Cakacaka 2 - Ai Vola Tabu (Vakadewa Makawa Vakavoutaki 2021)

Na Lako Mai ni Yalo Tabu

¹ Ia ni sa yaco sara na siga ni Penitiko, era sa tiko lomavata ko ira kecega e na dua na tikina.

² Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, a sa vakasinaita na vale taucoko era sa tiko kina.

³ A sa rairai vei ira na ka e vaka na veiyameyame ni bukawaqa sa dui veisebayaki, a sa tiko yadua vei ira vakaaduaga.

⁴ A ra sa vakasinaiti kecega e na Yalo Tabu, a ra sa vakatekivu me vosataka na vosa tani eso, me vaka sa solia vei ira na Yalo Tabu me ra cavuta.

⁵ A sa tiko mai Jerusalemi na Jiu eso, a tamata lotu, mai na veivanua kecega e ruku i lomalagi.

⁶ Ia ni sa rogovaki yani na ka oqo, era sa soqoni vata na lewe vuqa, a ra sa kurabui ni ra sa dui rogoci ira na tamata yadua ni ra sa vosataka na nona vosa.

⁷ A ra sa kidacala kecega ka kurabui, ka kaya vakai ira, “Raica, era sa sega li ni kai Kalili ko ira kecega oqo era sa vosa?

⁸ Ia ka vakaevei oqo ni da sa rogoca koi keda kecega, e na noda vosa eda a sucu kaya?

⁹ Ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia, kei Kapatosia, mai Ponito, kei Esia,

¹⁰ mai Firijia, kei Pamifilia, mai Ijipita, kei na yasayasa vaka-Libiya e voleka ki Kirini, kei ira na vulagi mai Roma, ko ira na Jiu, kei ira sa vuki ki na lotu vaka Jiu,

¹¹ ko ira na kai Kiriti kei Arapea—eda sa rogoci ira ni ra sa tukuna e na noda vosa na nona cakacaka veivakurabuitaki na Kalou.”

¹² A ra sa kurabui kecega ka kidroa, ka sa veikayaka vakai ira, “A cava nai balebale ni ka oqo?”

¹³ Ia era sa vakalialia ko ira eso tale, ka kaya, “Era sa mateni e na waini vou.”

Sa Vunau ko Pita

¹⁴ Sa qai tucake ko Pita, kei ira na le tinikadua, ka sa tabalaka cake na domona, ka tukuna vei ira, “Oi kemudou na Jiu, kei kemudou kecega sa tiko e Jerusalemi, mo dou kila na ka oqo, ka rogoca na noqu vosa.

¹⁵ Ni ra sa sega ni mateni ko ira oqo, me vaka na ka dou sa nanuma, ni sa kenai katolu ga ni aua.

¹⁶ Ia sai koya ga oqo sa tukuna na parofita ko Joeli:

¹⁷ ‘Sa kaya na Kalou, Ena yaco e na gauna mai muri, ka’u na sovaraka na Yaloqu kivei ira na tamata kecega, era na parofisai kina ko ira na nomudou gonetagane kei ira na nomudou goneyalewa, ia ena raica na raivotu eso ko ira na nomudou cauravou, ia ena tadrataka na tadra eso ko ira na nomudou qase.

¹⁸ Io, vei ira talega na noqu tamata kei na noqu vada, ka’u na sovaraka na Yaloqu e na gauna ko ya; a ra na parofisai kina.

¹⁹ Ia ka’u na vakatakila na ka e veivakidacalataki eso mai lomalagi e cake, kei nai vakatakilakila eso e vuravura e ra, na dra, kei na bukawaqa, kei na o kubou.

²⁰ Ena vuki na mata-ni-siga me butobuto, kei na vula me dra, ena qai yaco e muri na siga i Jiova sa levu ka rogo tiko.

²¹ Ia ena yaco ko koya yadua ena masuta na yaca i Jiova ena bula.’

²² “Oi kemudou na tamata na Isireli, rogoca na vosa oqo: Ko Jisu na kai Nasareci, a tamata sa vakadinadinataka vei kemudou na Kalou e na cakacaka-mana, kei na ka e veivakurabuitaki eso, kei nai vakatakilakila eso, sa solia na Kalou kivei koya me cakava e na kemudou maliwa, me vaka dou sa kila—

²³ ko Jisu oqo, ni sa soli oti yani vei kemudou, me vaka ka nakita dina na Kalou ka lewa eliu, dou sa taura ka vakota ki na kauveilatai ka vakamatea e na ligadra na tamata ca.

²⁴ Ia sa vakaturi koya cake na Kalou, ni sa sereki koya mai nai vau ni mate, ni sa sega ni rawa me vauci tikoga kina ko koya.

²⁵ Ni sa vosa me baleti koya ko Tevita, ka kaya, ‘Au a raici Jiova tikoga ni sa tu e mataqu, ni sa tu ko koya e na ligaqu i matau, ka’u sa sega kina ni vakayavalati;

²⁶ o koya oqo sa reki kina na yaloqu, ka sa marau na yamequ; ena vakacegu talega na lewequ e nai nuinui.

²⁷ Ni kemuni na sega ni biuta na yaloqu mai Etesi, se laiva na nomu Le Dua Yalosavasava me vakacacani.

²⁸ Ko ni sa vakatakila mai vei au na sala ni bula; ko ni na vakasinaiti au e na marau mai na matamuni.’

²⁹ “Oi kemudou na veiwekani, dou vosota ni’u sa doudou me'u tukuni Tevita na noda qase vei kemudou, ni sa mate ko koya ka bulu, ka sa tu ga vei keda na nona i bulubulu ka yacova na siga oqo.

³⁰ Ia ni sa parofita ko koya, a sa kila ni sa bubului vua na Kalou ni na tubu mai vua ko ira ena vakatubura mai kina ko koya na Karisito, me tiko e na nona i tikotiko vakaturaga.

³¹ Ia ni sa kila eliu, sa tukuna na nona tucake tale mai na mate na Karisito, ‘ni na sega ni biu tu mai Etesi, se me vuca mai na yagona.’

³² Ko Jisu oqo sa vakatura cake na Kalou, ka sai vakadinadina ni ka oqo koi keitou kecega.

³³ Ia ni sa kau cake e na liga i matau ni Kalou, ka rawata ko koya mai vei Tamana na Yalo Tabu ka yalataki, sa qai sovaraka mai na ka oqo, dou sa qai raica ka rogoca.

³⁴ Ni sa sega ni lako cake ki lomalagi ko Tevita, ia sa kaya ko koya, ‘Sa kaya ko Jiova vua na noqu Turaga, “Mo tiko e na ligaqu i matau,

³⁵ me yacova ni'u sa vakamalumalumutaki ira mada na nomu meca mei tutu-ni-yavamu.” ’

³⁶ O koya oqo, me kila sara kina na vale i Isireli taucoko ni ko Jisu oqo, ko koya dou a vakota ki na kauveilatai, sa lesia na Kalou me Turaga ka Karisito talega.”

Nai Sevu ni Lotu

³⁷ Ia ni ra sa rogoca, sa laucoka na yalodra, a ra sa kaya vei Pita kei ira nai apositolo sa vo, “Oi kemudou na veiwekani, a cava me keimami kitaka?”

³⁸ Sa qai kaya vei ira ko Pita, “Dou veivutuni, ka papitaisotaki, koi kemudou yadua, e na yaca i Jisu Karisito, me vosoti kina na nomudou i valavala ca, ka dou na rawata na Yalo Tabu mei solisoli.

³⁹ Ni sa caka vei kemudou na vosa ni yalayala, vei ira talega na nomudou gone, kei ira vakaaduaga era sa vakayawa, io, vei ira vakayadua ga ena kacivi ira vua na Turaga na noda Kalou.”

⁴⁰ Ia sa vuqa tale na vosa sa tukuna ko koya ka vakarota, ka kaya, “Dou vakabulai kemudou mai nai tabatamata takelo oqo.”

⁴¹ Ia ko ira sa vakabauta na nona vosa, era sa papitaisotaki, ka sa kenai kuri vei ira sa lotu e na siga ko ya e lewe tolu beka na udolu na tamata.

⁴² A ra sa qarava matua na nodra i vakavuvuli nai apositolo kei na veilomani, kei na dovi madrai, kei na masumasu.

Na Bula ena Kedra Maliwa na Vakabauta

⁴³ A sa kani ira kecega na rere; a sa levu na ka e veivakurabuitaki kei nai vakatakilakila era sa kitaka ko ira nai apositolo.

⁴⁴ Ia ko ira kecega sa vakabauta era sa tiko vata, a ra sa dui solia na nona i yau yadua me ra taukena vata;

⁴⁵ a ra sa volitaka na nodra vanua kei na nodra i yau, a ra sa vota kivei ira kecega, me vaka na nodra dui dravudravua.

⁴⁶ A ra sa gumatua sara e na lako ki na vale-ni-soro e na veisiga, a ra sa lomavata, a ra sa dovi madrai e na veivale, a ra sa kania na kedra e na marau kei na yalo dina,

⁴⁷ ni ra sa vakavinavinaka tiko vua na Kalou, a sa vinakati ira ko ira na tamata vakaaduaga. Ia na Turaga sa vakaikuritaka kivei ira nai soqosoqo lotu, e na veisiga, na tamata era sa vakabulai tiko.