Kolosa 4 - Ai Vola Tabu (Vakadewa Makawa Vakavoutaki 2021)

¹ Oi kemudou na turaga, dou solia vei ira na tamata na ka e dodonu ka tautauvata; ni dou sa kila sa dua talega na nomudou Turaga mai lomalagi.

Nai Vakasala Tale Eso

² Mo dou daumasu tikoga, ka cikevaka tiko ka vakavinavinaka;

³ ka masulaki keitou talega, me dolava vei keitou na Kalou na katuba ni vosa, me keitou tukuna na ka vuni kei Karisito, o koya ka'u sa vesu tu kina,

⁴ me'u vakaraitaka oqo, me vaka sa kilikili kei au me'u tukuna.

⁵ Dou ia tiko nai valavala vuku vei ira e taudaku, ka volia me nomudou na gauna.

⁶ Me ia tikoga na nomudou vosa e na yalovinaka, ka vakatuituinataki e na masima, mo dou kila kina se cava sa dodonu mo dou kaya tale vei ira na tamata yadua.

Tini nai Vola e nai Loloma Eso

⁷ Ena tukuna vei kemudou na ka kecega sa yacovi au ko Tikiko, a wekaqu ka'u sa lomana, kei nai talatala yalodina, ka i tokani dauveiqaravi e na Turaga.

⁸ Ia ka'u sa talai koya vei kemudou e na vuku ni ka oqo, mo dou kila na neitou tiko, ka me vakaceguya na yalomudou ko koya;

⁹ oi rau kei Onisimo, na wekaqu sa yalodina ka'u sa lomana, o koya sa dua vei kemudou. Erau na vakatakila vei kemudou na ka kecega sa caka eke.

¹⁰ Sa loloma yani vei kemudou ko Arisitako keirau sa vesuki vata kaya, kei Marika na luve ni gane i Panapasa (o koya dou sa vakaroti oti kina, kevaka sa lako vei kemudou, dou vakacegui koya),

¹¹ kei Jisu, a yacana talega ko Jusito, eratou sa cili. O iratou ga oqo eratou sa daucakacaka vata kei au e na ka ni matanitu ni Kalou, ka ratou sa dauvakacegui au.

¹² Sa loloma yani vei kemudou ko Epafira, e dua vei kemudou, ka dauveiqaravi i Karisito Jisu, ka sa daugumatua tikoga e na masulaki kemudou, mo dou tudei kina ka matua sara ka vakasinaiti tu e na ka kece sa loma ni Kalou.

¹³ Ni'u sa vakadinadina vua ni sa cakacaka vakaukauwa sara e na vukumudou, e na vukudra talega mai Leotisea, kei na vukudra mai Aiarapoli.

¹⁴ Sa loloma yani vei kemudou ko Luke, na vuniwai lomani, ka vakakina ko Timasa.

¹⁵ Au sa loloma yani vei ira na veiwekani mai Leotisea, vei Nimifa talega, vei ira talega nai soqosoqo lotu mai nona vale.

¹⁶ Ia ni sa wili oti nai vola oqo vei kemudou, dou lewa me wili talega vei ira nai soqosoqo lotu mai Leotisea; mo dou wilika talega nai vola vei ira ki Leotisea.

¹⁷ Kaya talega vei Akipo, “Mo vakaraica vinaka na cakacaka ko sa ciqoma mai vua na Turaga, mo vakayacora sara.”

¹⁸ Au sa loloma yani ka vola e na ligaqu dina, koi au ko Paula. Dou nanumi au ni'u sa vesu tiko. Me nomudou na loloma. Emeni.