Kɔl-gɨ-Ɗari gɨ Lug wal 1 - Gabri Maja

Lug dor ti kɔl gɨ ban ba walɨn̰ magtubu di kɛ le

¹ Kalaŋ kondɨ ayge te wale kol hɨnga ga ba lee gusɨge a duroyna le duroy magtubu dɨŋ.

² Kan walge na dan̰ gɨyəŋdɨge gɨyəŋdɨge, hɨn̰ gɨ kan ga ba solge dan̰ cɨndɨge a toy dɨŋ bɨ, ba dorge koldi bɨge le bɨ. Kan ga ba solge dan̰ cɨndɨge le, bɨləŋge labɨde na ka-tɔgɛ bɛrnɛ ga da Kumu.

³ Ɨŋ ay na a toy dɨŋ kobɨ te hɨnga ga nee le bɨn̰. Haw kɛ na, ɨŋ-bandi kalɨn̰ ma, ɨŋ sol gɨ woy kuɗa gɨ ni wale koldi ɗɔɔ tumon̰ dan̰ kɨɗɨn̰dɨge kɨɗɨn̰dɨge bɨn̰ ji gɨ ni Teyopil, ungo hɨnge gɨ gumu.

⁴ Na hɨn̰ wo̰ dɨm ma, ji kɨya solɨn̰ gɨ kɔl gɨ kan ba gɨlɨn̰ge le naa kɔl gɨ cɨndi.

Gabɨriyɛl ba-ƴɔbɛ gɨ da Kumu andaŋ a cay Jagari

⁵ Boy ɨlge gɨ Kɨlma Ɛrɔd dɨn̰ cay gɨsəŋ ga Jude le, ba-bɔgɛ kɨbar gɨ pɨna wo̰, som nee gusondi na Jagari. Ban na ungo gɨ a te wɔɔ gɨ da Abɨya gɨŋ. Tamdi, na tama di a te wɨn̰je gɨ da ba-bɔgɛ kɨbar Aro̰ gɨŋ bɨ, guson̰ tamdi le na Elijabɛd.

⁶ Kan sɔɗɨmɔŋ na kalaŋ ga gɨye-lɔɔdɨge or dan̰ durɔ ɗɨngar tumoy Ba-gulɔŋ Kumu bɨ. Gorge a cay te tumɔ di da Ba-gulɔŋ Kumu dɨŋ nɔm bɨ, hɨnga nɔm ga Kumu ye gɨ kan na laa le, beege kɔl cay nee leege dan̰ gɨyəŋdɨge kuɗa, ɗe masadɨge unɔ.

⁷ Ama kan wɔɔge kɨye naŋ. Kɨya wa Elijabɛd na tama ɗe-madɨri bɨ, kan sɔɗɨmɔŋ leege ga esɨdəŋ kumɔ kumɔ bɨ.

⁸ Tɨwa di ni loon̰ gɨye tumoy Kumu da Jagari caga, kɨya gɨ na wɔlɛ lɔɔ gɨye gɨ da te kalaŋ kage.

⁹ Dan̰ gɨyəŋ gɨ da lɔɔ gɨye gɨ da ka-bɔgɛ kɨbar gɨ kan leedege daa daa le, kan sayge jɨbɨge ɓɛlɛ age na solɨn̰ kɛ, naa waŋ ma ɓɛlɛ na kɨya dorii a duroyge ɗe na lee gɨye a boy wɔlɛdi gɨ nee gɨŋ le ga? Na toy di hɨn̰ wo̰ ma, ɓɛlɛ dor Jagari ɗe na andaŋ duroy ƴaa-di-da-Ba-gulɔŋ Kumu dɨŋ, kɨya ulɨn̰ kɨrbaŋdi hɨnga ga ɗo̰ tɨna le.

¹⁰ Dɨmdɨrdi kalaŋ nɔm ɨrege doŋ olge Kumu kɨɗɨn̰ ga kan ɨre ulge dan̰ kɨrbaŋdi hɨnga ga ɗo̰ tɨna le.

¹¹ Ba-ƴɔbɛ gɨ da Ba-gulɔŋ gɨ pɨna wo̰ andaŋ cay Jagari, ɨrga ɨre a bongi kɨɗɨn̰ ga ɨre ulɨn̰ge kɨrbaŋdi hɨnga ga ɗo̰ tɨna gaŋ, a jɨn̰ cay kɔbɔ gɨ bara gɨŋ, dan̰ tɨbay daa.

¹² Kɨɗɨn̰ ga Jagari solii ɨni na, hundɔrɔ leeyi ɗe kɔl kayi bɨrɨŋ yɔd.

¹³ Ama ba-ƴɔbɛ gɨ daa nii le, yeyi hɨn̰: «Hundɔrɔ naŋ! Jagari kɨya wa Kumu je ɔlɛ kon̰. Tamdɨn̰ Elijabɛd kɨya wɔɔn̰ kɨye gɨ bara, ma man̰ kɨya se gusondi na Ja̰.

¹⁴ Gusɨn̰ kɨya mɔn̰ tɔgɨ, kɨya cay kurondɨn̰ bɨ, kondɨwadi kalaŋ kɨya lɔɔge gusi-mɔwa, kɨya cay wɔɔdi bɨ.

¹⁵ Kɨya wa ban kɨya bɨləŋ ungo gɨ gumu tumoyi Ba-gulɔŋ. Ban kɨya sɔɔ cɛrɛ di suru naŋ bɨ, kɨya sɔɔ cɛrɛ gɨ ɗaŋ gɨ man̰i naŋ bɨ. Turnɔ ɗe-kuduroy-bɛrɛ kɨya ƴɔɔ kuduroy pɨl pɨl kɨɗɨn̰ ga ban ba baan̰ a kuduroy ƴoyi ƴee le.

¹⁶ Ban kɨya jɨgan̰ dan̰ karɨn̰ Ɨsɨrayɛln̰əŋ dan̰ kondɨwayge orɨn̰ danage gusi Ba-gulɔŋ, Kumu koge.

¹⁷ Ban kɨya gɔrɛ tumoy Kumu dan̰ Turnɔ ɗe dɔnɔ bɨ, dan̰ gɨye-lɔɔ gɨ da Eli, ba-yɔɔ-kɔl-gɨ-Kumu-ba-yɔɔ bɨ. Ban kɨya bɨle kuduroy karɨn̰aŋ Ban̰an̰ge jɨn̰ gusi karɨndɨge, ɗe kan na bugoŋ pɨna bɨ, kɨya lɔɔ ɗe gɨ ka-baa ga da Kumu na ɨrɨmge hɨn̰ gɨ ka-lɔɔ hɨnga ga dan̰ durɔ ɗɨngar, ba ɨrɨmɨn̰ge wo̰ bɨ. Hɨn̰ wo̰ na, ban kɨya yanin̰ kalaŋ, ɗe na ɨrɨn̰ge cay tɨbayge dɨŋ bɨn̰ Ba-gulɔŋ Kumu.»

¹⁸ Ama Jagari yen̰ ba-ƴɔbɛ gɨ daa nii le yey hɨn̰: «Kɛ, na wa ba kɨya gɨləŋ gɨ kɔl kon̰ gɨ ji ba yəŋ le, naa cɨndi ga? Kɨya gɨ ɨŋ-bandi le, ɨŋ lee gɨ esi ɨni bɨ, ɨlge gɨ da tamnɨ kalɨn̰ ma hal ɨni bɨ.»

¹⁹ Bɨ ba-ƴɔbɛ gɨ daa nii le dɨbi cay nee yey hɨn̰: «Ɨŋ na Gabɨriyɛl, ba ɨre tumoy Kumu kɨya lɔɔ kuduroy geye koyi. Kumu gɨygəŋ gɨ ɨŋ na ɨre yan̰ bɨ, gɨ ɨŋ na ɨren̰ dan̰ Kɔl-gɨ-Ɗari gɨ kɛ le, bɨn̰ bɨ.

²⁰ Ama ji-bandi na, ji bɨga kuduron̰ a cay kɔl hɨnge nɔm gɨ kɨya lɔɔ gusi a wɔlɛdi gɨ nee gɨŋ le naŋ. Na ban ma, te kɨlendin̰ kɨya mare lɔɔ gɨ ji kɨya ɓale yon̰ kɔl naŋ bɨrɨŋ gɨsɨn̰ wɔlɛdi gɨ hɨnga ga nee le kɨya loon̰ gusɨge.»

²¹ Kalaŋ nɔm ga ba ɨrege doŋ gamge Jagari ɗe na andaŋ doŋ le, kɔl kayge yɔd kɨya gɨ ban som kardi sɨngɨɗɨ duroy ƴaa-di-da-Kumu dɨŋ.

²² Kɨɗɨn̰ ga ban andaŋ doŋ ɨni na, ban ɓala yɔ kɔl danage naŋ. Kɨɗɨn̰ ga nee le, kan sol kuduroyge gɨ ban na sɨlga hɨnga pɨna a duroy ƴaa-di-da-Kumu dɨŋ. Ban gɨlge hɨnga na dan̰ kobi ɨni bɨ, ɓala yɔ kɔl danage naŋ.

²³ Kɨɗɨn̰ ga wɔlɛ gɨ da gɨye koyi ba kaga ɨni na, ban jogɨ or ƴaadi dɨŋ.

²⁴ Kardi nee lam wo̰ ɨni na, tamdi Elijabɛd ƴee kur bɨ, wosɨ guso lee kɨdɨrɛ bay. Kɨɗɨn̰ ga hɨndi ba wosɨ guso le, hɨndi ye kudurɔ ye hɨn̰:

²⁵ «Ba-gulonɨ Kumu sol cɨn̰-n̰age tɨnge. Kɨya wa hɨnga ga dɨbɨ dasi canɨ duroy kalaŋ le, ayaŋ canɨ coŋ.»

Gabɨriyɛl tee bɛrnɛ wɔlɛ wɔɔ gɨ da Jesu

²⁶ Elijabɛd ƴee kur ɓal kɨdɨrɛ jii ɨni na, Kumu gɨygɨ ba-ƴɔbɛ koyi gɨ daa nii gɨ kan teeyige Gabɨriyɛl le, duroy cay ƴaa-di-gumu di Najarɛt, a cay gɨsəŋ ga Galile gaŋ.

²⁷ Ban le, Kumu gɨygi na gusi tɨmbali di cɨl di pɨna wo̰, di leege kujɔdo bɨn̰ bara gɨ pɨna wo̰, gɨ kan teeyige Jɨsɛb. Ban na ungo gɨ a te wɨn̰je gɨ da Kɨlma Dabid gɨŋ. Guson̰ tɨmbali di nee le, na Mari.

²⁸ Ba-ƴɔbɛ gɨ daa nii le, andaŋ ƴen̰ gusi tɨmbali le bɨ, yo hɨn̰: «Sɨma dan̰ gusi-mɔwa me-hɨndi di Kumu lee kuduroy-ɗarwa dɛnɛɛ, Ba-gulɔŋ baa dɛnɛɛ.»

²⁹ Kɨɗɨn̰ ga Mari je kɔl gɨ nee le ɨni na, kudurɔɔ woy kəgəgə bɨ, hɨndi ɨngɨr guso ye hɨn̰: Kɛ na lapɨya di mɨna ba hɨn̰ wo̰ ga?

³⁰ Ɨni na, ba-ƴɔbɛ gɨ daa nii le, yo hɨn̰: «Mari, hundɔrɔ naŋ, kɨya gɨ Kumu ɗe tɨdi karde kɨya lɔɔ kuduroy-ɗarwa dɛnɛɛ.

³¹ Sɨla! Me kɨya ƴɔɔ kur bɨ, me kɨya wɔɔ kɨye gɨ bara bɨ, me kɨya ɗɔɔ gusondi na Jesu.

³² Ban kɨya bɨləŋ ungo gɨ gumu bɨ, kan kɨya togi na Kurɨn̰-Kumu gɨ ɗɨn̰ cay hɨnga nɔm bɨ. Ba-gulɔŋ Kumu kɨya lɔɔ gɨ ban kɨya sɔmɛ a cay kali-tɨrɨmbala dɨŋ, ban̰di mon̰di Dabid.

³³ Ban kɨya dɔɔ-ƴaa a cay te kalaŋ ga Ɨsɨrayɛl ga na te wɨn̰je gɨ da Jagob dan̰ tumoyi yɔd bɨ, dɔɔ-ƴaa toyi le tɔɔ kɨya ayaŋ naŋ bɨrɨŋ bɨ.»

³⁴ Ɨni na, Mari yen̰ ba-ƴɔbɛ gɨ daa nii le yey hɨn̰: «Ɨŋ na tɨmbali di cɨl ƴee le kɛ, hɨnga ga nee le, kɨya lɔɔ gusɨge na mɨna ga?»

³⁵ Ba-ƴɔbɛ gɨ daa nii le, jɨga dɨboo cay nee yo hɨn̰: «Turnɔ ɗe-kuduroy-bɛrɛ kɨya gɨsɨne cɛɛ bɨ, dɔnɔ di da Kumu di ɗɨn̰ cay hɨnga nɔm kɨya umboŋ cɛɛ hɨn̰ turnɔ wo̰ bɨ. Na toy di wo̰ ma, kɨye gɨ woy dan̰ cɨndi gɨ me kɨya wooyi le, kan kɨya togii Kurɨn̰-Kumu.

³⁶ Sɨla! Elijabɛd di kɨŋ danaa na ka-wandɨ di kalaŋ ye kɔl caa hɨn̰ gɨ hɨndi na ɗe-madɨri le, ƴee kurdi kɨye gɨ bara dan̰ əsɨwado lee kɨdɨrɛ jii ɨni.

³⁷ Kɨya wa hɨnga ga mɨn̰ɨn̰ Kumu unɔ.»

³⁸ Ɨni na, Mari yeyi hɨn̰: «Sɨla! Ɨŋ na ɗe-gɨye di da Ba-gulɔŋ Kumu. Kuɗa gɨ hɨnga nɔm laa gusɨge kɔl canɨ hɨn̰ gɨ ji ba ye wo̰.» Bɨ ba-ƴɔbɛ gɨ daa nii le, say or ɗo.

Mari or sɔlɛ Elijabɛd

³⁹ Lam wo̰ kardi nee bɨ ga ma, Mari say or dan̰ tɔgɔɔ jɨn̰ cay ƴaa-di-gumu di pɨna wo̰, di garman̰əŋ kondɨ nee, di woy a cay gɨsəŋ ga Jude gaŋ.

⁴⁰ Hɨndi or andaŋ a duroy ƴaa di da Jagari dɨŋ bɨ, leen̰ Elijabɛd lapɨya.

⁴¹ Kɨɗɨn̰ ga Elijabɛd je noy lapɨya di da Mari le na, kɨye gɨ a kudurɔɔ le, say lee gusi guɗu guɗu daa a kudurɔɔ. Bɨ Turnɔ ɗe-kuduroy-bɛrɛ ƴee Elijabɛd guso.

⁴² Bɨ hɨndi yo dan̰ tumɔ di daa hɨn̰: «Kumu tor-kɨbi cɛɛ ɗɨn̰ kamde kandɨ ga ɗaŋ nɔm bɨ, tɔrɛ-kɨbɨ gɨ nee le, baa dan̰ kɨye gɨ me kɨya wooyi le nee bɨ.

⁴³ Kɛ, ɨŋ na waŋ ma Ba-gulonɨ ƴoyi ɨrga gusɨnɨ ga?

⁴⁴ Na cɨndi, kɨɗɨn̰ ga lapɨya di me ba ləŋ le ba baa sɨmanɨ bɨ ga ma, kɨye gɨ a kuduronɨ le, say lee gusi guɗu guɗu daa dan̰ gusi-mɔwa.

⁴⁵ Tumoy wolwa baa dɛnɛɛ, kɨya wa hɨnga ga Ba-gulɔŋ Kumu ba ye le, me bee kudurɛ cay nee gɨ na kɨya lɔɔ gusɨge leen̰ cɨndi hage.»

Kɨra gɨ da Mari

⁴⁶ Ɨni na, Mari ye hɨn̰: «Kuyoŋdi-gusɨnɨ nɔm hɨram gɨmɨn̰aw di da Ba-gulɔŋ.

⁴⁷ Turnonɨ lee gɨ gusɨnɨ mɔŋ tɔgɨ Kɨya cay Ba-gulonɨ Kumu ba-pɔɗɔŋ,

⁴⁸ Kɨya wa ban ɨrɨm canɨ ɨŋ-hɨndi ɗe-gɨye toyi di tama, Kɨya canɨ ɨŋ-hɨndi di ɨŋ ɓala hɨnga naŋ le. Ho’o, ay toy haw kɛ bɨrɨŋ jɨn̰ tumɔ le, Te wɔɔ gɨ da kalaŋ ga kobɨge kardi gusɨge nee nee le, Kɨya yɔɔge gɨ tumoy wolwa na woy kɔl canɨ.

⁴⁹ Kɨya wa Kumu Ba-dɔnɔ gɨ ɗɨn̰ hɨnga nɔm, Lee hɨnga ga gumu kɔl canɨ. Gusondi woy dan̰ cɨndi ɗən̰.

⁵⁰ Sɔlɛ cɨn̰-n̰age toyi kagado unɔ dan̰ te wɔɔ wɔɔ, Kɨya cay kan ga ka-bɔgɛ kɔl cayi.

⁵¹ Ban gɨrge nee dan̰ dɔnɔ di da kobi bɨ, Teen̰ kan ga ka-gɨle gusɨge le sugɨdɨge coŋ bɨ.

⁵² Ban gɨsɨn Kɨrɨmbɛlɛŋ cay kali-tɨrɨmbala toge dɨŋ dugo bɨ, Kan ga dɨga jorgɨyge naŋ le, Ban ay cayge daa bɨ.

⁵³ Kan ga kurɔŋ leege le, Ban ƴom wandɨ danage dan̰ hɨnga bajag bajag bɨ, Kan ga ka-wɔɔ hɨnga le, Ban ɗege or kobɨge kalɨn̰ bɨ.

⁵⁴ Ban ɨrga jɨbɨ te wɨn̰je gɨ da Ɨsɨrayɛl ɗe-gɨye toyi, Ɗe kuduroyi na hɨnɨn̰ cay sɔlɛ Gɨ ban sol cɨn̰-n̰age di da kalaŋ kayi,

⁵⁵ Hɨn̰ gɨ ban ba ye koldi bɨn̰ Abɨraham tumɔ le. Na ɗarwa di ban le dan̰ Abɨraham Dan̰ te wɨn̰je koyi dan̰ tumoyi yɔd.»

⁵⁶ Mari som dan̰ Elijabɛd hal hɨn̰ kɨdɨrɛ sɨbɨ wo̰, pa dɨm ma jogɨ a ɨndi tɔɔ ƴee.

Elijabɛd wɔɔ kɨye gɨ bara

⁵⁷ Kɨɗɨn̰ ga wɔlɛ gɨ Elijabɛd kɨya wɔɔn̰ ɓal ɨni na, hɨndi wɔɔ kɨye gɨ bara.

⁵⁸ Ka-durdo bɨ, kando ga jege gɨ Ba-gulɔŋ na sol cɨn̰-n̰age tɔɔ bɨ le, kan leege gusi-mɔwa dana koldi bɨ.

⁵⁹ Wɔlɛ margɨmdi gɨŋ na, kan ɨrgage kɨya ban̰a di da kɨye di kan ba kɨya walii le. Bɨ kan geyge ɗɔɔ guson̰ bay Jagari a cayi.

⁶⁰ Ama ƴoyi ay kɔl ye hɨn̰: «Naŋ, na hɨn̰ wo̰ naŋ, gusondi na Ja̰.»

⁶¹ Kan dubooge cay nee yoge hɨn̰: «Duroy ka-wandɨ kɛɛ nɔm le, ungo gɨ gusondi na Ja̰, unɔ.»

⁶² Kan leege kobɨge ɨngɨrɨn̰ge dan̰ kɨye bayi le ye hɨn̰: «Kɛ, kurondɨn̰ le ji gey gɨ ni na tɨgayi na mɨna ga?»

⁶³ Ɨni na, Jagari ɨngɨr gɨ kan na bii dan̰ hɨnga ga ni walɨn̰ kɔl nee ɨni na, ban wal kɔl nee ye hɨn̰: «Gusondi na Ja̰.» Kalaŋ nɔm ga ba ɨrege nee le, kɔl kayge.

⁶⁴ Ɨni na, kɨɗɨn̰di ga nee gaŋ le bɨ, kɨbɨ Jagari hangaŋ bɨ, te kɨlendi pɨndɨroŋ bɨ, lee gɨ ban ye kɔl bɨ, hɨram Kumu bɨ.

⁶⁵ Kɨɗɨn̰ ga nee le, hundɔrɔ lee kalaŋ ga durdɨge nɔm bɨ, kalaŋ dorge na kol hɨnga ga nee le, ƴen̰ cay gɨsəŋ ga Jude ga garman̰əŋ woy nee.

⁶⁶ Kalaŋ nɔm ga ba jege kɔl gɨ nee le ɨrɨmge hal cay nee bɨ, ɨngɨrɨn̰ge gusɨge kɔl yen̰ge hɨn̰: «Kɛ, kɨye gɨ kɛ le kɛ, wɔlɛ gɨ ɗaŋ gɨŋ le, gɨ bɨle na ungo gɨ mɨna ga?» Kɨya wa dɔnɔ di da Ba-gulɔŋ baa dan̰ kɨye le, leen̰ cɨndi.

Jagari kɨbɨ kɨra hɨramɨn̰ Kumu

⁶⁷ Turnɔ ɗe-kuduroy-bɛrɛ ƴee kuduroy Jagari gɨ ni kɨye bayi le pɨl pɨl, lee gɨ ban ye-kɔl-gɨ-Kumu-ba-yɔɔ hɨn̰:

⁶⁸ «Ba-gulɔŋ, ban na Kumu gɨ da te wɨn̰je gɨ da Ɨsɨrayɛl, Kuɗa gɨ kalaŋ hɨramayige! Kɨya wa ban ɨrga jɨbɨ te kalaŋ kayi bɨ, Ban ɨrga pɨndɨrge ɗege daa bɨ.

⁶⁹ Ban andɨn̰ dan̰ ba-pɔɗɛ kalaŋ pɨna gɨ orɨn̰ dan̰ dɔnɔ bɨna. Ban andɨn̰ danayi na duroy te wɨn̰je gɨ da Dabid gɨŋ.

⁷⁰ Na hɨnga ga nee le ma, Ban naa ye koldɨge jɨne hayi ni ba je le. Ban ɗe kɔl le na kɨbɨ ka-yɔɔ-kɔl-gɨ-Kumu-ba-yɔɔ Ga na kalaŋ kayi ga woyge dan̰ cɨndɨge.

⁷¹ Ban kɨya poɗɨnagɨŋ Kobɨ ka-baa dɨnagɨŋ bɨ, Kobɨ dɔnɔ di da kalaŋ ga ƴomnagɨŋge Dan̰ kuduroyge bɨ.

⁷² Ban sol cɨn̰-n̰age di da mon̰inagɨŋ ga jɨne le bɨ. Ban hɨn a cay kɨbɨge gɨ kan saɗɨ pɨna ɓɨsɨn̰ gusɨge Gɨ woy dan̰ cɨndi le bɨ.

⁷³ Na cɨndi, Kumu ɓɨsɨ gusi bɨn̰ bayna Abɨraham,

⁷⁴ Gɨ ɗi na kɨya dornagɨŋ bogɨnagɨŋ daa. Ɗe ana na leen̰gɨŋ gɨye koyi dɨle hundɔrɔ.

⁷⁵ Ɗe ana na won̰gɨŋ hɨn̰ kalaŋ kayi Ga woyge dan̰ cɨndɨge wo̰ bɨ, Ga dan̰ durɔ ɗɨngar wo̰ bɨ, A tumoyi bɨrɨŋ gɨsɨn̰ wɔlɛ tɨman̰dɨnagɨŋ gɨŋ bɨ.

⁷⁶ Bɨ ji kuronɨ, kan kɨya togɨn̰ge Gɨ ji naa ba-yɔɔ-kɔl-gɨ-Kumu-ba-yɔɔ, Gɨ da Kumu gɨ daa nii gɨ ba ɗɨn̰ cay hɨnga nɔm nɔm, Kɨya wa ji kɨya gɔrɛ tumoy Ba-gulɔŋ Kɨya n̰anɨn̰ gɨyəŋ koyi bɨ,

⁷⁷ Kɨya leen̰ gɨ ɗe kalaŋ kayi na sɨlan̰ge Gɨ ban na ɨrgan̰ naa dan̰ pɔɗɛ, Kɨya cay kuduroyi ga ban ɗe jal A cay ɨsɨnan̰əŋ gaŋ.

⁷⁸ Kɨya sɔlɛ cɨn̰-n̰age da Kumu koni Gɨ ɗɨn̰ cɨn̰-kɨɗɨn̰ le ma, Ɗe kɨɗɨn̰ ga woli sayga daa, Asɨn̰ cayni hɨn̰ tɨwa di sayga daa wo̰.

⁷⁹ Ɗe asɨn̰ kalaŋ ga somge duroy dɨlɨm dɨŋ bɨ, Ga somge kɨbɨ tɨma dɨŋ bɨ. Kɨya dorɨn̰ tumoynagɨŋ a gɨyəŋ Di gusi-dɔbɛ gɨŋ bɨ.»

Ja̰ ba-lɔɔ batɛm malgɨ

⁸⁰ Kɨye le malgɨ jɨn̰ tumɔ tumɔ bɨ, gusi osɨ kəŋ kəŋ nee bɨ. Ban or sɔmɛ a duroy dal dɨŋ bɨrɨŋ gɨsɨn̰ wɔlɛ gɨ ban gɨlɨn̰ gusi tumoy te wɨn̰je gɨ da te kalaŋ ga Ɨsɨrayɛl.