Esera 1 - Ai Vola Tabu (Vakadewa Makawa Vakavoutaki 2021)

Sa Vakarota ko Sairusi me Lesu ki Juta ko Ira na Jiu

¹ Ia e nai matai ni yabaki i Sairusi na tui Perisia, me vakayacori kina na vosa i Jiova e na gusu i Jeremaia, sa vakauqeta na yalo i Sairusi na tui Perisia ko Jiova, me sa kacivaki yani kina na vosa e na veiyasana kecega e na nona matanitu, a sa vola talega, ka vaka:

² “Sa kaya vakaoqo ko Sairusi na tui Perisia: Sa solia kivei au ko Jiova na Kalou ni lomalagi na veimatanitu kecega e vuravura; a sa vakaroti au me'u tara e dua na vale mai Jerusalemi me nona, ko ya mai Juta.

³ O koya yadua vei ira kecega na nona tamata sa tiko vata kei kemudou—me tiko kei ira na nodra Kalou!—sa vakadonui oqo me ra lako cake ki Jerusalemi mai Juta, ka tara na vale i Jiova, na nodra Kalou na Isireli—sai koya na Kalou sa tiko mai Jerusalemi.

⁴ Ia ko koya sa vo tiko e na dua na yasana sa tiko vulagi kina, me vukei koya ko ira na tamata e na nona yasana e na siliva, kei na koula, kei nai yau, kei na manumanu, me kenai kuri ni ka sa yalodra me ra solia e na vuku ni vale ni Kalou mai Jerusalemi.”

⁵ Sa qai tucake ko ira na nodra qase turaga na Juta kei Penijamini, kei ira na bete, kei ira na Livai—ko ira kecega sa vakauqeta na yalodra na Kalou—me ra lako cake me tara na vale i Jiova mai Jerusalemi.

⁶ Ko ira kecega era sa tiko voleka vei ira sa vukei ira e nai yaya siliva, kei na koula, kei nai yau, kei na manumanu, kei nai yau talei, ia oqo nai kuri ni ka kecega era sa solia e na yalo e vinakata.

⁷ A sa kauta talega ko Sairusi na tui nai yaya ni vale i Jiova ka kauta mai Jerusalemi ko Nepukanesa, ka vakacuruma ki na bure ni nona kalou.

⁸ Ia na veika oqo sa vakauta mai ko Sairusi na tui Perisia e na liga i Miciritaci na dauniyau, ka wilika vei Sesipasa na turaga ni Juta.

⁹ Ka sa vakaoqo na kedrai wiliwili: e tolusagavulu na dari koula, e dua na udolu na dari siliva, e ruasagavulu ka ciwa nai sele,

¹⁰ e tolusagavulu na beseni koula, a bilo siliva sa lailai sobu na kena yaga e va na drau ka tini, kei nai yaya tani e dua na udolu.

¹¹ Nai yaya koula kecega kei na siliva, sa lima na udolu ka va na drau. Sa kauta cake kece ko Sesipasa, kei ira na bobula era sa kau cake mai Papiloni ki Jerusalemi.