ƐSTƐR 1 - KALATA KO SƆ̧

Gbaŋa ko wannu Zɛrzɛs

¹ Duka so nɛ́ ŋgimbi nɛ̀ Zɛrzɛs ɔɔ so nɛ̀ wan zu o zika-nù gɔmŋmaa-nɛ-ɓu-yiitoo-zua-mɔɔrɔ-ɗoŋ-yiitoo, ku̧u̧naŋ-a nɛ̀ Indɛ hɔ nɛnɛ Etiopii mɛ.

² Ɗoŋ baa wan ko wannu Zɛrzɛs, a̧ tɛ̀ɛ̀ duk zu damti nɛ̀ a̧a̧ sɛn ŋgárá Suzɛ,

³ ɓɛɛ nɛ́ tɛ́ taar pɛ ɔɔ-wan kɔ̧-a̧‘i a̧ a̧ dee nɛ̀ gbaŋa ha̧ o gasawi in o wi-de-tom kɔ̧-a̧, o gasa wi-biro Pɛrsɛ in Mɛdɛ, ká bá nɛ̀ o be-wan in o gasawi zu zika-nù mbɛt. Wa mɔi̧a ŋmaa lɛŋ kpa ti a̧.

⁴ A̧ usa dɔka mbɔi in gasa mɔɔ-wan kɔ̧-a̧ ha̧ wa tɛ ɔɔ-zɛ gɔmŋmaa-nɛ-ɓu-mɔɔrɔ-ɗoŋ-taar.

⁵ Ɗoŋ ŋgimbi'i, wannu dee mbe gbaŋa sɛn bee-gara tua-wan kɔ‘i ha̧ o bíí ŋgárá Suzɛ, mɔ nɛ̀ tɔ̧‘e o gasawi gú nɛ̀ o geɗek wi lɛŋ. Gbaŋa'i ɔɔ nɛ́ zɛ mɔɔrɔ-ɗoŋ-yiitoo.

⁶ Wa kuna o de yí-laa nɛtɛ nɛtɛ tɛ de toka gbɛ̧ nyak, ɓɛɛ wa ba kun tɛ o de káná nɛ̀‘i dee nɛ̀ bu-mbɔi, e tɛ o mbiŋ nɛ̀‘i dee nɛ̀ bu ta. Nɛ́ mɔ'ɔ nɛ̀ wa aa o gado nɛ̀‘i dee nɛ̀ lɔr in bu-mbɔi zu fara nɛ̀‘i yɔka nɛ̀ o de ta nɛtɛ nɛtɛ nɛ̀ kpaa-a ɔ ɓana.

⁷ Wa a̧a̧ so nɛ́ o mɔɔ-nɔ-mɔ nɛ̀‘i dee nɛ̀ lɔr, yí-a nɛtɛ nɛtɛ; dɔ̧ɔ̧ dɔka so gan kere, nyɛm nɛ̀ ɗoŋ yuwar ha̧a̧mɔ ko wannu.

⁸ Wannu tɔ̧ɔ̧ so ha̧ o bíí mɛ nɔ mɔ hee mɔ'ɔ nɛ̀ see-wa kɔ̧ɔ̧ ga. A̧ tɔ̧ɔ̧ ha̧ o wan-duk-zu nyɔŋmɔ mɛ ha̧ mɔ lɛŋ nɛ̀ o bíí kɔ̧a̧ ha̧ wa.

⁹ Ko-wan Vasti dee war gbaŋa kɔ‘i in o okoo sɛn kɔ̧̀ kira ko wannu mbɛt.

Tika-a ko Vasti

¹⁰ Sɛn tɛ mɔɔrɔ-ɗoŋ-yiitoo ɔɔ-zɛ, dɔ̧ɔ̧ pi̧i̧ wannu tɛ tortɛ, ɓɛɛ a̧ tɔ̧ ha̧ o kpàná kɔ̧-a̧ mɔɔrɔ-ɗoŋ-yiitoo nɛ̀ ya ɓɔn mgbák katɛ a̧; mɛ̀ nɛ́ Mɛhuman, Bizɛta, Harbona, Bigta, Abgata, Zɛtar ká bá nɛ̀ Karkas,

¹¹ ha̧ wa mɛ nɛ̀ɛ́ sa ko-wan Vasti tɛnɛ nɛ̀ oi mɔɔ-gu-zu ko ko-wan, mɛ usi déè kɔ̧-a̧ ha̧ o gasawi in o dukbíí nɛ̀ mɔi̧a, wen a̧ yora so zɔŋa nyɛmna.

¹² Ɓɛɛ ko-wan Vasti bɛ̧ sara nú o betom nɛ̀ wannu toma'i. Nɛ́ mɔ'ɔ nɛ̀ see wannu ɗaŋa, see-aa tu̧u̧ nyɛmna, bó nɛ́ mɔɔ-tɔ̧ na.

¹³ Zu mɔ‘i, a̧ saa o wan-ba-keta zu o heembea in yuwar duka-a ko o bíí nyɛm nɛ̀ ɗoŋ deemɔ kɔ-wa, ha̧ wa mɛ kii mɔ tɛ mɔ‘i ha̧ a̧.

¹⁴ O ŋma gasawi mɔɔrɔ-ɗoŋ-yiitoo ko o bíí Pɛrsɛ in Mɛdɛ nɛ̀ yaa so katɛ wannu nɛ̀ mɔɔ nɔ'ɔ: Karsɛna, Setar, Admata, Tarsis, Mɛrɛs, Marsena, ká bá nɛ̀ Mɛmukan. O wi nɔ‘i a̧a̧ so mgbara o kuti-wi nù‘i; wa a̧a̧ nɛ̀ ŋgai mɛ hɔ ti wannu mbɛt.

¹⁵ Wannu aka wa: «Hee mɔ'ɔ nɛ̀ ko-wan Vasti mbo zu tɛ saa-sara ko wannu nɛ̀ toma nɛ̀ o kpàná kɔ‘i nɛnɛ ha̧ a̧ na ga’ɛ, nɛ́ ge a'i tɛ de in a̧ nyɛm nɛ̀ ɗoŋ heembea ko nù k’ɛɛ ge?»

¹⁶ Mɛmukan kifa nú ti wannu in o gasawi, ɓɛɛ tɔ̧: «Bo nɛ Vasti ee nɛ́ wannu ɛ̀nɛ̀-wi tɛ geemɔ na, ɓɛɛ a̧ ee nɛ́ o gasawi in dukbíí tɛ o zika-nù k’ɛɛ lɛŋ tɛ geemɔ mbɛt.

¹⁷ O okoo lɛŋ tɛ zii nyɛrɛmɔ nɛ̀ kóò ko wannu dea'i, ɓɛɛ wa tɛ e o wíì kɔ-wa mbɛt tɛ geemɔ. Wa tɛ ya tɔ̧ nɛnɛ‘e: ‹Wannu Zɛrzɛs baa tom so sa ko-wan Vasti, ɓɛɛ a̧ bɛ̧.›

¹⁸ Ɓɛɛ sɔsɔɔ‘i yak nɛnɛ, o kóò ko o gasawi nù Pɛrsɛ in Mɛdɛ nɛ̀ zia nyɛrɛ mɔ nɛ̀ kóò ko wannu dea'i, tɛ de ŋgazu in o gasawi lɛŋ, ɓɛɛ ee wíì kɔ-wa tɛ geemɔ; hegɔ mɔ‘i tɛ aŋ nɛ́ nyimsea ko o wiwii a ŋgɔn.

¹⁹ Kà wannu nɛ kɔ̧a̧, a̧ a̧ há̧ nú ha̧ wa mɛ yɔr mɔ zaŋ heembea ko Mɛdɛ in Pɛrsɛ nɛ̀‘i beka kpai na mɛ tɔ̧‘e: ‹Vasti beka pii ɗoŋ tɛ wannu mɛ duk ko-wan ɓɔna, ɓɛɛ wannu tɛ ba nɛ́ ŋma mbe kóò nɛ̀ dee gan a̧ e oi-aa.›

²⁰ Hegɔ, bíí tɛ iŋ heembea ko wannu dam zu o dɔka nù kɔ̧-a̧ lɛŋ, ɓɛɛ mɔ‘i tɛ de ha̧ o okoo lɛŋ mɛ tu̧ tɛ o wíì kɔ‘i, kóó nɛ́ o gasawi, kóó nɛ́ o geɗek wi.»

²¹ Wen'i dee tɛ wannu in o gasawi kɔ‘i, ɓɛɛ a̧ ndak ɗoŋ wen ko Mɛmukan'i.

²² Wannu toma o kalata dam tɛ nù kɔ‘i lɛŋ, ha̧ o zika-nù kpɔk kpɔk nyɛm nɛ̀ ɗoŋ yuwar yɔramɔ kɔ-wa, ha̧ o dukbíí kpɔk kpɔk nyɛm nɛ̀ ɗoŋ nú kɔ-wa, ha̧ o wan-kóò lɛŋ mɛ duk wan zu kira kɔ‘i, usi nɛ̀ nú kɔ‘i ha̧ o bem kɔ‘i.