Filipai 4 - Ai Vola Tabu (Vakadewa Makawa Vakavoutaki 2021)

Nai Vakasala Eso

¹ O koya mo dou qai tudei vua na Turaga, oi kemudou na wekaqu ka'u sa dau lomana, ka gu kina na yaloqu, au sa reki kina, ka'u sa lagilagi kina, oi kemudou ka'u sa dau lomana.

² Au sa masuti Uotia, au sa masuti Sainitiki talega, me rau lomavata e na Turaga.

³ Au sa masuti iko talega, nai tokani dina, mo vukei rau na yalewa oqo, oi rau ka daucakacaka vata kei au e nai tukutuku-vinaka, kei Kelemedi talega, kei ira tale na noqu i tokani sa tu na yacadra e nai vola ni bula.

⁴ Dou reki tikoga vua na Turaga; au sa kaya tale, Dou reki.

⁵ Me kilai na nomudou yalomalumalumu vei ira na tamata kecega. Sa voleka na Turaga.

⁶ Dou kakua sara ni lomaocaoca, ia e na ka kecega me vakatakilai vua na Kalou na nomudou kerekere e na masu kei na daucikecike kei na vakavinavinaka.

⁷ Ia na vakacegu ni Kalou, sa uasivia na ka kecega e kilai rawa, ena vakataudeitaka na yalomudou kei na lomamudou e na vuku i Karisito Jisu.

⁸ Me'u tinia, na veiwekani, a ka kecega sa dina, na ka kecega e vakaturaga, na ka kecega e dodonu, na ka kecega e savasava, na ka kecega e daulomani, na ka kecega e rogorogo vinaka, ia kevaka sa dua na ka e vinaka, se na ka e daudokai, dou nanuma na veika oqo.

⁹ A veika dou sa vakatavulici kina, ka vakabauta, ka rogoca, ka raica vei au, dou cakava tikoga; ena qai tiko vata kei kemudou na Kalou ni veivakacegui.

Vakavinavinakataki nai Loloma

¹⁰ Ia ka'u sa reki vakalevu e na Turaga, ni sa qai tubu cake tale edaidai na nomudou daunanumi au. Dou a daunanuma talega eliu, ia ka sa sega ni rawa vei kemudou.

¹¹ Au sa sega ni vosa ni'u sa dravudravua; ni'u sa vakatavulici, me'u vakacegu tiko, e na ka kecega sa yaco vei au.

¹² Au sa kila na vakadravudravuataki, ka'u sa kila talega na vakavutuniyautaki. E na veiyasana kei na ka kecega ka'u sa vakatavulici kina me'u mamau, me'u viakana talega, ka me'u vutuniyau, me'u dravudravua talega.

¹³ Au sa rawata na ka kecega e na vuku i Karisito o koya sa vakaukauwataki au.

¹⁴ Ia dou sa caka vinaka, ni dou sa solia na ka eso ni'u sa vakararawataki.

¹⁵ Ia dou sa kila talega, koi kemudou na kai Filipai, ni sa vakatekivu nai tukutuku-vinaka, ni'u a lako tani e Masitonia, sa sega e dua nai soqosoqo lotu sa vukei au ni sa soli-ka vei au, koi kemudou duaduaga.

¹⁶ Ia mai Cesalonaika dou a vukei au mada vakadua, ka qai veivuke tale e na noqu dravudravua.

¹⁷ Ni ka'u sa sega ni gadreva nai solisoli, ia ka'u sa gadreva ga na vua me uasivi cake e na vukumudou.

¹⁸ Ia sa tu vei au na ka kecega, ka'u sa vutuniyau. Au sa mamau, ni'u sa rawata mai vei Epafirotaito na veika mai vei kemudou, a ka boi vinaka, ai madrali sa vinakati ka sa vinaka sara vua na Kalou.

¹⁹ Ia na noqu Kalou ena solia me rauta kecega na nomudou dravudravua, me vaka na nona i yau levu e na vuku i Karisito Jisu.

²⁰ Me ia na vakarokoroko vua na Kalou na Tamada, ka tawa mudu. Emeni.

Vakadewataki nai Loloma

²¹ Au sa loloma yani vei ira kecega era sa lotu, era sa tu vata kei Karisito Jisu. Era sa loloma yani vei kemudou ko ira na veiwekani era sa tiko vata kei au.

²² Sa loloma yani vei kemudou ko ira kecega era sa lotu, ka sa vakalevu ko ira na lewe-ni-vuvale i Sisa.

²³ Me nomudou kecega na loloma ni noda Turaga ko Jisu Karisito. Emeni.