Filipai 2 - Ai Vola Tabu (Vakadewa Makawa Vakavoutaki 2021)

Na Yalo Malumalumu i Karisito kei na Nona Cecere

¹ Ia kevaka sa tu na veivakacegui e na vuku i Karisito, se tu na veivakalecataki ni loloma, se tu na veilomani ni Yalo Tabu, se tu na yalololoma kei na yalovinaka,

² mo dou vakayacora sara na noqu marau, mo dou lomavata kina, mo dou tautauvata e na loloma, mo dou lomavata, mo dou yalovata.

³ Me kakua ni caka e dua na ka e na veileti se na veidokadokai walega; mo dou yalomalumalumu ka dui vakasama ni sa uasivi cake vua ko koya kadua.

⁴ Mo dou kakua ni nanuma na veika ga me baleti kemudou yadua, ia mo dou dui nanuma talega na veika me baleti ira na tamata tani.

⁵ Me tiko e na lomamudou na yalo oqo ka tiko talega vei Karisito Jisu,

⁶ o koya, ni sai tovo vata kei na Kalou, sa sega ga ni vakayaco lomana ni sa vakatauvatani kei na Kalou;

⁷ ia sa vakadravudravuataki koya, ka kauta vua nai tovo ni tamata dauveiqaravi, ka sa buli me tautauvata kei na tamata;

⁸ ka sa kune ni sai tovo vata kei na tamata, sa vakayalomalumalumutaki koya, ka sa talairawarawa me mate— io me mate e na kauveilatai.

⁹ O koya oqo sa vakalevulevui koya cake kina na Kalou, ka sa solia vua e dua na yaca sa uasivi cake mai na yaca kecega,

¹⁰ me tekiduru kina e na yaca i Jisu na duru vakaaduaga mai lomalagi, kei vuravura, kei na ruku i vuravura,

¹¹ me vakatusa talega na yame kecega ni sa Turaga ko Jisu Karisito, me vakarokorokotaki kina na Kalou na Tamada.

Cila Serau me Vaka na Cina e Vuravura

¹² O koya oqo, vei kemudou ka'u sa dau lomana, me vaka na nomudou talairawarawa e na veigauna sa oti, ka dou sa sega ni ia walega ni'u sa tiko vei kemudou, ia dou sa uasivi cake kina ni'u sa takali, mo dou qai cakacakataka kina na nomudou sa vakabulai e na rere kei na sautaninini;

¹³ ni sai koya na Kalou sa cakacaka tiko e na lomamudou, ka sa vakavuna mo dou vinakata ka kitaka nai naki vinaka ni lomana.

¹⁴ Me kakua sara na daudidi kei na veileti e na nomudou cakacaka kecega,

¹⁵ mo dou kakua kina ni vunauci rawa, ka tawa cala mo dou luve ni Kalou ka sega ni beitaki me ca e na kedra maliwa nai tabatamata takelo ka lomavakatani, mo dou sa cila e na kedra maliwa me vaka na veicina e vuravura,

¹⁶ ni dou sa taura tiko na vosa ni bula, me'u reki kina e na siga i Karisito ni'u sa sega ni cici walega se'u daucakacaka walega.

¹⁷ Ia kevaka ka'u sa sovaraki yani e na nomudou vakabauta ni'u sa cabori mei madrali, au sa reki kina, ka marau vata kei kemudou kecega—

¹⁸ e na vuku ni ka oqo mo dou reki talega koi kemudou, ka marau vata kei au.

Ko Timoci kei Epafirotaito

¹⁹ Ia ka'u sa vakanuinui vua na Turaga ko Jisu ni sa voleka na noqu talai Timoci vei kemudou, me'u vakacegui talega, ni'u sa kila na nomudou tiko.

²⁰ Ni sa sega e dua sa tiko vei au sa yalovata kaya, me daunanuma na veika me baleti kemudou e na lomana dina.

²¹ Ni ra sa vakasaqara na veika me baleti ira ga ko ira kecega, ka segai na veika me baleti Jisu Karisito.

²² Ia dou sa kilai koya ni sa vakatovolei, ni sa vaka na gone vei tamana, sa daucakacaka vata kei au e nai tukutuku-vinaka.

²³ O koya ka'u sa nakita kina me malua vakalailai ka'u na qai talai koya yani, me'u kila mada se sa na vakaevei koi au.

²⁴ Ia ka'u sa vakararavi vua na Turaga ni'u sa voleka talega koi au me'u lako yani.

²⁵ Ia ka'u sa vakasama ni sa dodonu me'u talai Epafirotaito mada vei kemudou—na taciqu kei na noqu i caba e na cakacaka, kei na noqu i tokani e nai valu oqo, kei na nomudou i talatala, kei koya sa vukei au e na noqu dravudravua.

²⁶ Ni sa gu yani vei kemudou kecega, a sa rarawa na yalona, ni dou a rogoca sa tauvi-mate ko koya.

²⁷ E dina ga sa tauvi-mate ka sa voleka ni ciba. Ia ka sa yalovinaka vei koya na Kalou, a sa sega walega vei koya, vei au talega, de vakaikuritaki na noqu rarawa e na dua tale na ka rarawa.

²⁸ O koya oqo ka'u sa gumatua cake kina me'u talai koya, mo dou reki kina, ni dou sa raica tale, ka me lailai sobu kina na noqu rarawa.

²⁹ O koya mo dou qai vakacegui koya e na Turaga, e na reki levu sara, ka mo dou dokai ira era sa vakakina,

³⁰ ni sa voleka ni mate ko koya e na vuku ni cakacaka i Karisito, a sa sega ni taleitaka na nona bula, me vakaikuritaka na nomudou cakacaka vei au sa vo tu.