MICHEE 1 - KALATA KO SƆ̧

¹ Wen nɛ GASA WAN tɔ̧ɔ̧ ha̧ Michee be Mɔrɛsɛt, ŋgimbi wan ko Yotam, Ahaz in Ezɛkias wannu Juda nɛ mɔ'ɔ. A̧ hɔɔ so zu ha̧ a̧ wen zu Samarii in Jerusalɛm.

Aia-nú wen Samarii in Jerusalɛm

² Ɛ́nɛ́ o dukbíí lɛŋ ɛ̀nɛ̀ zii, nù, mɛ̀ dúk keɗeŋ in o mɔ nɛ ya zaŋ-mɛ lɛŋ. GASA WAN Sɔ̧ tɛ gbo nɛ kɔ̧ sa̧a̧ Tua kɔ‘i, mɛ gɔn kita zu'nɛ́.

³ Ɛ̀nɛ̀ zɔ́k GASA WAN a̧ gbo nɛ kɔ̧ sa̧a̧ fara kɔ‘i'i; a̧ zira, ɓɛɛ nɛ mɔ'ɔ n'aa nɛ nɔ nɛ zu o kusa kaya.

⁴ O kaya yela ɗɔɔ naŋ-a; o kɔ̧ ɗɔŋgɔ pɛsa hee ndíá a̧ yela tɛ wee ga, kóó hee yì a'i gbaia a zu kaya ga.

⁵ Mɔ‘i lɛŋ wen zu ŋgazu ko Jakob; wen zu ɗaŋmɔ ko o bíí nutua ko Israɛl. Ŋgazu ko Jakob nɛ ge? Bo nɛ o bíí Samarii na? O kusa-fara ko Juda nɛ ge? Bo nɛ Jerusalɛm na?

⁶ GASA WAN tɔ̧a̧: «Mi tɛ de ha̧ Samarii mɛ duk nɛ́ bɛɛ-oi, ha̧ a̧ mɛ duk nɛ́ fara nɛ‘i tɛ gun nyak-dɔ̧ɔ̧ sɛnɛ. Mi tɛ de ha̧ o tua kɔ̧-a̧ mɛ kin a kɔ̧ gboŋgo; mi tɛ gbin o naŋ-tua a nù lɛŋ.

⁷ Mi tɛ gbin o sɛka sɔ̧ kɔ-wa a nù lɛŋ; mi tɛ kai o kpaamɔ kɔ-wa lɛŋ a tɛ wee. Mi tɛ gbin o géé-sɔ̧ kɔ-wa lɛŋ a nù mutu-mutu. Hee o kpaamɔ nɔ‘i nɛ́ mɔɔ-oi-tom ko o kó-de-mɔ nɛ mbɔɗɔnu nɛ ya kɔ̧ tua ko o géé-sɔ̧ ga, wi tɛ kai wa yoɓi nɛ o kó-de-mɔ nɛ mbɔɗɔnu nɛ ya kɔ̧ tua ko o géé-sɔ̧ tɛ ŋma nù.»

Ŋgamɔ tika zu Jerusalɛm

⁸ Ɓɛɛ Michee tɔ̧: «Mi tɛ ai nú‘m, ɓɛɛ mi tɛ hi̧i̧ kɔ̧a̧ mbɛt; mi tɛ yar nɛ géé naŋ-am in nɛ mgbii. Mi tɛ ai nú‘m hee o gbóò ga, mi tɛ ŋma nú‘m hiɗi nɛ mɔ-fio hee o ndao ga,

⁹ wen nyimmɔ-fio nɛ duk tɛ Samarii kaɗi na. Hiɗimɔ‘i hɔɔ Juda, a̧ kɔna nú tua ko o bíí kɔ‘m hɔ Jerusalɛm mbɛt.

¹⁰ «K’ɛ́nɛ́ tɔ̧ wen bɔnɛ k’ɛɛ nɛ ŋgɔn ha̧ o wi Gat na, ɓɛɛ ɛ̀nɛ̀ kín tɛ‘nɛ́ nɛ nù sɛn Bɛt-Leafra.

¹¹ Ɛnɛ o bíí ye Safir, ɛ̀nɛ̀ ɓír yak nɛ foe in nɛ mgbii. O wi Sanaŋ, ɛnɛ beka gbo ɓɔna, ɛ̀nɛ̀ áí nú‘nɛ́ sɛn Bɛt-Esɛl wen ŋma mɔɔ-ɛk nɛ tɛ k’ɛ́nɛ́ bo ɓɔna.

¹² Ɓɛɛ nɛ ko o wi Marot, gɛ̧ɛ̧mɔ baa wa; wa beka kpa bɔtɛ ɓɔna, wen ɗaŋ sɔnti zira nɛ tɛ GASA WAN tɛnɛ duk nú garo Jerusalɛm.

¹³ O wi Lakis a̧ hɛr keekee-nyaŋa ha̧ o wi-ma-yì, wen nɛ́ ɛnɛ a̧ duk nɛ́ ku̧u̧naŋ ɗaŋmɔ ko Jerusalɛm, wen nɛ́ sɛn tɛ‘nɛ́ a̧ o be Israɛl zɔka nɛ ɗoŋ ɗaŋmɔ.

¹⁴ Mɛ tɛ ha̧ mbɔi ɗoŋ Mɔrɛsɛt-Gat; o be-wan Akzib beka yor ɗoŋ o wannu Israɛl ɓɔna.

¹⁵ War k’ɛ́nɛ́ o wi Marɛsa, mi tɛ tom o bíí nɛnɛ mɛ kai o mɔ k’ɛ́nɛ́ yinɛ lɛŋ; o be-wan Israɛl tɛ yu mɔ si kɔ̧ di̧i̧ Adulam mɛ lɛŋ.

¹⁶ «Mɛ̀ kpúí mu̧i̧-zu-mɛ, mɛ̀ gɔ́n mu̧i̧-zu-mɛ, mɛ̀ gɔ́n mu̧i̧-zu-mɛ a nù, wen zu o bem kɔ-mɛ nɛ mɛ kɔ̧ɔ̧ nyɛmna. Mɛ̀ dé ha̧ bɛɗɛ zu-mɛ mɛ duk ɗuwee hee zu tama ga, wen wa kaia o bem kɔ-mɛ yaknɛ nɛ bara-biro nyɛi̧ nɛ mɛ.»