Yahayya 1 - Alkawal Kesal

Voliinde laatake neɗɗo

¹ Ila fuɗɗam e woodi bi'eteeɗo voliinde. Voliinde ndeen e wondi e Allah, nde Allah e hoore muuɗum.

² E nde wondi e Allah ila fuɗɗam.

³ E ma'are Allah tagiri koo ɗume. Ko woodi fuu, walaa ko tagaa naa e ma'are.

⁴ E ma'are yonki woni, yonki ɗuum laatii jayngol yimɓe.

⁵ Jayngol ngool e yaynoo nder niɓre. Niɓre boo waawaay nyifgo ngol.

⁶ E woodi goɗɗo neɗɗo mo Allah liloyi bi'eteeɗo Yahayya.

⁷ O warii gam saaydingo jayngol ngool, gam yimɓe fuu ngoonɗina ngol gada e caaydaaku ma'ako.

⁸ Naa kanko woni jayngol ngool, ammaa o warii gam saaydingo ngol e yimɓe.

⁹ Jayngol goongawol e wara nder duuniyaaru, ngol yaynana yimɓe fuu.

¹⁰ Jayngol ngool, waato voliinde ndeen, e ɗoonno nder duuniyaaru, duuniyaaru nduun tagiraama e ma'are, ammaa ndu annditaay nde.

¹¹ Nde warii nder lesdi ma'are, ammaa yimɓe ma'are njaɓaay nde.

¹² Ammaa jaɓɓe nde fuu, ngoonɗini nde, nde hokkii ɓe baawɗe laataago ɓiɓɓe Allah.

¹³ Ɓen ɗoon naa no danyaaɓe gada e kawtal gorko e debbo, koo gada e suuno ɓanndu, koo gada e giɗaaɗi gorko, ammaa ɓe danyaaɓe gada to Allah.

¹⁴ Voliinde ndeen laatake neɗɗo. O jooɗii hakkunde meeɗen, o keeɓɗo yiɗde e goonga. Min ngi'ii teddungal ma'ako, ɗum teddungal ngal *Ɓiɗɗo Bajjo heɓata to baaba muuɗum.

¹⁵ Yahayya saaydake nde, vi'ii e semmbee : — Kanko woni mo mbolvannoomi on dow muuɗum, mbi'imi on : « Goɗɗo no warey ɓaawo am, ɓurɗo yam manngu, gam emo woodi ila mi rimaaka. »

¹⁶ — Gada e ɗuuɗal barkaa ma'ako, en fuu en keɓii barkaa dow barkaa.

¹⁷ Gam gada e *Muusa keɓɗen dookaaji *Tawreeta, ammaa barkaa e goonga gada e Yeesu *Almasiifu heɓori.

¹⁸ Walaa meeɗɗo yi'igo Allah. Ɓiɗɗo Bajjo laatiiɗo Allah, gonduɗo e *Baabiraawo, kanyum anndini en mo.

Caaydaaku Yahayya baɗoowo baptisma dow Yeesu

¹⁹ *Yahuudu'en *Urusaliima liloyi *aardiiɓe diina mu''en e huwooɓe nder *Wuro Allah Seniingo, yahago to Yahayya, gam ɓe ƴama mo, kanko woni moye. Raa ko o saaydini.

²⁰ O salaaki yeccaago ɓe, o toontii ɓe laaɓɗum, o vi'i : — Miin, naa mi *Almasiifu.

²¹ Ɓe ƴami mo, ɓe mbi'i : — Aan a moye ? A annabi *Iliya naa ? O vi'i : — Wanaa. Ɓe mbi'i mo : — A annabiijo mo min ndeenti naa ? O vi'i : — Wanaa.

²² Ɓe mbi'i mo : — Ndeen a moye ? Yecca min ko min ngeccotoo liloyɓe min. Moye mbi'ataa hoore maaɗa ?

²³ O vi'i ɓe ko annabi *Ecaaya vi'inoo : — Miin woni baɗoowo ka wooyya nder ladde e vi'a : « Poortee laawol gam garol Jawmiraawo. »

²⁴ Nder lilaaɓe ɓeen e woodi ivoyɓe to *Fariisa'en.

²⁵ Ɓeen ƴami mo : — Gam ɗume mbaɗantaa yimɓe *baptisma, to naa a Almasiifu, koo Iliya, koo annabiijo mo min ndeenti ?

²⁶ Yahayya vi'i ɓe : — Miin, emi wa'ara baptisma e ndiyam, ammaa e woodi dariiɗo nder mooɗon mo on anndaa.

²⁷ Kanko woni gareyɗo ɓaawo am. Mi fotaay fiɓtugo koo ɓoggi paɗe ma'ako.

²⁸ Ɗum fuu ɗum waɗii nder si'ire Baytaaniya fonngo maayo Urdun, toon to Yahayya waɗata baptisma.

Yeesu woni njawdiri Allah

²⁹ Nde veeti, Yahayya yi'i Yeesu e wara to muuɗum, o vi'i : — Raa *njawdiri Allah itteyndi hakkeeji duuniyaaru !

³⁰ Kanko woni mo mbi'imi on : « Goɗɗo no warey ɓaawo am, ɓurɗo yam manngu, gam emo woodi ila mi rimaaka. »

³¹ Miin, mi anndaano mo. Ammaa mi warii emi wa'ara baptisma e ndiyam, gam o vannga yeeso yimɓe *Isiraa'iila.

³² Yahayya saaydini vi'i : — Mi yi'ii Ruhu kama foondu e jippoyoo, o hoɗi dow ma'ako, o jooɗii.

³³ Miin, mi anndaano mo. Ammaa liloyɗo yam mi wa'ara baptisma e ndiyam, kanko vi'inoo yam : « Oon mo ngiiɗaa Ruhu jippake jooɗake dow muuɗum, kanko woni ba'areyɗo baptisma e *Ruhu Ceniiɗo ».

³⁴ Miin, mi yi'ii mi saaydake kanko woni *Ɓiɗɗo Allah.

Almaajiri'en Yeesu aramɓe

³⁵ Nde veeti, Yahayya e darodii e almaajiri'en muuɗum ɗiɗo.

³⁶ O yi'i Yeesu e wutoo, o vi'i : — Raa *njawdiri Allah !

³⁷ Nde almaajiri'en Yahayya ɗiɗo ɓeen nani ko o vi'i, ɓe tokki Yeesu.

³⁸ Yeesu yeeƴii yi'i eɓe tokki ɗum, sey vi'i ɓe : — Ɗume ndaaroton ? Ɓe mbi'i mo : — Rabbi, waato moodibbo, toye njooɗiɗaa ?

³⁹ O vi'i ɓe : — Ngaree ngi'on ! Ndeen ɓe ngari, ɓe ngi'i to o jooɗii. Ko ndeen maa alaasara waɗi. Ɓe kiirtidi e ma'ako.

⁴⁰ Anndaraawus no go'oto nder ɗiɗo nanɓe bolle Yahayya tokki Yeesu. Emo woodi mawniraawo bi'eteeɗo Simon Biiturus.

⁴¹ Arande o yahi to mawniiko Simon, o vi'i ɗum : — Min tawii *Almasiifu, waato Cuɓaaɗo Allah.

⁴² O yahari mo to Yeesu. Yeesu raari Simon, vi'i mo : — Aan woni Simon ɓii Yahayya, gada jo'oni ɗum noddirte Keefas. Innde Keefas e Biiturus no wo'ore, ma'ana inɗe ɗeen ɗum haayre.

Yeesu noddii Filibus e Natanayel

⁴³ Nde veeti, Yeesu waɗi anniya yahago lesdi *Gaaliili. O yahi to Filibus, o vi'i ɗum : — Tokkam !

⁴⁴ Filibus boo ivoyii Baytisayda, si'ire nde Anndaraawus e Biiturus ivoyi.

⁴⁵ Filibus yahi to Natanayel vi'i mo : — Min tawii mo ɗum vinndi habaru muuɗum nder *Tawreeta Muusa, e nder defte *annabo'en. Ɗum Yeesu mo si'ire *Najaratu, ɓii Yusufu.

⁴⁶ Natanayel vi'i mo : — Koo ko vooɗi e waawi ivoygo Najaratu ? Filibus toontii mo vi'i : — War ngi'aa !

⁴⁷ Nde Yeesu yi'i Natanayel e wara to muuɗum, o vi'i : — Raa Isiraa'iilankeejo goongaajo, mo walaa munaafukaare.

⁴⁸ Natanayel vi'i mo : — Toye annduɗaa yam ? Yeesu vi'i mo : — Mi yi'ii ma lees ƴibbi ila Filibus noddaay ma.

⁴⁹ Natanayel vi'i mo : — Moodibbo, aan woni *Ɓiɗɗo Allah, aan woni laamiiɗo Isiraa'iila.

⁵⁰ Yeesu vi'i mo : — Gam mi vi'ii mi yi'ii ma lees ƴibbi, kanjum tan waɗi ngoonɗinɗaa yam naa ? A yi'ey ko ɓuri ɗum haaynaago.

⁵¹ Ndeen o vi'i : — Emi vi'a on goonga : on ngi'ey dow e omtii, malaa'ika'en Allah e ƴeenta e njippoyoo dow *Ɓii-Neɗɗo.