2 SAMUƐL 1 - Kalata Ko SƆ̧ DC

David zia nyɛrɛ fio ko Saul

¹ Ɗoŋ nɛ Saul fea, David pia nɛ̀ fara n'aa nɛ̀ɛ̀ bi o be Amalɛk sɛnɛ. A̧ duka sɛn Siklag zɛ yiitoo.

² Tɛ taar zɛ, ŋma bíí tɛ̀ɛ́ nɛ kɔ̧ gbagari ko Saul; laa kɔ̧-a̧ a̧ka̧ a̧k, ɓɛɛ zu-a lɛŋ nɛ́ fuunu. A̧ hɔa katɛ David, ɓɛɛ a̧ hɔ̧fi̧ gu yí-a nù.

³ David aka a̧: «Mɛ tɛ nɛ̀ déè nde?» Wi’ɛi kifa nú: «Mi yu mɔ tɛnɛ nɛ̀ kɔ̧ gbagari ko o be Israɛl.»

⁴ David aka a̧ woyo: «Mɔ yaka hee ge? Mɛ̀ tɔ̧́ ha̧‘m!» Wi’ɛi kifa nú: «O be Israɛl yuu biro; ɓɛɛ bíí nɛ̀ dɔka-a fea. Saul in bem kɔ̧-a̧ Jɔnataŋ fea mbɛt.»

⁵ David aka betom'i: «Mɛ dee hee ge iŋ nɛnɛ‘e Saul in bem kɔ‘i Jɔnataŋ fea ge?»

⁶ Betom'i kifa nú: «Mi yara so kɔ‘m nɛnɛ sɔɔ géè si zu kaya Gilboa; mi zɔka Saul nɛ ɛk tɛ nɛ̀ sɛ́ɛ̀ kɔ‘i, ɓɛɛ o keekee-biro in wi-daŋ-nyaŋa nasi nɛ́ a̧.

⁷ A̧ zika tɛ-a, ɓɛɛ a̧ zɔk am. A̧ saa'm, ɓɛɛ mi kɔ̧ sara.

⁸ A̧ aka'm'e, mi nɛ́ ge bíí ge? Ɓɛɛ mi tɔ̧ ha̧ a̧‘e, mi nɛ́ be Amalɛk.

⁹ A̧ tɔ̧ɔ̧ ha̧‘m: ‹Mi ai nú‘m ha̧ mɛ, mɛ̀ dúk katɛ‘m, a̧ mɛ̀ gbɛ́‘m wen yí‘m zik zik, kóó nɛ̀ oi ŋgai nɛ ɓɔna tɛ‘m'i.›

¹⁰ Mi ɓɔna katɛ a̧ ɓɛɛ mi gbɛ a̧, wen mi iŋa a̧ beka kpasi ɗoŋ yoo nù kɔ̧-a̧ na. Mi baa laasɔ̧i̧-wan n'aa guu zu a̧ in káná nɛ duka so er-a. Nyaa, mɔɔ nɔ‘i lɛŋ nɛ́ mɔ'ɔ n'am kai tɛnɛ h’ɛ́nɛ́'ɛ.»

¹¹ David a̧ka̧ laa tɛ a nù; o bíí nɛ yaa in a̧ lɛŋ dee hegɔ mbɛt.

¹² Wa hi̧a̧ fio, ɓɛɛ wa zim yì mɔ ga̧ nɛnɛ wen zu Saul in bem kɔ‘i Jɔnataŋ, wen dukbíí ko GASA WAN in o bíí nutua ko Israɛl nɛ fee nɛ́ fio gba-paa.

¹³ David aka betom'i woyo: «Mɛ́ nɛ́ be ge ye ge?» Betom'i kifa nú ha̧ David: «Mi nɛ́ bem ko ŋma be Amalɛk nɛ duk nɛ́ gɛnɛ.»

¹⁴ David aka a̧ woyo: «Mɛ dee hee ge sa kíì de mɛ tɛ baa er-mɛ gbɛ nɛ wi nɛ̀ GASA WAN tɛna nɔ̧́-wan a zu a̧ na ge nde?»

¹⁵ David saa ŋma ŋgaiwi kɔ‘i tɛnɛ, ɓɛɛ tɔ̧: «Mɛ̀ ɗɔ́ŋ pii ti, a̧ mɛ̀ gbɛ́ a̧.» Ɓɛɛ be-ŋgaiwi'i gbɛ a̧.

¹⁶ David tɔ̧ɔ̧ wen zu a̧: «Tɔk tɛ-mɛ a̧ sí ɗoŋ zu mɛ, wen nɛ́ nú-mɛ a̧ gbɛɛ mɛ, wen nɛ̀ mɛ tɔ̧a̧‘e, nɛ́ wi a̧ gbɛɛ wi nɛ̀ GASA WAN tɛna nɔ̧́ a zu a̧.»

David dee gima-fio ko Saul in ko Jɔnataŋ

¹⁷ Gima nɛ David dee zu fio ko Saul in bem kɔ̧-a̧ Jɔnataŋ nɛ́ mɔ'ɔ.

¹⁸ A̧ tɔ̧ɔ̧ ha̧ wa mɛ usi gima'i ha̧ o bezaŋ Juda. Mɛ nɛ́ «Aia-nú zu kusaa.» Wa yɔra gima'i zaŋ Kalata ko Wi-de-mɔ nɛ̀ yuwar-a. Gima'i nɛ́ mɔ'ɔ:

¹⁹ «Oee mi, Israɛl! O gasawi kɔ-mɛ fee zu o kaya kɔ-mɛ! O ŋgaŋa-wi aa nù kaɗi!

²⁰ K’ɛ́nɛ́ tɔ̧ nyɛrɛ-a hɔ sɛn nú Gat na, k’ɛ́nɛ́ tɔ̧ nyɛrɛ-a nɛ̀ yuwar Askelɔŋ nɛnɛ na; «wen ká tortɛ tɛ́ɛ̀ ba o be-zɔŋa Filistii, wen ká o be-zɔŋa ko o mbii-bɔr tɛ̀ɛ́ de nyɛŋɛ.

²¹ «O kaya Gilboa, ká mbɛŋ wai zu'nɛ́ na, ká kórò hɔ a zu'nɛ́ na mbɛt, ká nyɔnɔ dɛm kpɛɛfɔ k’ɛ́nɛ́ ɓɔna, wen ŋgee ko o ŋgaŋa-wi baa ndiŋ sɛn hi̧i̧; Saul sɔ̧ nɔ̧́ tɛ ŋgee kɔ‘i ɓɔna.

²² Nɔ̧́-sɔ̧ tɛ ŋgee kɔ̧-a̧ so nɛ́ tɔk-tɛ o wisɛn kɔ̧-a̧ in nɔ̧́-tɛ o ŋgaŋa-wi; kusaa ko Jɔnataŋ e so o wisɛn kɔ‘i géè na; gba-paa ko Saul pii so ɗoŋ nɛ̀ tɛ́ biro sɔɔ géè na.

²³ «Ho! Saul in Jɔnataŋ, o bíí n’ɛɛ kɔ̧ɔ̧ so, wa kɛ̧ tɛ nɛ̀ ŋmaa na tɛ duka-kpasa kɔ-wa hɔ tɛ fio; wa haia gan zua, wa ŋgaia gan dila.

²⁴ «O be-zɔŋa Israɛl! Ɛ̀nɛ̀ hí̧í̧ Saul nɛ̀ duka so a nɛ́ gbɛ̧ laa, in mbɔi-tɛ tɛ‘nɛ́, nɛ̀ duka so wai laa k’ɛ́nɛ́ nɛ̀ lɔr.

²⁵ O ŋgaŋa-wi aa nù sɛn yí biro! Jɔnataŋ ɔ nù zu kaya mɛ!

²⁶ «Nya'm! Jɔnataŋ! Fio kɔ-mɛ nyima tɛ‘m. Mi kɔ̧ɔ̧ so mɛ nyɛmna; kɔ̧ɔ̧mɔ kɔ-mɛ pii tɛ‘m gana kɔ̧ɔ̧mɔ ko okoo sitɛ wiwii.

²⁷ Ho! O ŋgaŋa-wi aa nù, o boi-biro ɗaŋa kaɗi!»