1Yòhanɛ̀s 1 - GƐ̃GBE BIBLIA 2014

Àgbè be ènyà

¹ Mi le ŋlɔ̀ xoma kèa ɖoɖa mì, so ènyà kè nana àgbè, eye be lè, so gɔ̃mè jèje a ŋuti. E pò nupo, eye mi sè è; mi kpɔ ɛ̀ ku miabe ŋùkuviwo, eye miabe àlɔ̀wo cã tɔ ɛ̀!

² Ekè àgbè ŋua vaa, mi kpɔ ɛ̀. Ye ŋuti mi le pò nupo so e ŋuti na mì. Eye mi le do àgbè màvɔ kè lè Àta gbɔ, eye wo ɖè fiɔ mia be àŋɛ̀ na mì.

³ Ènu kè mi kpɔ, eye mi sè a, mi le do yebe àŋɛ̀ na mìa cã, ne mìa wɔ̀ ɖèka ku mi. Đèkawɔ̀wɔ kèa ye mi ɖo ku Àta, kudo èvia Yesù Kristò.

⁴ Mi le ŋlɔ̀ xoma kèa ɖoɖa mì, ne miabe jìjɔ̀ɛ a ne ɖù blibo.

Mawu nyi kɔ̀kɔ̀ɛ

⁵ Ènyà kè mi sè so Èvia gbɔa, Èvia kè be àŋɛ̀ mi le do na mìa ye nyi ekè: Mawu nyi kɔ̀kɔ̀ɛ eye vìvìti ɖekpe mu lè e mè ò.

⁶ Ne mi gblɔ̃ be mi wɔ̀ ɖèka ku ì, eye mi gbà lè zɔ̃ lè vìvìti mè kpò ye à, eŋuã miabe ènyàgbɔ̃gblɔ̃ ku wɔ̀na nyi àjè.

⁷ Vɔ̀ ne mi lè àgbè lè kɔ̀kɔ̀ɛ mè, sìgbè àlekè Mawu ŋutɔ lè kɔ̀kɔ̀ɛ mèa nènea, mi lè ɖèkawɔ̀wɔ mè ku mia nɔ̀nɔwo, eye Yesù, Èvia be èhũ lè mi ɖì so èvuɛ̃ keŋu mè.

⁸ Ne mi gblɔ̃ be mi mu ɖo èvuɛ̃ òa, mi blè mia ɖokoewo, eye nyàwo mu lè mia mè ò.

⁹ Vɔ̀ ne mi hũ miabe èvuɛ̃wo mè na Mawu a, e la wɔ̀ ɖo yebe fìãfìã ku ènu kè jè a ji na mi, la sɔ miabe èvuɛ̃wo kè mi, la lè mi ɖì, ɖo ànùkuame ku àmè jɔ̀jɔɛ ye be nyi.

¹⁰ Ne mi gblɔ̃ be mi mu wɔ̀nà èvuɛ̃ òa, mi do Mawu àjèɖàtɔ, eye yebe ènyàa mu lè mia mè ò.