Ibrankooɓe 1 - Fulfulde Niger West

Iisa, laawol ngol Alla haaldiri himɓe

¹ Illa fil'ajal, kile keewɗe Alla haaldi maamiraaɓe meeɗen har annabiiɓe mum he har laabi iri-iriiji.

² Amma nder wakkati cakitiiɗo oo, o haaldirii en har Ɓiyiiko, mo o suɓii, o waɗi donoowo huune fuu. Kanko duu o tagiri huune fuu.

³ Kanko laatii annuura mawɗo kolloowo teddungal Alla. Omo nii no Alla wa'i goonga e goonga. Har haala makko ngooduka baawɗe, omo dawrana huune fuu. Gaɗa ko o laatii laawol laaɓinol himɓe yahde he hakkeeji mum'en, o ƴencinaa, o jooɗowi nyaamo Alla Jom baawɗe e teddungal.

⁴ Nii waɗi ko Iisa ɓuri maleykaaɓe fuu manngu hano no innde nde o hokkaa ndee ɓurdi inɗe maɓɓe.

Ɓiɗɗo ɓurɗo maleykaaɓe

⁵ Iisa ɓuri maleykaaɓe fuu manngu ngam walaa maleykaajo mo Alla wi'anii : Aan a Ɓiyam. Ɓaawo hannden, miin woni *Baaba maa. Naa kaden walaa maleykaajo mo o wi'anii kam laatoto *Baaba mum, maleykaajo oon duu laatoto Ɓiyiiko.

⁶ Wakkati o lilannoo Afo makko oo nder duuniyaaru, o wi'i : Maleykaaɓe makko fuu cujidana mo.

⁷ Dow maleykaaɓe ɓeen o wi'i : Kam no lila ɓe hano keni. Omo waɗa ɓe ngollana mo hano ɗemle hiite.

⁸ Amma dow Ɓiyiiko, o wi'i : Aan a Alla hano am, laamu maa duuman faa abada abadin ! Sawru potal woni sawru ndu laamortoɗaa.

⁹ Aɗa hiɗi dartinaaku, aɗa wanyi oonyaare. Ngam majjum waɗi, o wi'i : Miin, Alla Joomiraawo suɓii ma, wujii ma nebbam, hokki ma belɗum ɓerne ɓurde wonndiraaɓe ma fuu.

¹⁰ No winndaa duu, wi'aa : Illa fuɗɗorde, aan Joomiraawo, joƴƴini beɗi leydi, e juuɗe maa tagirɗaa beɗi kammu.

¹¹ Kanƴi, ɗi timman. Amma aan kay, a heddoto. Ɗi fuu ɗi kiɗɗan hano no koltal hiɗɗirta.

¹² A sowiran ɗi no alkubbaare sowirtee, ɗi mbattitirtee hano no koltal wattitirtee. Amma aan kay, a wattitittaa, mbuurnam maa duu walaa timmoode.

¹³ Baa nde worre, Alla wi'aay maleyka oo naa ooto : War, njooɗaa nyaamo am, faa mi sorna wayɓe maa ley teppere maa.

¹⁴ Maleykaaɓe nee kanaa ruuhuuji gollanooji Alla non naa ? Hanaa kamɓe lilaa mballowa ronooɓe kisinam naa ?