ታኒ ኡባ ዎደካ ሄሳዳ ቆፓናዉ በሴስ። ሀእ ታኒ ቃሾን ደአሸነ ቃሸታናፐ ስን ዎንገላ ናጎንነ ዎንገላ ምን ኤሶን ፆሳይ ታዉ ቃድዳ ቃዳ ህንተካ ታራ ሻከትደታ።

⁸ ታኒ ህንተና ኡባ ክርስቶስ የሱሳ ሲቁዋን አይ መላ ላሞትያኮ ፆሳይ ታዉ ማርካ።

⁹ ህንተ ሲቆይ ቱማ ኤራተራነ አኬካራ እስፈ ጉጅ ጉጅ ድጫና መላ ፆሳ ዎሳይስ።

¹⁰ ሄሳን ህንተ ሎኦባ ሻክድ፥ ዶረይሳታ፥ ክርስቶስ ስምያ ጋላሳን ጌሻታነ ቦረቶናይሳታ ግዳና።

¹¹ ህንተ ደኦይ ፆሳ ቦንቹዋስነ ጋላታስ የሱስ ክርስቶሳ ባጋራ በንትያ ፅሎተ አይፍያን ኩምድ አይፋና።

ጳዉሎሳ ቃሾይ ዎንገላ ዳልግስስ

¹² ታ እሻቶ፥ ታና ጋክዳ ኡባይ ዎንገላይ ዳልጋና መላ ቱማ ማድዳይሳ ህንተ ኤራና መላ ኮያይስ።

¹³ ታኒ ክርስቶሳ ግሾ ቃሸትዳይሳ፥ ካዎ ጋ ናገይሳትነ ሀይሳን ደእያ ሀራት ኡባይ ኤሮሶና።

¹⁴ ታ ቃሹዋ ጋሶን ኑ እሻታፐ ዳሮት ጎዳን ኬህ አማነትዶሶና። ሄሳ ግሾ፥ ፆሳ ቃላ ያሽ ባይና ካሰፐ ምንድ ኦዳና መላ ምኖተ ደምዶሶና።

¹⁵ ግዶሽን፥ እሶት እሶት ቃናተንነ ፓላማን ክርስቶሳባ ኦዶሶና፥ ሽን ሀራት ሱረ ዎዛናፐ ኦዶሶና።

¹⁶ ሱረ ዎዛናፐ ኦደይሳት፥ ፆሳይ ታዉ ዎንገላ ናጋና መላ ሀዳራ እምዳይሳ ኤርያ ግሾ፥ ሲቆን ኦዶሶና።

¹⁷ ሽን ታና ቃናተይሳት ታ ቃሹዋ ቦላ ሀራ መቶ ኤሀናባ ኤንታዉ ዳንን ባንታና ዶስድ ክርስቶሳባ ኦዶሶናፐ አትሽን፥ ቱማ ዎዛናፐ ኦዶኮና።

¹⁸ ሄስ አይኮካ መተና። ቱማ ኦገን ግድን ዎይኮ ዎርዶ ኦገን ግድን ሄ ኡባን ክርስቶስ ሳባከቴስ። ታና ሄስ ኡፋይሴስ። ቃስ ሀራባይ ታና ኡፋይስያባይ፥

¹⁹ ታኒ ህንተ ዎሳንነ የሱስ ክርስቶሳ አያና ማዱዋን አታናይሳ ኤርያ ግሾ ታና ኡፋይሴስ።

²⁰ ታ ግታ አሞይነ ኡፋይሳን ናግያ ናጎይ ታ ዬላቶና አታናይሳ። ሽን ኡባ ዎደ ኦይሳዳ፥ ሀእካ ታኒ ፓፃ ደእን ዎይኮ ሀይቅን ያዮና ታ ኩመ አሳተን ክርስቶስ ቦንቸታና ጋዳ ምኖተን ኦዳይስ።

²¹ ታ ደእኮካ ክርስቶሳ ፃላላስ ደአይስ፤ ቃስ ታ ሀይቅኮካ ታዉ አዳ ዎ።

²² ሽን ታ ፓፃ ደእኮ አይፈይ ደእያ ኦሶ ኦና። ሽን ፓፃ ደኤይሳፈነ ሀይቆፐ አዉሳ ዶራነኮ ታዉ ኤረተና።

²³ ታኒ ሀ ናምአታፐ አዉሳ ዶራነኮ ኡንኤታስ። ሀ ደኡዋፐ ሻከታዳ ክርስቶሳራ እስፈ ዳናዉ አሞታይስ፤ ክርስቶሳራ እስፈ ደኤይስ ኡባፈ አዳ ሎኦ።

²⁴ ሽን ታኒ ህንተ ግሾ ፓፃ ደኤይስ ህንተዉ ዳሮ ኮሽያባ።

²⁵ ሄሳ ታኒ ጌሻዳ ኤራይስ፤ ታኒ፥ ህንተ አማኖን ድጫናዳነ ኡፋይታናዳ ህንተራ ፓፃ ዳና።

²⁶ ሄሳ ግሾ፥ ታኒ ህንተኮ ስማዳ ያ ዎደ፥ ክርስቶስ የሱሳራ ህንተ ደእያ ደኡዋን ታናን ደእያ ጬቀተይ ህንተዉ ዳራና።

²⁷ ኡባፈ አድ፥ ህንተ ክርስቶሳ ዎንገላስ ቦንቾ ኤህያ ደኦ ደእተ። ታ ህንተና በእን ዎይኮ በኦና እፅን፥ ህንተ እስ ቆፋን ምን ኤቅድ፥ ሀራት ዎንገላን አማናና መላ እስ ዎዛናን ግድድ እስፈ ባፀተይሳ ታ ስአና።

²⁸ ህንተ ሞርከታስ ያዮፍተ። ኤንቲ ህንተራ ኤቀትያባ ግድኮ ሄስ ህንተዉ አቶተስ፥ ኤንታዉ ዮስ ፆሳፈ ግድዳ ማላ።

²⁹ ክርስቶሳስ ኦያ ቃዳይ ህንተዉ እመትዳይ፥ ህንተ እያ አማናና መላ ፃላላ ግዶናሽን ህንተ እያ ግሾ መቶ ኤካና መላሳ።

³⁰ ሄሳ ግሾ፥ ህንተ ታ ዋይያ ካሰ በእደታ፤ ሀእካ ታ ዋየተይሳ ስኤታ። ህንተካ ታ ዋይያ መላ ዋየተታ።