Markus 3 - Alkawal Kesal

Yeesu yamɗitinii mo junngo waatngo

¹ Wakkaci feere Yeesu natti *suudu-wa'ajordu. Nder ma'aru e woodi goɗɗo mo junngo muuɗum waati.

² Woɓɓe nder ma'aru e kora mo, ngi'a kul o yamɗitiney neɗɗo oon *nyannde-fooftiinde, gam ɓe keɓa ko ɓe ngullorii mo.

³ Sey Yeesu vi'i mo junngo waatngo oon : — Umma dara ɗo'o hakkunde maɓɓe.

⁴ Ndeen Yeesu ƴami ɓe vi'i : — Ɗume *Tawreeta vi'i waɗee nyannde-fooftiinde ? Ko vooɗi nakay ko halli ? Hisnugo yonki na wargo ki ? Ammaa ɓe fuu ɓe nde''iti.

⁵ Yeesu raari ɓe nder huunƴere, ca'atal ɓerɗe maɓɓe naawi mo. O vi'i mo junngo waatngo oon : — Foortu junngo maaɗa. O foorti ngo, ngo yamɗiti.

⁶ Ɗoon e ɗoon *Fariisa'en mburtii wa'ajordu nduun, ɓe puɗɗi wa'adugo e yimɓe *Hiruudus caawara dow no ɓe mbardata Yeesu.

Yimɓe ɗuuɗɓe ngarii to Yeesu

^7-8 Ɓaawo ma'ajum, Yeesu dillidi e almaajiri'en muuɗum yahago maayo Gaaliili. Jama'aare ɗuuɗnde gada *Gaaliili e *Yahuudiya e *Urusaliima e Idumiya e fu'una maayo Urdun e ci'e Tiir e Sidon tokki mo. Jama'aare ndeen fuu wari to ma'ako, gam ɓe nanii habaru kuuɗe ɗe o waɗata.

⁹ Yeesu vi'i almaajiri'en muuɗum ngaddana ɗum akali, gam to' jama'aare hawritnde ɓiɗɗu mo.

¹⁰ O waɗii noon, gam o hoynii yimɓe ɗuuɗɓe, kanjum waɗi nyawɓe fuu mbaɗi ga nyo'indirgo gam meema mo.

¹¹ Wakkaci nde woonɓe *ginnaaji ngi'i mo fuu, sey ɓe kippoo yeeso ma'ako eɓe mbi'a e semmbee : — Aan, a *Ɓiɗɗo Allah !

¹² Ammaa o nyaaɗani ɗi to' ɗi mbanngin o moye.

Yeesu suɓii almaajiri'en sappo e ɗiɗo

¹³ Yeesu ƴeenti vaamnde, o noddi ɓe o yiɗi ngara to ma'ako. Ɓe ngari.

¹⁴ O suɓi sappo e ɗiɗo nder maɓɓe, gam ɓe ngonda e ma'ako, o lila ɓe wa'ajinoygo,

¹⁵ o hokki ɓe baawɗe tuufgo *ginnaaji.

¹⁶ Raa inɗe sappo e ɗiɗo ɓeen ɓe o suɓi : Simon mo o hokki innde Biiturus,

¹⁷ e Yaakuubu ɓii Jabadi, e minyum Yahayya ɓe o hokki innde Bowanerges, waato Ɓiɓɓe Riggaango,

¹⁸ e Anndaraawus, e Filibus, e Bartalamaawus, e Matta, e Tooma, e Yaakuubu ɓii Alfaa, e Taddiyus, e Simon kaɓaneyɗo rimɗingo lenyol muuɗum,

¹⁹ e Yahuuda Iskariyooti nyaameyɗo amaana Yeesu.

Yeesu e Ba'aljabul

²⁰ Ndeen Yeesu warti wuro. Kadimaa yimɓe ɗuuɗɓe kawriti to ma'ako, faa kanko e *almaajiri'en ma'ako ɓe mbaawaay nyaamgo nyaamdu.

²¹ Nde banndiraaɓe ma'ako nani ɗum, ɓe ngari ɓe kooƴa mo, gam ɓe mbi'aama o haaŋaama.

²² *Moodiɓɓe Tawreeta warɓe gada *Urusaliima mbi'i : — Ba'aljabul laamiiɗo *ginnaaji nanngi mo, e baawɗe muuɗum o vurtinirta ginnaaji.

²³ Ndeen Yeesu noddi ɓe valndani ɓe, vi'i : — Noye *Ceyɗaan waawrata vurtingo Ceyɗaan ?

²⁴ To laamu sennditake e honhontira, ngu waawataa daraago.

²⁵ Noon boo, to wuro sennditake e honhontira, wuro ngoon darataako.

²⁶ To Ceyɗaan ummake e hona hoore muuɗum, to o sennditake, ndeen laamu ma'ako waawataa daraago. To noon, timmoode ma'agu warii.

²⁷ Yeesu tokki vi'igo : — Walaa baaweyɗo nattugo wuro neɗɗo cemmbiɗɗo, te'eta mo areeji ma'ako, to naa o aartu o haɓɓi mo tawo, ndeen emo waawi hooygo ko woni nder wuro ngoon fuu.

²⁸ Emi vi'a on goonga : yimɓe e mbaawi ya'afaneego hakkeeji mu''en e koo iri ɗiye haalaaji yavaare ɗi ɓe mbolvi dow Allah.

²⁹ Ammaa koo moye volvi haala yavaare dow *Ruhu Ceniiɗo, o ya'afantaake sam. Hakke ɗuum e dow hoore ma'ako faa abadaa.

³⁰ Yeesu vi'ii noon gam ɓe mbi'ii ginnol o woodi.

Minyiraaɓe Yeesu e inna muuɗum

³¹ Minyiraaɓe Yeesu e inna mu''en ngari ndarii yaasi, ɓe lili goɗɗo noddoya Yeesu.

³² Jama'aare ɗuuɗnde e jooɗii filii Yeesu, sey lilaaɗo vi'i mo : — Inna maaɗa e minyiraaɓe maaɗa e toon yaasi, eɓe ngiɗi yi'igo ma.

³³ Yeesu toontii ɓe vi'i : — Moye woni inna am ? Ɓeye ngoni minyiraaɓe am ?

³⁴ O raari jooɗiiɓe filiiɓe mo, o vi'i : — Onon ngoni inna am e minyiraaɓe am !

³⁵ Gam baɗoowo ko Allah yiɗi, kam woni minyam e inna am.