AGEE 1 - Kalata Ko SƆ̧ DC

Tɔ̧ɔ̧-wen ko Sɔ̧ zu dee Tua kɔ̧-a̧ woyo

¹ Darius ɔɔ wan dee pɛ yiitoo, ɓɛɛ tɛ kuti wese zaŋ mɔɔrɔ-ɗoŋ-kpɔk fio-zɛ, Sɔ̧ toma Agee wi-tɔ̧-wen oi nú Sɔ̧ ha̧ Zorobabɛl, gasawi nù Juda, bem ko Saltiɛl. Agee tɛ tɔ̧ gba̧a̧ tom'i ha̧ gasa wan-ɗafi-sɔ̧ Josue bem ko Yosedɛk mbɛt. Gba̧a̧ wen'i a̧a̧:

² «Ɛ̀nɛ̀ zíí wen nɛ GASA WAN nɛ a̧a̧ nɛ ŋgayamɔ lɛŋ tɛ tɔ̧‘i: O bíí nɔ'ɔ hee nde, ŋgimbi dee Tua ko GASA WAN woyo tɛ hɔ hɔ̧ɔ̧ na.»

³ Nɛ́ mɔ'ɔ nɛ Agee wee ɗoŋ wen nɛ GASA WAN toma nɛ a̧‘i ha̧ wa hegɔ:

⁴ «Ɛ́nɛ́ dúk k’ɛ́nɛ́ kɔ̧ de tua, ɓɛɛ nɛ mɔ'ɔ nɛ Tua ko GASA WAN ɓɔna kɔ‘i nɛ ɗaŋ-a’ɛ nde?»

⁵ GASA WAN nɛ a̧a̧ nɛ ŋgayamɔ lɛŋ tɔ̧a̧: «Kinii, ɛ̀nɛ̀ tá mɔ zu mɔ nɛ de in'nɛ̀ɛ́.

⁶ Ɛnɛ guna nyɔnɔ nɛ dɔka-a, ɓɛɛ nyɔnɔ dɛm na; ɛnɛ nyɔŋ mɔ nyɔŋ, ɓɛɛ zaŋ‘nɛ́ sur na; ɛnɛ nɔ dɔ̧ɔ̧ nɔɔ, ɓɛɛ tɛ‘nɛ́ hai sɛnɛ na; ɛnɛ pi̧ laa pi̧i̧, ɓɛɛ tɛ‘nɛ́ ba wee na; o wi-de-tom a̧ ba mbɔi'i, ɓɛɛ mbɔi'i duk er-wa na.»

⁷ GASA WAN nɛ a̧a̧ nɛ ŋgayamɔ lɛŋ tɔ̧a̧: «Ɛ̀nɛ̀ tá mɔ zu mɔ nɛ de in'nɛ̀ɛ́‘i.

⁸ Ɛ̀nɛ̀ nɛ́ si zu kaya, ɛ̀nɛ̀ gɔ́m te piinɛ, ɛ̀nɛ̀ ɗáfí Tua kɔ‘m woyo. Mi tɛ kpa desee, ɓɛɛ gasamɔ kɔ‘m tɛ duk hi̧i̧. GASA WAN tɔ̧ɔ̧ hegɔ.

⁹ «Ɛnɛ taa so mɛ mɔi̧ nyɔnɔ nɛ dɔka-a, ɓɛɛ dɔk na. Ŋgimbi n’ɛnɛ kaia nyɔnɔ siɗoŋ, mi ufa a taŋ. Ɛnɛ ta k’ɛ́nɛ́‘e nɛ́ wen ge? Mɛ nɛ wen Tua kɔ‘m nɛ gbɔsa, ɓɛɛ war k’ɛ́nɛ́, kóó o nde ta nɛ wen tua kɔ‘i ɓɛɛ. Nɛ GASA WAN nɛ a̧a̧ nɛ ŋgayamɔ lɛŋ a̧ tɔ̧ wen’ɛ.

¹⁰ Mɛ̀ nɛ́ hegɔ sa'm dor kórò ká tɛɛ hɔ a zu nyɔnɔ k’ɛ́nɛ́, ɓɛɛ nù dɛm nyɔnɔ na.

¹¹ Mi dee ha̧ kaara mɛ yor zu nù, in zu o kaya, zu alkamaari, zu fɔ nyak-dɔ̧ɔ̧, zu fɔ te-nɔ̧́ in zu mɔ lɛŋ nɛ nù dɛm, zu o bíí, zu o saɗi in zu tom k’ɛ́nɛ́ lɛŋ.»

Mboozu ko o bíí ha̧ Sɔ̧

¹² Zorobabɛl, bem ko Saltiɛl, in gasa wan-ɗafi-sɔ̧ Josue, bem ko Yosedɛk in oi dukbíí lɛŋ zia wen ko GASA WAN Sɔ̧ kɔ-wa, wa mboo zu tɛ wen nɛ Agee wi-tɔ̧-wen oi nú Sɔ̧ tɔ̧ɔ̧ ha̧ wa nyɛm nɛ ɗoŋ nú-tom nɛ GASA WAN Sɔ̧ kɔ-wa ee nú-a, ɓɛɛ dukbíí nɛ oi-aa lɛŋ yu kíí GASA WAN.

¹³ Nɛ mɔ'ɔ nɛ Agee betom ko GASA WAN wee ɗoŋ wen ha̧ wa hee mɔ'ɔ nɛ GASA WAN tɔ̧ɔ̧ ha̧ a̧ ga. GASA WAN tɔ̧a̧: «Mi a̧a̧ in'nɛ̀ɛ́.»

¹⁴ GASA WAN tuna taamɔ ko Zorobabɛl, gasawi nù Juda, bem ko Saltiɛl, in Josue, gasa wan-ɗafi-sɔ̧, bem ko Yosedɛk in o oi dukbíí lɛŋ, nɛ mɔ'ɔ nɛ wa kura, ɓɛɛ wa ku̧naŋ dee tom Tua ko GASA WAN Sɔ̧ kɔ-wa nɛ a̧a̧ nɛ ŋgayamɔ lɛŋ.

¹⁵ Wa ku̧u̧ naŋ dee tom Tua'i tɛ ɔɔ-zɛ ɓu-yiitoo-zua-naar zaŋ mɔɔrɔ-ɗoŋ-kpɔk fio-zɛ.