Jope 40 - Ai Vola Tabu (Vakadewa Makawa Vakavoutaki 2021)

¹ A sa vosa vei Jope ko Jiova ka kaya:

² “Ko koya sa veileti kei Koya sa Kaukauwa, ena vakavulici koya beka talega? Ko koya sa vunauca na Kalou me vosa mada kina.”

Na Vosa i Jope Vua na Kalou

³ Sa qai vosa vei Jiova ko Jope, ka kaya:

⁴ “Ni raica mada, ni'u sa ka walega; a cava beka me'u kaya vei kemuni? Au sa tabonaka ga na gusuqu e na ligaqu.

⁵ Au sa vosa oti vakadua, ka'u na sega ni vosa tale; sa vakarua, ia ka'u na sega ga ni kuria tale.”

Na Bolebole ni Kalou vei Jope

⁶ Sa qai vosa tale vei Jope ko Jiova mai na covulaca, ka kaya:

⁷ “Mo vauca mada vakatagane na tolomu; ka'u na vakatarotarogi iko, ia mo vakatakila mai vei au.

⁸ Ko sa via vakatawayagataka beka na noqu lewa? Ko sa via vakacalai au, mo dodonu kina ko iko?

⁹ A ligamu beka sa vaka na liga ni Kalou, ka ko sa kurukuru rawa beka e domomu me tautauvata kaya?

¹⁰ “Mo vakaiukuukutaki iko mada e na ka vakaturaga kei na vakarokoroko; ka vakaisulutaki iko e nai ukuuku kei na lagilagi.

¹¹ Mo sovaraka mada na katakata ni nomu cudru, ka raici ira yadua sa viavialevu ka vakayalomalumalumutaki ira.

¹² Mo raici ira kecega era sa viavialevu, ka vakalailaitaki ira sobu; ka buturaki ira nai valavala ca e na nodra i tikotiko.

¹³ Mo vunitaki ira vata e na kuvu-ni-soso; vauca na matadra e na vuravura e ra.

¹⁴ Ka'u na qai vakadinadina vei iko ni sa rawa ni vakabulai iko na ligamu i matau.

¹⁵ “Raici Biemoci mada, ko koya ka'u sa bulia me vaka ga na noqu buli iko; sa daukana co ko koya me vaka na bulumakau.

¹⁶ Sa tiko e tolona na nona kaukauwa, kei na nonai gu sa tiko e na ua ni ketena.

¹⁷ Sa cakava na buina me dodonu ka kaukauwa me vaka na sitari; na masela e na viciko ni sagana sa tobe vata.

¹⁸ Na kaukauwa ni suina sa vaka na paipo parasa, kei na yavana sa vaka na duru kaukamea.

¹⁹ “Ko koya ka sa i sevu ni cakacaka cecere ni Kalou— ko koya ga ka sa bulia ena rawa ni vorata tale e nai seleiwau.

²⁰ Ni sa vakatubura na kena kakana na veiulunivanua e na vanua era sa dauqito voli kina na manumanu kila kecega.

²¹ Sa davo koto e na ruku ni kau rugurugua, e na ruku ni gasau kei na lolobo.

²² Sa vakarurugi koya na yaloyalo ni kau rugurugua; sa tu voliti koya na wilou mai na wai drodro.

²³ Raica, ni sa vuabale na uciwai, sa sega ni rere ko koya; sa yatedei ga ni sa drodro sara mai na Joritani ki na gusuna.

²⁴ Ena rawai koya beka e dua e nai qila, se na cula rawa na ucuna e nai cori?