1 KƆRINTIƐN 1 - Kalata Ko SƆ̧ DC

Kalata ha̧ zuduk bíí ko Sɔ̧ sɛn Kɔrint

¹ Nɛ́ mi Paul, wi nɛ̀ Sɔ̧ saa so, nyɛm nɛ̀ ɗoŋ mɔ n'aa kɔ̧a̧, ha̧‘m mɛ́ duk betom ko Krist Jesu, in nya yɛ Sostɛn a̧ tom kalata’ɛ

² h’ɛ́nɛ́, zuduk bíí ko Sɔ̧ sɛn Kɔrint, ha̧ o wi nɛ̀ war-tɛ-wa sa̧a̧ nɛ̀ ɗoŋ Krist Jesu. Sɔ̧ saa wa ha̧ war-tɛ-wa mɛ́ sa̧ kpɔk in o bíí dam fara lɛŋ nɛ̀ sa nin Gasa Wan k’ɛ́ɛ́ Jesu Krist; a̧ nɛ́ Gasa Wan kɔ-wa in k’ɛ́ɛ́ mbɛt.

³ Deemɔ nɛ̀ ta-tɛ in ga̧a̧mɔ ko Sɔ̧, Dáà k’ɛ́ɛ́, in ko Gasa Wan Jesu Krist a̧ dúk in'nɛ̀ɛ́.

⁴ Mi de osoko ɓɔnsɛnɛ ha̧ Sɔ̧ wen mɔ n'aa ha̧a̧ h’ɛ́nɛ́ nɛ ta-tɛ nɛ ɗoŋ Krist Jesu.

⁵ Hegɔ ɛ́nɛ́ kpaa mɔ lɛŋ nɛ̀ ɗoŋ Krist, gan gan kpaamɔ nɛ̀ war ko wen in iŋamɔ.

⁶ Sedaako nɛ‘i dee mgbara'nɛ́ wen Krist dee kpasamɔ tɛ‘nɛ́.

⁷ Mɛ̀ nɛ́ hegɔ ŋma ha̧a̧mɔ ko Sɔ̧ ɓan'nɛ́ tɛ ŋgimbi n’ɛnɛ duk tɛ pɛma pia-ɗoŋ ko Gasa Wan k’ɛ́ɛ́ Jesu Krist na.

⁸ Mɛ̀ nɛ́ Sɔ̧'ɔ̧ tɛ de h’ɛ́nɛ́ mɛ́ yor nɛ̀ nɔa-a hɔ sɔŋkur-aa; hegɔ, ŋma wen tikiɗi beka bo zu'nɛ́ tɛ wese ko Gasa Wan k’ɛ́ɛ́ Jesu Krist na.

⁹ Sɔ̧ nɛ́ wi nɛ̀ yor ɗoŋ wen kɔ‘i; nɛ́ Sɔ̧‘i a̧ saa'nɛ́ mɛ́ duk kpɔk in Bem kɔ̧-a̧ Jesu Krist, Gasa Wan k’ɛ́ɛ́.

Kɛ̧ɛ̧-mgbara-ŋmaa poo zuduk bíí ko Krist sɛn Kɔrint

¹⁰ O nya'm, mi kɔ̧ɔ̧ mɛ́ tɔ̧ mbɔrɔ h’ɛ́nɛ́ nɛ̀ nin Gasa Wan k’ɛ́ɛ́ Jesu Krist; ɛ́nɛ́ lɛŋ a̧ yá nɛ̀ see kpɔk in o ŋmaa, ɓɛɛ k’ɛ́nɛ́ kɛ̧́ mgbara ŋmaa na; see'nɛ́ in taamɔ k’ɛ́nɛ́ lɛŋ a̧ sí ɗoŋ ŋmaa.

¹¹ O nya'm, o bíí ko Kloe tɛ̀ɛ́ tɔ̧ ha̧‘m'e, kpɛri a̧a̧ mgbara'nɛ́.

¹² Mi'e ndé, o ŋma mgbara'nɛ́‘e, wi nɛ́ bíí ko Paul; ɓɛɛ o ŋma'e, wi nɛ́ bíí ko Apolos; o ŋma woyo tɔ̧ kɔ‘i'e, wi nɛ́ bíí ko Sefas; ɓɛɛ o ŋma mbɛt tɔ̧ɔ̧‘e, wi nɛ́ bíí ko Krist.

¹³ Krist kɛ̧ɛ̧ tɛ fara géè ge nde? Nɛ́ Paul a̧ wa mgboia zu te-diŋa wen zu'nɛ́ náà, kóó wa zuia'nɛ́ nɛ̀ nin Paul nde?

¹⁴ Mi dee osoko ha̧ Sɔ̧ wen sɛn mgbara'nɛ́ lɛŋ, mi zuia nɛ́ Krispus in Gaius ɓɛɛ.

¹⁵ Hegɔ ŋma bíí mgbara'nɛ́ nɛ̀ tɛ tɔ̧‘e, wa zuia wi nɛ̀ nin-am, bo na.

¹⁶ Ii, nɛ̀ mbetɛ, mi zuia so o nam ko Stefanas mbɛt, ɓɛɛ mi iŋ ŋma bíí n'am zuia yak zu wa'i ɓɔna.

¹⁷ Wen bó nɛ́ Krist toma'm mɛ́ zui bíí na, ɓɛɛ a̧ toma'm mɛ́ tɔ̧ nɛ́ De Mbe Wen; bó nɛ́ tɔ̧a̧-a̧ tɛ iŋa-mgbara-mɔ ko bíí na mbɛt, wen ká‘m tɛɛ e te-diŋa ko Krist tɛ geemɔ.

Iŋa-mgbara-mɔ in mgbelemɔ

¹⁸ O wi nɛ̀ a̧a̧ yuwar yɔa-a zii kɔ‘i wen te-diŋa hee mgbélé wen ga, ɓɛɛ k’ɛ́ɛ́, o wi nɛ̀ a̧a̧ yuwar-kpasa-a, ɛ́ɛ́ iŋa'e mɔ‘i nɛ́ ŋgayamɔ ko Sɔ̧.

¹⁹ Wen Yɔramɔ tɔ̧a̧‘e: «Mi tɛ ɗaŋ iŋa-mgbara-mɔ ko o wi-iŋ-mgbara-mɔ, mi tɛ bi iŋamɔ ko o wi-iŋ-mɔ yinɛ.»

²⁰ Wi-iŋ-mgbara-mɔ a̧a̧ déè? Wi-iŋ-mɔ a̧a̧ déè? Wi-kii-mgbara-wen zaŋnu’ɛ nɛ́ o? Bó nɛ́ Sɔ̧ dee ha̧ haya mɔɔ-zaŋnu mɛ́ kifi mgbelemɔ na?

²¹ Nɛ̀ war ko iŋa-mgbara-mɔ, zaŋnu iŋ so Sɔ̧ tɛ iŋa-mgbara-mɔ kɔ̧-a̧ na; wen hegɔ, mɛ̀ nɛ́ tɛ tɔ̧ɔ̧ wen ko Sɔ̧ hee mgbelemɔ ga, a̧ Sɔ̧ dee nɛnɛ ha̧ wi nɛ̀ kɔ̧ɔ̧ ɗɔaa mɛ́ kpasi.

²² O Juif ak nɛ́ mɔɔ-kifi, ɓɛɛ o Grɛk kii kɔ‘i nɛ́ iŋa-mgbara-mɔ.

²³ Ɓɛɛ nɛ̀ war k’ɛ́ɛ́, ɛ́ɛ́ tɔ̧ nɛ́ wen ko Krist nɛ̀ wa mgboia zu te-diŋa; mɔ‘i duk nɛ́ mɔɔ-sakali o Juif, ɓɛɛ o gɔni-dùk zɔk kɔ‘i mɔ‘i hee mgbelemɔ ga;

²⁴ ɓɛɛ nɛ̀ war ko o wi nɛ̀ Sɔ̧ saa, o Juif in o Grɛk mbɛt, Krist duk nɛ́ ŋgayamɔ in iŋa-mgbara-mɔ ko Sɔ̧.

²⁵ Wen mgbelemɔ ko Sɔ̧ duk nɛ́ iŋa-mgbara-mɔ nɛ̀ gana ko bíí, ɓɛɛ ziɓa-a ko Sɔ̧ ŋgaia gan bíí mbɛt.

Mɔ nɛ̀ Sɔ̧ hoka

²⁶ O nya'm, ɛ́nɛ́ nɛ̀ Sɔ̧ saa'nɛ́'ɛ, ɛ̀nɛ̀ íŋ‘e tɛ zɔkamɔ nɛ̀ war ko bíí, o wi-iŋ-mgbara-mɔ, o gasawi, ká bá nɛ̀ o pɛ́r-nam ko o gasawi dɔk mgbara'nɛ́ na.

²⁷ Ɓɛɛ Sɔ̧ hoka mɔ nɛ̀ bíí zɔk hee mgbelemɔ ga zaŋnu’ɛ mɛ́ pi̧ foe zu o wi-iŋ-mgbara-mɔ, ɓɛɛ a̧ hok mɔ nɛ̀ duk hee ziɓamɔ zaŋnu’ɛ mɛ́ pi̧ foe zu o ŋga bíí.

²⁸ Mɔ nɛ̀ duk nɛ́ geemɔ yí bíí zaŋnu’ɛ in nɛ̀ wa fɛŋ, mɔ nɛ̀ hɔ mɔ na, nɛ́ mɔ‘i a̧ Sɔ̧ hoka wen ee mɔ nɛ̀ duk nɛ́ gasamɔ zaŋnu’ɛ tɛ geemɔ,

²⁹ wen ká ŋma bíí tɛɛ ŋmaŋ tɛ ti Sɔ̧.

³⁰ Nɛ́ Sɔ̧'ɔ̧ dee h’ɛ́nɛ́ mɛ́ duk kpɔk in Krist Jesu nɛ̀ kifa duk nɛ́ iŋa-mgbara-mɔ wen yɛ, nɛ̀ tɛ̀ɛ́ nɛ̀ tɛ́ Sɔ̧; ɛ́ɛ́ duk nɛ́ o wi-de-mɔ nɛ̀ yuwar-a sɛn yí Sɔ̧ nɛ ɗoŋ Krist, war-tɛ-ɛɛ sa̧a̧, ɓɛɛ a̧ kpasi yɛ tɛ ɗaŋmɔ.

³¹ Wen Yɔramɔ tɔ̧a̧‘e: «Wi nɛ̀ kɔ̧ɔ̧ mɛ́ ŋmaŋ tɛ, a̧ ŋmáŋ tɛ wen zu Gasa Wan.»