MATTHIEU 1 - Kalata Ko SƆ̧ DC

Tugun pɛ́r-nàm ko Jesu

¹ Tugun pɛ́r-nàm ko Jesu Krist, bem ko David, bem ko Abraham nɛ́ mɔ'ɔ:

² Abraham koo Izak, Izak koo Jakob, ɓɛɛ Jakob ko Juda in o nya-a̧.

³ Juda koo Farɛs in Zara, nàà kɔ-wa nɛ́ Tamar. Farɛs koo Ɛsrɔm, ɓɛɛ Ɛsrɔm ko Aram.

⁴ Aram koo Aminadab, Aminadab koo Nasɔŋ, ɓɛɛ Nasɔŋ ko Salmɔŋ.

⁵ Salmɔŋ koo Boaz, nàà kɔ̧-a̧ nɛ́ Rahab, ɓɛɛ Boaz ko Obɛd, nàà kɔ̧-a̧ nɛ́ Ruth, ɓɛɛ Obɛd ko Jɛse.

⁶ Nɛ́ mɔ'ɔ nɛ̀ Jɛse koo wannu David. David baa kóò ko Urii ko nɛ̀ Salomɔŋ.

⁷ Salomɔŋ koo Roboam, Roboam koo Abia, ɓɛɛ Abia ko Asa.

⁸ Asa koo Jozafat, Jozafat koo Yoram, ɓɛɛ Yoram ko Ozias.

⁹ Ozias koo Joatam, Joatam koo Ahaz, ɓɛɛ Ahaz ko Ezɛkias.

¹⁰ Ezɛkias koo Manase, Manase koo Amɔŋ, ɓɛɛ Amɔŋ ko Jozias.

¹¹ Jozias koo Jekonias in o nya-a̧, ŋgimbi nɛ wa kaia nɛ̀ wa nɛ̀ bara si Babilɔŋ mɛ.

¹² Ŋgimbi nɛ wa kaia wa si Babilɔŋ kaɗi, Jekonias koo Salatiɛl, ɓɛɛ Salatiɛl ko Zorobabɛl.

¹³ Zorobabɛl koo Abiud, Abiud koo Eliakim, ɓɛɛ Eliakim ko Azɔr.

¹⁴ Azɔr koo Sadɔk, Sadɔk koo Akim, ɓɛɛ Akim ko Eliud.

¹⁵ Eliud koo Eleazar, Eleazar koo Matan, ɓɛɛ Matan ko Jakob.

¹⁶ Nɛ́ mɔ'ɔ nɛ̀ Jakob koo Jozɛf, wíì ko Marii, ɓɛɛ Marii ko Jesu nɛ̀‘i sa'e Mɛsii.

¹⁷ Tɛ́ Abraham hɔ nɛnɛ tɛ David, o bezaŋ nɛ̀ gboo ɗoŋ ŋmaa dee nɛ́ ɓu-zua-naar; tɛ́ David hɔ nɛnɛ ŋgimbi nɛ wa kaia nɛ̀ wa nɛ̀ bara-biro si Babilɔŋ, o bezaŋ dee nɛ́ ɓu-zua-naar; ɓɛɛ tɛ̀ kaia wa si Babilɔŋ hɔ nɛnɛ tɛ Mɛsii, o bezaŋ dee nɛ́ ɓu-zua-naar mbɛt.

Marii baa zaŋ Jesu

¹⁸ Wen koa Jesu Krist nɛ́ mɔ'ɔ. Marii nàà kɔ̧-a̧ duka so nɛ́ kóò nɛ̀ Jozɛf hara, ɓɛɛ nɛti ha̧ wa mɛ ba ŋmaa, Marii baa zaŋ nɛ̀ ŋgai ko Sa̧a̧ Ɔmi.

¹⁹ Wíì kɔ̧-a̧ Jozɛf duka so nɛ́ ŋma wi-de-mɔ nɛ̀ yuwar-a nɛ̀ kɔ̧ mɛ gbar a̧ ha̧ bíí mɛ iŋ na, ɓɛɛ a̧ ta mɔ mɛ bɛ̧ a̧ nɛ̀ hu̧sa̧-a̧.

²⁰ Ŋgimbi n'aa a̧a̧ tɛ taa mɔ hegɔ, ŋma betom ko Gasa Wan hɔɔ zu ha̧ a̧, ɓɛɛ tɔ̧ ha̧ a̧: «Jozɛf, bem ko David, ká mɛ́ dé kíì baa Marii nɛ̀ kóò na, wen zaŋ nɛ̀ duk tɛ-a'i, a̧ baa nɛ̀ ŋgai ko Sa̧a̧ Ɔmi.

²¹ A̧ tɛ́ ko nɛ̀ be-wiwii, ɓɛɛ mɛ tɛ a nin-a'e Jesu; wen mɛ̀ nɛ́ a̧ a̧ tɛ kpasi dukbíí kɔ̧-a̧ tɛ ɗaŋmɔ kɔ-wa.»

²² Ɓɛɛ mɔ‘i lɛŋ hɔa ha̧ wen nɛ̀ Gasa Wan tɔ̧ɔ̧ so nɛ̀ nú wi-tɔ̧-wen oi nú Sɔ̧ mɛ hɔ gba̧a̧:

²³ «Ŋma be-zɔŋa tɛ́ ba zaŋ, a̧ tɛ ko nɛ̀ be-wiwii, ɓɛɛ wa tɛ a nin bem’ɛi nɛ́ Emanuɛl.» (Nɛ́ wen nɛ̀ tɔ̧, «Sɔ̧ a̧a̧ in yɛɛ».)

²⁴ Ɗoŋ nɛ Jozɛf tuna, a̧ dee hee mɔ'ɔ nɛ̀ betom ko Gasa Wan tɔ̧ɔ̧ ha̧ a̧ ga. A̧ mgbɔɔ Marii si tɛ kɔ̧-a̧,

²⁵ ɓɛɛ a̧ iŋ a̧ na hegɔɔ hɔ wese nɛ̀ Marii koo nɛ̀ be-wiwii, ɓɛɛ Jozɛf a nin bem’ɛi'e Jesu.