Markus 1 - Alkawal Kesal

Wa'aji Yahayya baɗoowo baptisma

¹ Ɗu'um woni fuɗɗoode *Habaru Belɗum dow Yeesu *Almasiifu *Ɓiɗɗo Allah.

² Ɗum fuɗɗiri noon no ɗum vinndiraa nder deftere *annabi Ecaaya vi'igo : Allah vi'i : Mi liloyey *lilaaɗo am o aardoo yeeso maaɗa, o mo''inan maa laawol.

³ Goɗɗo e waɗa ka wooyya nder ladde e vi'a : Mo''inee ɗatal gam Jawmiraawo, poortee laawol gam garol ma'ako.

⁴ Lilaaɗo oon woni *Yahayya baɗoowo *baptisma. O vanngii nder ladde, emo wa'ajina yimɓe, emo vi'a : — Tuubee, ɗum waɗana on baptisma, keɓon ya'afuye hakkeeji mooɗon.

⁵ Yimɓe lesdi *Yahuudiya e yimɓe si'ire *Urusaliima fuu ngari to ma'ako, e ngeccoo hakkeeji mu''en, Yahayya boo e waɗana ɓe baptisma nder maayo Urdun.

⁶ Yahayya e ɓornii koltal leeɓe geelooɗi, emo taadii taadorde laral, emo nyaama baɓɓatti e njuumri ladde.

⁷ Emo wa'ajina, emo vi'a : — Goɗɗo e wara ɓaawo am, o ɓurii yam baawɗe, koo ɓoggi paɗe ma'ako mi fotaay turaago mi fiɓta.

⁸ Mi waɗanii on baptisma e ndiyam, ammaa kanko o waɗaney on baptisma e *Ruhu Ceniiɗo.

Yeesu waɗanaama baptisma

⁹ Nder balɗe ɗeen Yeesu ummii si'ire *Najaratu nder lesdi Gaaliili, o wari to Yahayya. Yahayya waɗani mo *baptisma nder maayo *Urdun.

¹⁰ Ɗoon to Yeesu vurtii ndiyam, o yi'i dow e omtii, *Ruhu Allah e jippoyoo dow ma'ako nder nanndi foondu.

¹¹ Voliinde ivoyi dow vi'i : « Aan a Ɓiyam mo ngiɗmi. Emi nana belɗum maaɗa. »

¹² Ɗoon e ɗoon Ruhu Allah yahari mo nder ladde.

¹³ Toon o waɗi balɗe arba'iin (40), *Ceyɗaan e jarraboo mo. Emo nder diiwe ladde, malaa'ika'en e kuwana mo.

Tokkuɓe Yeesu aramɓe

¹⁴ Too, ɓaawo omndeeki Yahayya nder kaso, Yeesu yahi Gaaliili e wa'ajina *Habaru Belɗum ivoyɗum to Allah.

¹⁵ Emo vi'a : — Wakkaci waɗi, *laamu Allah ɓadake. Tuubee, njaɓon Habaru Belɗum.

¹⁶ Yeesu e tokkiti regorde maayo Gaaliili, sey o yi'i Simon e minyum Anndaraawus nanngooɓe liƴƴi, e pera nanngirɗum liƴƴi nder ndiyam.

¹⁷ Sey Yeesu vi'i ɓe : — Tokkee yam, mi waɗa on waddeyɓe yimɓe to am.

¹⁸ Ɗoon e ɗoon ɓe ngoori nanngirɗum liƴƴi maɓɓe, ɓe tokki mo.

¹⁹ Nde o yahi yeeso seɗɗa, o yi'i Yaakuubu ɓii Jabadi e minyum Yahayya nder akali mu''en, eɓe mo''ina nanngirɗum liƴƴi maɓɓe.

²⁰ Ɗoon e ɗoon o noddi ɓe, ɓe ngoori baaba maɓɓe Jabadi e huwooɓe maɓɓe nder akali, ɓe tokki Yeesu.

Yeesu hoynii mo ginnol

²¹ Ɓaawo ma'ajum, Yeesu e almaajiri'en muuɗum njahi si'ire Kafarnahum. *Nyannde-fooftiinde o natti *suudu-wa'ajordu, o fuɗɗi ekkitingo.

²² Ekkitinol ma'ako haaynii ɓe, gam o ekkitiniraay ɓe noon no *moodiɓɓe Tawreeta ekkitinirta, ammaa o ekkitinii ɓe e baawɗe ɗe ngeddataako.

²³ Nder suudu-wa'ajordu nduun, e woodi goɗɗo mo *ginnol. Ɗoon e ɗoon o wulli e semmbee,

²⁴ o vi'i : — Ko waannu maa e amin Yeesu mo *Najaratu ? A warii gam halkugo min naa ? Emi anndi a moye : a Ceniiɗo ivoyɗo to Allah.

²⁵ Yeesu nyaaɗani ngol vi'i : — De''u ! Vurta nder ma'ako.

²⁶ Sey ginnol ngool giggigii mo e semmbee, ngol halɓi, ngol vurtii mo.

²⁷ Jama'aare ndeen fuu haayɗini, ɓe mbaɗi ga ƴamƴamtirgo, eɓe mbi'a : — Ɗu'um maa ɗum ɗume ? Ngo'ol ekkitinol no kesol ! O'o neɗɗo e woodi baawɗe, faa e ginnaaji e mbaɗa ko o vi'i.

²⁸ Nder wakkaci seɗɗa habaru Yeesu sankitii koo toye nder lesdi Gaaliili.

Yeesu yamɗitinii nyawɓe ɗuuɗɓe

²⁹ Ɗoon e ɗoon Yeesu e Yaakuubu e Yahayya mburtii nder suudu-wa'ajordu nduun, ɓe njahi wuro Simon e Anndaraawus.

³⁰ Esoo Simon debbo e waalii haɓda e jonte. E jottaaki Yeesu ɓe kokki ɗum habaru ma'ako.

³¹ Sey Yeesu yahi to ma'ako nanngi mo junngo ummini mo. Ɗoon e ɗoon yontere ndeen yoofi mo, o ummii o veerni ɓe.

³² Futuro, ɓaawo mutki naange, yimɓe ngaddani Yeesu nyawɓe, e woonɓe *ginnaaji ɗuuɗɓe.

³³ Sey yimɓe si'ire fuu kawriti e dammugal wuro ngoon.

³⁴ Yeesu yamɗitini nyawɓe ɗuuɗɓe ɓe nyawuuji feere-feere. Kadimaa o tuufi ginnaaji ɗuuɗɗi, o wooraay ɗi, ɗi mbolvi, gam eɗi anndi o moye.

Yeesu wa'ajinii nder lesdi Gaaliili

³⁵ Jonto ma'ajum Yeesu davi ila fajiri, o yahi woɗnde yaayre to walaa koo moye, o waɗi do'aare.

³⁶ Sey Simon e wonduɓe e muuɗum ndilli yillaago mo.

³⁷ Nde ɓe keɓti mo, ɓe mbi'i mo : — Yimɓe fuu e ngillo maa !

³⁸ Sey Yeesu vi'i ɓe : — En njah ci'e gonɗe ɗo'o ha'ade, mi wa'ajina toon maa, gam kanjum waddi yam.

³⁹ O yahi koo toye nder lesdi Gaaliili, emo wa'ajina nder *cuuɗi-ga'ajorɗi maɓɓe, emo vurtinana yimɓe *ginnaaji.

Yeesu yamɗitinii mo kuturta

⁴⁰ Goɗɗo mo *kuturta wari to Yeesu, diccii torii mo vi'i : — To a jaɓii, a waawi yamɗitingo yam.

⁴¹ Jurumɗum nanngi Yeesu, o foorti junngo, o meemi mo, o vi'i : — Mi jaɓii, yamɗit !

⁴² Ɗoon e ɗoon nyawu nguun yoofi mo, o yamɗiti.

⁴³ Sey Yeesu sallamii mo, ammaa fooɗi noppi ma'ako vi'i :

⁴⁴ — Hakkil, ta'a vi'i ka koo moye, ammaa yah kollaa hoore maaɗa to *aardiiɗo diina, mbaɗaa sadaka ka Muusa vi'i ɗum waɗa, gam a laɓɓinaama. Waɗ ɗum, gam anndingo yimɓe a yamɗitii.

⁴⁵ Ammaa kanko o dilli o fuɗɗi sankitgo habaru ɗuum koo toye, faa Yeesu waawaay nattugo si'ire. O jooɗii nder ladde. Yimɓe mbaɗi ga wargo to ma'ako gada koo toye.