Markus 4 - Alkawal Kesal

Balndol dow aawre

¹ Kadimaa Yeesu ɓesdi ekkitingo e regorde maayo Gaaliili. Jama'aare ɗuuɗnde hawriti to ma'ako, sey nde o natti akali ndiyam o jooɗii. Hawritɓe boo njooɗii e jaarengol regorde maayo.

² O ekkitini ɓe ku'uje feere-feere e balndi. O vi'i ɓe :

³ — Ngewee nanon ! Aawoowo yahii ngesaa gam aawa aawdi.

⁴ Emo nder aawgo aawdi ndiin, sey ngoɗndi yani dow laawol, colli ngari cuɓti ndi.

⁵ Ngoɗndi boo yani nder korokaaƴe to lesdi ɗuuɗaa. Ndi fuɗi jaawɗum, gam lesdi ndiin luggaa.

⁶ Ammaa nde naange fuɗoyi fiyi ndi, sey ndi yo'ori, gam ndi walaa ɗaɗi.

⁷ Aawdi feere yani nder gi'e, sey gi'e ɗeen mawni ɗeɗɗi ndi, ndi rimaay.

⁸ Ngoɗndi boo yani dow lesdi mbooɗndi, ndi fuɗi, ndi mawni, ndi waɗi butaali. Ngoɗndi waɗi butaali talaatiin (30), ngoɗndi waɗi butaali settiin (60), ngoɗndi faa e hemre (100).

⁹ Nde Yeesu heyni valndango ɓe balndol ngool, sey o vi'i : — Mo nofru nanooru fuu, sey nana !

Ko jeyi Yeesu huutinirta balndi

¹⁰ Wakkaci nde Yeesu jooɗii feere muuɗum, *almaajiri'en ma'ako sappo e ɗiɗo e woɓɓe tokkuɓe mo njahi to ma'ako, ɓe ƴami mo o fahamina ɓe ma'ana balndol ngool.

¹¹ Sey o vi'i ɓe : — Onon on kokkaama fahamugo sirri *laamu Allah, ammaa yimɓe ɓe ngalaa nder mooɗon, koo ɗume sey e balndi.

¹² Kanjum waɗi ɗum vi'ii : « Eɓe ndaara, ammaa ɓe ngi'ataa. Eɓe nana, ammaa ɓe pahamataa. Gam to naa noon, ɗum baɗoojum ɓe nana, ɓe tuuba, ɗum ya'afanoo ɓe. »

Ma'ana balndol dow aawre

¹³ Ndeen Yeesu vi'i ɓe : — On pahamaay balndol ngool naa ? To noon, noye pahamirton balndi koriiɗi ?

¹⁴ Ko aawoowo oon aawi, ɗum voliinde Allah.

¹⁵ Aawdi njanndi dow laawol e laatii balndol nanɓe voliinde Allah, ammaa ɗoon to ɓe nani nde, ɗoon *Ceyɗaan warata hooƴa nde nder ɓerɗe maɓɓe.

¹⁶ Aawdi njanndi nder korokaaƴe boo e laatii balndol nanɓe voliinde Allah, ɗoon e ɗoon ɓe njaɓi nde e velvelo.

¹⁷ Ammaa ɓe munyey wakkaci seɗɗa tan. To caɗeele e torraa warii sabu voliinde ndeen, ɗoon e ɗoon ɓe njoofata nde, gam ɓe ngalaa ɗaɗi.

¹⁸ Aawdi njanndi nder gi'e e laatii balndol nanɓe voliinde ndeen,

¹⁹ ammaa laruuraaji duuniyaaru e yiɗde jawdi e suunooji feere-feere natti ɓerɗe maɓɓe, ɓiɗɗi voliinde ndeen, kaɗi nde rimgo.

²⁰ Aawdi njanndi dow lesdi mbooɗndi e laatii balndol nanɓe voliinde Allah, njaɓi nde, kuutiniri nde, faa ɓe mbaɗi nafri, woɓɓe talaatiin (30), woɓɓe settiin (60), woɓɓe faa e hemre (100).

Balndol fitila

²¹ Yeesu tokki vi'igo : — Moye huɓɓata fitila ndeen hippira ka tummude, koo resa ka lees leeso ? Wanaa sey o ɓila ka naa ?

²² Walaa ko suuɗii ko suuɗtataake, noon boo walaa sirrijum ɗum vanngintaake.

²³ Mo nofru nanooru fuu, sey nana !

²⁴ O ɓesdi vi'igo ɓe : — Kakkilanee ko nanoton ! E etergel ngel etroton, e ma'agel etranteeɗon, faa maa ɓesdaneeɗon.

²⁵ Gam goonɗo kam ɓesdante, mo walaa, koo kaal kal woodi maa no jaɓtete kal.

Balndol aawdi

²⁶ Yeesu tokki vi'igo : — Laamu Allah e nanndi e neɗɗo aawɗo aawdi nder ngesaa muuɗum.

²⁷ Waala fina, aawdi ndiin no fuɗey mawna, o anndaa no ndi mawniri.

²⁸ Lesdi e hoore muuɗum fuɗnata aawdi ndiin. Aran ndi waɗa ƴommbal, ndeen vutaandu, ɓaawo ma'ajum sey gite.

²⁹ To gawri ndiin ɓenndii, sey o yahada e laɓi o taƴa ndi, gam wakkaci taygo ndi warii.

Balndol gabbel mutardi

³⁰ Kadimaa Yeesu vi'i : — E ɗume nanndinireymi *laamu Allah ? E ngole balndol nanndineymi ngu ?

³¹ Engu nanndi e gabbel mutardi ɓurngel koo ngele gabbel famɗugo.

³² E noon fuu to ngel aawaama, ngel mawney, ngel ɓura koo kiye lekki mawnugo, ngel waɗa licce mawɗe-mawɗe, faa colli nyiɓa caɓɓe mu''en dow ma'aje.

³³ Yeesu huutinirii iri ɗi'i balndi ɗuuɗɗi gam wa'ajingo yimɓe voliinde Allah, deydey no ɓe mbaawi fahamirgo.

³⁴ Walaa ko o volvani ɓe naa e balndi. Ammaa wakkaci o wondi e *almaajiri'en ma'ako kamɓe tan, sey o yeccoo ɓe ma'ana balndi ɗiin.

Yeesu darnii iyoonde e henndu

³⁵ Nyannaan ɗuum alaasara Yeesu vi'i *almaajiri'en muuɗum : — Punngitemma maayo.

³⁶ Ɓe ɗali jama'aare hawritnde ɗoon, ɓe natti akali ki o woni nder muuɗum, ɓe ndillidi e ma'ako. Akale feere boo tokki ɓe.

³⁷ Sey iyoonde e henndu semmbiɗndu ummoyi, ɓoggi ndiyam mbaɗi ga fiigo akali kiin, ndiyam natti nder ma'aki, faa ki ɓadii heeɓgo.

³⁸ Yeesu boo e toon ɗaanii ɓokkorde akali kiin, emo waflii gaflel. Sey almaajiri'en ma'ako pindini mo mbi'i : — Moodibbo, a waannaaka en kalkii naa ?

³⁹ Sey o ummii o nyaaɗani henndu nduun, o vi'i ɓoggi ndiyam : — De''it ! Daraa ! Sey henndu nduun darii, koo ɗume fuu de''iti.

⁴⁰ O vi'i almaajiri'en ma'ako : — Ko jeyi kuldanɗon nihinii ? Faa jo'oni on ngoonɗinaay naa ?

⁴¹ Ɓe kultori korey, ɓe ƴamƴamtiri, ɓe mbi'i : — O'o no moye, mo faa e henndu e ɓoggi ndiyam ɗowtanto ?