FILEMƆŊ 1 - Kalata Ko SƆ̧ DC

Fanamɔ

¹ Nɛ́ mi Paul nɛ̀ yee zɔɓɔ wen zu Jesu Krist, in nya-wi Timotee, a̧ tom kalata’ɛ ha̧ Filemɔŋ, gbama wi-de-tom k’ɛ́ɛ́, n’ɛ̀ɛ̀ kɔ̧ɔ̧ nyɛmna,

² in ha̧ boko-nya yɛ Apia, ha̧ gbama-wi-biro in yɛɛ, Arkip, in ha̧ zuduk bíí ko Krist nɛ̀ mɔi̧ kɔ̧ tua kɔ-mɛ.

³ Deemɔ nɛ̀ ta-tɛ in ga̧a̧mɔ ko Dáà k’ɛ́ɛ́ Sɔ̧ in ko Gasa Wan Jesu Krist a̧ dúk in'nɛ̀ɛ́.

Kɔ̧ɔ̧mɔ in kɔ̧ɔ̧ɗɔɔwen ko Filemɔŋ

⁴ Mi sa nin mɛ́ tɛ̀ kɔfa-sɔ̧ kɔ‘m de nɛ̀ osoko ɓɔnsɛnɛ,

⁵ wen mi zia nyɛrɛ kɔ̧ɔ̧ɗɔɔwen kɔ-mɛ wen Gasa Wan Jesu, in kɔ̧ɔ̧mɔ nɛ̀ mɛ usi ha̧ o sa̧a̧-bíí lɛŋ.

⁶ Kɔfa-sɔ̧ kɔ‘m mɛ̀ nɛ́ wen ha̧ duka-a kɔ-mɛ kpɔk in yɛɛ sɛn tɛ kɔ̧ɔ̧ɗɔɔwen mɛ́ duk nɛ́ kpasamɔ, wen há̧ o bíí lɛŋ mɛ́ zɔk o demɔ lɛŋ n’ɛ̀ɛ̀ kpa zaŋ duka-a k’ɛ́ɛ́ ín Krist.

⁷ Nya'm, mi kpaa desee nyɛmna, see-am ga̧a̧ mbɛt tɛ̀ zia nyɛrɛ kɔ̧ɔ̧mɔ kɔ-mɛ; o sa̧a̧-bíí ko Sɔ̧ lɛŋ kpaa nɔɔ-ŋgiɗi wen zu mɔ nɛ̀ mɛ́ dee in wa.

Aka ŋma mɔ wen zu Onesim

⁸ Mi a̧a̧ nɛ̀ ŋgai nɛ̀ ɗoŋ Krist mɛ́ yɔr mɔ nɛ̀ mɛ tɛ de,

⁹ ɓɛɛ nɛ́ kɔ̧ɔ̧mɔ a̧‘m kɔ̧ɔ̧ mɛ́ tɔ̧ nɛ̀ wen'i ha̧ mɛ́. Nɛ́ mi Paul, gbɛrɛ nɛ̀ duk kɔ̧ zɔɓɔ kinii wen zu Jesu Krist, a̧ tom kalata’ɛ.

¹⁰ Mi ai nú ha̧ mɛ́ wen zu Onesim, bem kɔ‘m n'am koo so tɛ Krist kɔ̧ zɔɓɔ.

¹¹ Nɛti ŋma mɔ n'aa dee ha̧ mɛ, bo na; ɓɛɛ kinii, a̧ tɛ́ gbak mɛ́ in am mbɛt.

¹² Onesim nɛ́ mgbák wi nɛ̀ duk yí see-am, ɓɛɛ mi tom nɛ́ a̧ si ɗoŋ ha̧ mɛ.

¹³ Mi kɔ̧ɔ̧ so mɛ́ dor a̧, ha̧ a̧ mɛ́ gbak am oi nú mɛ́ zaŋ zɔɓɔ De Mbe Wen n'am duk sɛnɛ'ɛ;

¹⁴ mi kɔ̧ mɛ́ yak zu mɛ́ de nɛ̀ ŋma demɔ na, wen ká deemɔ‘i tɛɛ duk zu mɛ́ hee ŋma mɔɔ-ŋgai ga; ɓɛɛ nɛ́ mɔ nɛ̀ mɛ́ tɛ́ kɔ̧ ɛ̧.

¹⁵ Ŋmafara nɛ́ be ŋgimbi tikiɗi a̧ Onesim yuu nɛnɛ katɛ mɛ, ha̧ mɛ mɛ kpa a̧ woyo kpoo nɛ kpoo.

¹⁶ Bó nɛ́ duka-a hee bara ga ɓɔna, ɓɛɛ nɛ́ duka-a nɛ̀ tɛ́ de gan ko bara: a̧ nɛ́ nya yɛ n’ɛ̀ɛ̀ kɔ̧ɔ̧ nyɛmna. War kɔ‘m mi kɔ̧ɔ̧ a̧ nyɛmna, ɓɛɛ war kɔ-mɛ tɛ́ gan kɔ‘m, tɛ̀ zɔka a̧ hee bara ga, in hee nya-wi nɛ̀ ɗoŋ Krist ga.

¹⁷ Kà mɛ̀ nɛ́ kpɛka'm hee nya-mɛ ga nɛ̀ ɗoŋ kɔ̧ɔ̧ɗɔɔwen, ɓɛɛ mɛ̀ kpɛ́k a̧ hee mi ga.

¹⁸ Ɓɛɛ kà a̧ nɛ́ dee ŋma ɗaŋmɔ in mɛ̀ɛ́ nɛti, kóó ŋma nyamandoi kɔ-mɛ nɛ́ ɓɔna zu a̧, nɛ̀ mɛ̀ é zu'm.

¹⁹ Nɛ́ mi Paul a̧ yɔr wen’ɛ nɛ̀ er-am ha̧ mɛ́‘e ndé, mi tɛ gbo nyamandoi'i, ɓɛɛ mi beka tɔ̧ war kɔ‘m nɛ̀ duk zu mɛ‘i na: nyamandoi'i nɛ́ kiitɛ-mɛ nɛ̀ zu-mɛ.

²⁰ Nya'm, mɛ̀ dé mɔ n'am aka'i ha̧‘m nɛ̀ ɗoŋ Gasa Wan; mɛ̀ há̧ nɔɔ-ŋgiɗi ha̧ see-am tɛ Krist.

²¹ Mi yɔr kalata’ɛ ha̧ mɛ́ wen mi iŋa mboozu kɔ-mɛ, ɓɛɛ mi iŋa'e mɛ́ tɛ́ de mɔ gan zu mɔ n'am aka'i.

²² Mɛ̀ ɗáfí ŋma tua-ɔɔ ha̧‘m mbɛt, wen mi taa, wa tɛ́ gbo'm ha̧‘m mɛ́ si ɗoŋ tɛ‘nɛ́, wen zu kɔfa-sɔ̧ k’ɛ́nɛ́.

Sɔŋkur fanamɔ

²³ Epafras, sɛm kɔ‘m n’ɛ̀ɛ̀ de zɔɓɔ in ŋmaa wen zu Jesu Krist, fana mɛ́;

²⁴ o gbama wi-de-tom kɔ‘m Mark, Aristark, Demas, in Luk fana mɛ́ mbɛt.

²⁵ Deemɔ nɛ̀ ta-tɛ ko Gasa Wan Jesu Krist a̧ dúk in'nɛ̀ɛ́.