Vakatakila 1 - Ai Vola Tabu (Vakadewa Makawa Vakavoutaki 2021)

¹ Ai vakatakila kei Jisu Karisito, ka solia vei koya na Kalou me vakaraitaka vei ira na nona tamata dauveiqaravi na ka sa voleka ni yaco mai; a sa tala ko koya na nona agilosi me tukuna vei Joni na nona tamata,

² o koya ka tukuna na vosa ni Kalou, kei nai tukutuku kei Jisu Karisito, kei na ka kece sara sa raica ko koya.

³ Sa kalougata ko koya sa wilika, kei ira era sa rogoca na vosa ni parofisai oqo, ka vakabauta na ka sa volai kina, ni sa voleka na kena gauna.

Veikidavaki ki na Soqosoqo Lotu e Vitu

⁴ Ko Joni, kivei ira nai soqosoqo lotu e vitu mai Esia: Me nomudou na loloma, kei na vakacegu, mai vei koya sa bula edaidai, ka bula eliu, ka na bula talega e muri; mai vei iratou talega na yalo e vitu eratou sa tiko e na mata ni nona i tikotiko-vakaturaga,

⁵ mai vei Jisu Karisito talega, na dautukutuku yalodina, na ulumatua vei ira era sa tucake tale mai na mate, kei na nodra Turaga levu na tui e vuravura. Vei koya sa lomani keda, ka savai keda mai na noda i valavala ca e na nona dra dina,

⁶ a sa qisi keda me da tui ka bete vua na Kalou kei Tamana; me sa ia vei koya na vakarokoroko kei na lewa ka tawa mudu. Emeni.

⁷ Raica, sa lako mai ko koya e na o; ka na raici koya na mata kecega, ko ira talega era a suaki koya; ena tagi na veiyavusa kecega e vuravura e na vukuna. Sa na yaco me vaka ga oqo. Emeni.

⁸ Sa kaya na Turaga na Kalou, “Koi au na Alifa kei na Omeka” [nai vakatekivu kei nai vakataotioti], o koya ka bula eliu, ka bula edaidai, ka na bula talega e muri, o Koya sa Kaukauwa.

A Raivotu me Baleti Karisito

⁹ Koi au ko Joni, na wekamudou talega, kei nai tokani e na veivakacacani, kei na matanitu kei na vosota nei Jisu, au a tiko e na yanuyanu ko Patimo, e na vuku ni vosa ni Kalou, kei nai tukutuku i Jisu.

¹⁰ Keirau a tiko kei na Yalo Tabu e na siga ni Turaga, ia ka'u a rogoca e dakuqu na domo levu, e vaka na davui,

¹¹ ni sa kaya, “Ia, na ka ko sa raica, mo vola e nai vola, ka vakauta ki nai soqosoqo lotu e vitu mai Esia, ki Efeso, kei Simurina, kei Perikamo, kei Caetaira, kei Sariti, kei Filadelafia, kei Leotisea.”

¹² Au a qai rai vuki me'u raici koya ka vosa mai vei au. Ia ni'u sa rai vuki, sa vitu nai tutu-ni-cina koula ka'u sa raica;

¹³ ia sa tu e dua e na kedra maliwa nai tutu-ni-cina e vitu, e vakataki koya na Luve ni Tamata, sa vakaisulu e nai sulu sa yaco sara ki na yavana, ka vau na lomaserena e nai vau koula.

¹⁴ Sa vulavula na uluna kei na drau ni uluna me vaka na vutika ni sipi, me vaka na vulavula ni uca-vulavula; ka sa vaka na yameyame ni buka na matana;

¹⁵ ia na yavana sa vaka na parasa makumakualiliva me vaka ni sa vakaririgi e na kuro; a sa vaka na vadugu ni wai e vuqa na domona.

¹⁶ Sa taura e na ligana i matau e vitu na kalokalo, ia ka sa lako mai na gusuna nai seleiwau gata ka batirua, ia na matana sa vaka na mata-ni-siga ni sa cila vakaukauwa.

¹⁷ Ia ni'u sa raici koya, ka'u sa bale sara ki yavana me vaka e dua sa ciba. A sa tabaki au e na ligana i matau, ka kaya vei au, “Kakua ni rere, koi au ko koya sa liu sara, ko koya ena muri sara talega,

¹⁸ o koya sa bula. Ka'u a mate eliu, ka raica, au sa bula ka tawa mudu; ka'u sa taura talega nai dola kei Mate vata kei Etesi.

¹⁹ Ia na veika ko sa raica oti mo vola, kei na veika sa tu, kei na veika ena yaco mai muri.

²⁰ Na ka vuni ni kalokalo e vitu, ko a raica e na ligaqu i matau, kei nai tutu-ni-cina koula e vitu; a kalokalo e vitu sa nodra i talatala nai soqosoqo lotu e vitu; ia nai tutu-ni-cina e vitu ko a raica, nai soqosoqo lotu e vitu.