2 KƆRINTIƐN 1 - KALATA KO SƆ̧

Fanamɔ

¹ Nɛ́ mi Paul, wi nɛ̀ Sɔ̧ saa so nyɛm nɛ̀ ɗoŋ mɔ n'aa kɔ̧a̧ wen ha̧‘m mɛ́ duk betom ko Krist Jesu, in nya yɛ Timotee a̧ tom kalata’ɛ h’ɛ́nɛ́, zuduk bíí ko Sɔ̧ sɛn Kɔrint in o sa̧a̧-bíí sɛn nú Akai lɛŋ.

² Deemɔ nɛ ta-tɛ in ga̧a̧mɔ ko Sɔ̧, Dáà k’ɛ́ɛ́, in ko Gasa Wan Jesu Krist a̧ duk in'nɛ̀ɛ́.

Bɔnɛ in ga̧a̧-see

³ Toka de yoŋgo a̧ dúk zu Sɔ̧, Dáà ko Gasa Wan k’ɛ́ɛ́ Jesu Krist; a̧ nɛ́ Dáà nɛ̀ de ko, Sɔ̧ nɛ̀ ha̧ ga̧a̧-see lɛŋ ha̧ bíí.

⁴ Nɛ́ a̧ a̧ ga̧ see yɛ tɛ o ŋgimbi tu̧u̧-see k’ɛ́ɛ́ lɛŋ, wen h’ɛ́ɛ́ mɛ́ ga̧ see o bíí lɛŋ nɛ̀ ya nɛ̀ tu̧u̧-see mbɛt, nyɛm nɛ̀ ɗoŋ ga̧a̧-see nɛ̀ Sɔ̧ ha̧ h’ɛ́ɛ́.

⁵ Ɓɛɛ hee mɔ'ɔ n’ɛ̀ɛ̀ zɔk bɔnɛ nɛ̀ dɔka-a wen zu Krist ga, kale-a hegɔ mbɛt, ɛ́ɛ́ kpa ga̧a̧-see nɛ̀ dɔka-a nɛ̀ ɗoŋ Krist.

⁶ Kóó ɛ́ɛ́ ya tɛ ŋgamɔ ndé, mɛ̀ nɛ́ wen h’ɛ́nɛ́ mɛ́ kpa ga̧a̧-see in h’ɛ́nɛ́ mɛ́ kpasi. Kóó ɛ̀ɛ̀ kpá ga̧a̧-see, mɛ̀ nɛ́ wen h’ɛ́nɛ́ mɛ́ kpa ga̧a̧-see nɛ̀ tɛ de h’ɛ́nɛ́ mɛ́ nɔ ŋgiɗi zaŋ kale bɔnɛ n’ɛ̀ɛ̀ zɔk'i.

⁷ Hegɔ ee-ta k’ɛ́ɛ́ nɛ̀ ɛ́nɛ́ nɛ́ kpasa mɔ: ɛ́ɛ́ iŋa'e hee mɔ'ɔ n’ɛnɛ zɔk bɔnɛ in yɛɛ ga, ɛ́nɛ́ tɛ́ kpa ga̧a̧-see in yɛɛ mbɛt.

⁸ O nya-ɛɛ, ɛ́ɛ́ kɔ̧ɔ̧ ha̧ tɛ‘nɛ́ mɛ́ mbaŋ ɗoŋ bɔnɛ n’ɛ̀ɛ̀ zɔka nú Azii; mɔ‘i gana ŋgai k’ɛ́ɛ́, ɓɛɛ bó nɛ́ ɛ́ɛ́ taa so'e ɛ́ɛ́ tɛ̀ɛ́ kpasi na.

⁹ Taamɔ k’ɛ́ɛ́ so'e fio kpaa yɛ kaɗi. Hegɔ ɛ́ɛ́ nyɛm so mɛ́ e ta nɛ̀ ɛ́ɛ́ nɛ̀ tɛ yɛ na, ɓɛɛ nɛ́ Sɔ̧ nɛ̀ de ha̧ bíí mɛ́ kur ŋgɔn tɛ fio ɛ̀ɛ̀ tɛ́ e nɛ̀ ta.

¹⁰ Nɛ́ a̧ a̧ kpasa so yɛ tɛ́ fio'i, ɓɛɛ a̧ tɛ́ kpasi yɛ woyo; ɛ́ɛ́ e ta nɛ̀ a̧‘e, a̧ tɛ́ kpasi yɛ woyo.

¹¹ Kɔfa-sɔ̧ n’ɛnɛ kɔfi'i, nɛ́ gbaka yɛ ɛ̀nɛ̀ gbak; ɓɛɛ kifa-nú ko Sɔ̧ n’ɛ̀ɛ̀ tɛ́ kpa wen zu kɔfa-sɔ̧ ko o dɔka bíí tɛ́ de ha̧ o dɔka bíí mbɛt mɛ́ de osoko ha̧ Sɔ̧ wen zu yɛ.

Gba̧a̧ mbosa nɔ̀ ko Paul

¹² Mɔ n’ɛ̀ɛ̀ duk tɛ-ɛɛ sɛnɛ wen-aa nɛ́ mɔ'ɔ: taamɔ k’ɛ́ɛ́ usa h’ɛ́ɛ́ nɛ̀ mbetɛ‘e, yuwar-duka-a k’ɛ́ɛ́ zaŋnu’ɛ, batɛ, yuwar-duka-a k’ɛ́ɛ́ in'nɛ̀ɛ́ ɔ sa̧a̧, in duk nɛ̀ yuwar-a nɛ̀ ɗoŋ Sɔ̧, bó nɛ́ wen iŋa-mgbara-mɔ ko bíí na, ɓɛɛ mɛ̀ nɛ́ wen deemɔ nɛ̀ ta-tɛ ko Sɔ̧.

¹³ Ɛ́ɛ́ yɔ̀r ŋma mɔ h’ɛ́nɛ́ yak zu mɔ n’ɛnɛ tɔra in mɔ n’ɛnɛ zia na. Mi taa ɛ́nɛ́ tɛ zii yɛ nɛ̀ sa̧a̧-a̧,

¹⁴ wen ɛ́nɛ́ zia ká̧ nú-wen k’ɛ́ɛ́ kaɗi. Ɛ́nɛ́ dúk tɛ‘nɛ́ nɛ̀ ɛ́ɛ́ hee mɔ'ɔ n’ɛ̀ɛ̀ tɛ́ duk nɛ̀ tɛ-ɛɛ nɛ̀ ɛ́nɛ́ wese ko Gasa Wan Jesu ga.

¹⁵ Ɓɛɛ tɛ ee-ta hegɔ‘i, mi kɔ̧ɔ̧ so mɛ́ nɛ̀ tɛ‘nɛ́ nɛti wen h’ɛ́nɛ́ mɛ́ kpa desee war yiitoo.

¹⁶ Mi tɛ̀ɛ́ duk so tɛ‘nɛ́‘i yak nɛnɛ si Masedoan, ɓɛɛ mi ɓɔna Masedoan pii nɛ̀ ɗoŋ pii tɛ‘nɛ́ woyo wen h’ɛ́nɛ́ mɛ́ gbak am wen nɔ̀ kɔ‘m si Judee.

¹⁷ Taamɔ kɔ‘m'i, nɛ́ zɛŋ a̧‘m de nde? Kóó nɛ́ gee taamɔ ko bíí nɛ̀ tɔ̧ «ii» in «weyaa» tɛ kpɔk mɔ'ɛ nde?

¹⁸ Sɔ̧ iŋa'e nɛ́ kpasawen ɛ̀ɛ̀ tɔ̧: wen n’ɛ̀ɛ̀ tɔ̧ h’ɛ́nɛ́ bó nɛ́ «ii» in «weyaa» na,

¹⁹ wen Bem ko Sɔ̧, Krist Jesu nɛ̀ ɛ́ɛ́ in Silvɛn ká bá nɛ̀ Timotee tɔ̧ɔ̧ wen kɔ̧-a̧ h’ɛ́nɛ́‘i, bó nɛ́ «ii» in «weyaa» na, ɓɛɛ nɛ́ «ii» war kpɔk.

²⁰ O mɔ nɛ̀ Sɔ̧ ha̧a̧ so nú sɛnɛ lɛŋ hɔɔ gba̧a̧ tɛ Krist, ɓɛɛ ɛ́ɛ́ tɔ̧ «Aamɛn» nɛ̀ ɗoŋ-aa ha̧ gasamɔ mɛ́ duk nɛ́ ko Sɔ̧.

²¹ Wi nɛ̀ ha̧ ŋgai h’ɛ́ɛ́ in'nɛ̀ɛ́ tɛ Krist, nɛ̀ tɛna nɔ̧́ a zu yɛ mbɛt, nɛ́ Sɔ̧.

²² A̧ ee tumbal kɔ̧-a̧ tɛ yɛ, ɓɛɛ a̧ e Sa̧a̧ Ɔmi mɛ́ duk kɔ̧ see yɛ hee pi̧i̧-káná-mɔ ga.

²³ Sɔ̧ nɛ́ wi-sedaako duka-a kɔ‘m; mi bɛ̧ɛ̧ sii ɗoŋ Kɔrint wen k’ɛ́nɛ́ tɛɛ sakali.

²⁴ Ɛ́ɛ́ beka de'nɛ́ nɛ̀ doole zu mɔ n’ɛ̀nɛ̀ tɛ́ kɔ̧ ɗɔaa sɛnɛ na, wen ɛ́nɛ́ a̧a̧ nɛ̀ kpasa kɔ̧ɔ̧ɗɔɔwen nyɛmna; ɓɛɛ ɛ́ɛ́ kɔ̧ɔ̧ mɛ́ de nɛ́ tom in'nɛ̀ɛ́ h’ɛ́nɛ́ mɛ́ kpa desee ɛ̧.