EKLEZIASTƐ 1 - Kalata Ko SƆ̧ DC

Zaŋnu nɛ́ geemɔ

¹ Wen nɛ wi-iŋ-mgbara-mɔ Ekleziastɛ, bem ko David nɛ ɔɔ so wan Jerusalɛm tɔ̧ɔ̧ nɛ mɔ'ɔ:

² Ŋma mɔ bo na! Mɔ lɛŋ nɛ́ geemɔ.

³ Tom nɛ bíí de ɗɔɔ yiwese’ɛ lɛŋ, nɛ́ ge a̧ a̧ kpa oi-aa ge?

⁴ Pɛ duka-a ko o bíí yak ɓɛɛ wi koo o mbe bíí a oi wa woyo; mɔ kpɔk, nù duk kɔ‘i kpoo nɛ kpoo.

⁵ Wese daŋ ɓɛɛ yea; kà a̧ ye kaɗi, a̧ sii ɗoŋ nɛ haya-a si fara n'aa daŋ nɛnɛ‘i.

⁶ Búk yu si ká̧-zan-mɛ́-ɗɔɔ, ɓɛɛ zika si ká̧-zan-mɛ́-ŋgɔn; búk ɓoɓi, yaka, ɓɛɛ zika pii ɗoŋ.

⁷ Nana-yì lɛŋ fok si ɗɔɔ gba-tɔp, ɓɛɛ gba-tɔp dun na mbɛt. Nana-yì fok kana nɛ́ foka-a si kpɔk fara.

⁸ Wen nɛ‘i tɔ̧, dee gba̧‘a̧ mɔ kaɗi, wi kɔ̧ tɔ̧a̧-a̧ ɓɔna; mɔ nɛ yí-wi zɔka sur yí-wi na, mɔ nɛ zer-wi zia nyɛm a̧ na mbɛt.

⁹ Mɔ nɛ duka so nɛti kaɗi, nɛ́ kpɔk mɔ‘i a̧ tɛ duk woyo. Mɔ nɛ dee so nɛti kaɗi, nɛ́ mɔ‘i a̧ tɛ de kana woyo. Ŋma mbe mɔ beka de woyo ɗɔɔ yiwese na.

¹⁰ Kà ŋma mɔ nɛ́ dea, ɓɛɛ kà bíí tɔ̧: «Mɛ̀ zɔ́k mɔ'ɔ nɛ́ mbe mɔ!» wó, mɔ‘i bó nɛ́ mbe mɔ na. Mɔ‘i duka so kɔ‘i nɛti, ɓɛɛ ká wa tɛ ko ɛɛ hɔ̧ɔ̧ na.

¹¹ Tɛ-wi mbaŋ ɗoŋ gba̧‘a̧ mɔ na; mɔ nɛ tɛ hɔ woyo'i, tɛ o bíí mɛ ɗoŋ beka mbaŋ ɗoŋ-aa ɓɔna mbɛt.

Kia mɔ ko wi-iŋ-mgbara-mɔ

¹² Mi Ekleziastɛ, mi ɔɔ so wan Israɛl sɛn Jerusalɛm.

¹³ Mi ee see-am tɛ kia-a mɛ iŋ mɔ lɛŋ nɛ dee ɗɔɔ yiwese’ɛ tɛ iŋa-mgbara-mɔ kɔ‘m; nɛ mbetɛ Sɔ̧ ha̧a̧ nɛ́ tom bɔnɛ ha̧ o bezaŋ Adam mɛ de!

¹⁴ Mi zɔka mɔ nɛ yak ɗɔɔ yiwese’ɛ lɛŋ, ɓɛɛ mɔ lɛŋ nɛ́ geemɔ, nɛ́ géé ndaka ɗoŋ búk sɔɔ géè.

¹⁵ Mɔ nɛ gɔɔ kaɗi, bíí beka nyafi tan ɓɔna; mɔ nɛ bo na, wi beka tɔr na.

¹⁶ Mi taa mɔ: «Ho! Iŋa-mgbara-mɔ kɔ‘m gana taamɔ ko o wi nɛ ɔɔ so wan sɛn Jerusalɛm nɛti ha̧‘m lɛŋ. Mi kia mgbara iŋa-mgbara-mɔ in iŋamɔ batɛ.»

¹⁷ Mi kia ha̧‘m mɛ iŋ mgbara iŋa-mgbara-mɔ in mgbélé mɔ, in ha̧‘m mɛ iŋ mgbara iŋa-mgbara-mɔ in bɔkɔ. Ɓɛɛ kia mɔ kɔ‘m lɛŋ nɛ́ geemɔ, nɛ́ géé ndaka ɗoŋ búk sɔɔ géè.

¹⁸ Iŋa-mgbara-mɔ batɛ ba nɛ gasa ɗaŋsee tɛnɛ; wi nɛ̀ kíí mɛ iŋ mɔ batɛ de ha̧ see-aa mɛ ɗaŋ batɛ mbɛt.