Cakacaka 12 - Ai Vola Tabu (Vakadewa Makawa Vakavoutaki 2021)

Toso Tikoga na Veivakacacani

¹ Ia e na gauna ko ya sa ia ko Eroti na tui me vakararawataka eso vei ira nai soqosoqo lotu.

² A sa vakamatei Jemesa na tuakai Joni e nai seleiwau.

³ Ia ni sa raica sa vinakata ko ira na Jiu, sa qai tauri Pita talega. Ia sa gauna ni kana madrai sa sega ni vakaleveni.

⁴ Ka ni sa taura, sa biuta ki na valeniveivesu, a sa solia ki na mata-sotia e va eratou dui le va, me ratou vakatawai koya; ni sa nanuma me kauta vei ira na tamata, ni sa oti na solevu ni Lako-sivia.

⁵ A sa vakatawai kina ko Pita e na valeniveivesu; ia era sa daumasulaki koya tiko vua na Kalou ko ira nai soqosoqo lotu.

Sa Sereki mai Valeniveivesu ko Pita

⁶ Ia ni sa vakarau ko Eroti me kauta mai, e na bogi ga ko ya sa moce ko Pita e na kedrau maliwa e lewe rua na sotia, a sa vesu e na sinucodo e rua; a ra sa tu nai vakatawa e na mata ni katuba, me ra vakatawa na valeniveivesu.

⁷ Ka raica, sa dua na agilosi ni Turaga sa lako mai, a sa cila yani na rarama ki na valeniveivesu; a sa tavia ko koya na sarisari i Pita, a sa vakaduria cake, ka kaya, “Kusarawa mo tucake.” A sa lutu tani mai ligana na nona sinucodo.

⁸ A sa kaya vei koya na agilosi, “Vauca na nomu i sulu, ka vauca na nomu i vava.” A sa kitaka vakakina. A sa kaya vua, “Mo vakaitutuvitaki iko mada ka muri au.”

⁹ A sa curu yani ko koya, a sa muri koya. A sa sega ni kila ni sa dina na ka sa cakava na agilosi, ia sa nanuma ga sa raica na raivotu.

¹⁰ Ia ni rau sa sivi iratou nai matai ni vakatawa kei nai karua, erau sa yaco ki nai sogo kaukamea sa basika ki na koro. A sa tadola vakai koya walega vei rau, a rau sa lako sara ki tuba ka sivia e dua na gaunisala, ka sa qai lako tani vakasauri vua na agilosi.

¹¹ Ia ni sa qai kilai yalona ko Pita, sa kaya, “Au sa qai kila dina sara, ni sa tala mai na nona agilosi na Turaga, a sa vakabulai au mai na liga i Eroti, mai na nodra i naki kece talega na Jiu.”

¹² Ia ni sa vakananuma tiko, sa yaco ko koya ki na vale i Meri na tina i Joni, a yacana talega ko Marika; era sa lewe vuqa sa soqoni vata kina me masu.

¹³ Ia ni sa tukituki ko Pita ki nai sogo ni matamata-ni-koro, sa qai lako e dua na vada me vakarorogo, a yacana ko Rota.

¹⁴ Ia ni sa kila na domo i Pita, sa sega mada ni dolava nai sogo ni sa reki, a sa cici sara ki loma, ka tukuna ni sa tu ko Pita e na matamata-ni-koro.

¹⁵ A ra sa kaya vua, “Ko sa lialia.” Ia sa vakadinadina tiko ko koya ni sa vaka ga kina. A ra sa qai kaya, “Sa nona agilosi.”

¹⁶ Ia sa tukituki tikoga ko Pita; ka ni ra sa dolava, era sa raica, ka ra kidacala.

¹⁷ A sa vakatabataba vei ira ko koya me ra tiko lo, ka sa tukuna vei ira ni sa kauti koya mai na valeniveivesu na Turaga. A sa kaya, “Laki tukuna na veika oqo vei Jemesa, vei ira talega na veiwekani.” Sa qai lako yani ko koya, ka sa lako ki na dua tale na vanua.

¹⁸ Ia ni sa siga mai, sa sega ni ka lailai na nodra kidroa na sotia, se sa lako beka kivei ko Pita.

¹⁹ Ia ni sa vakasaqara ko Eroti, ka sega ni kunea, sa vakatarogi ira na yadra, ka sa vakarota me ra vakamatei. A sa lako sobu ko koya mai Jutia ki Sisaria, ka tiko kina.

Na Mate i Eroti

²⁰ A sa cudru vakalevu ko Eroti vei ira na kai Taia kei Saitoni. A ra sa qai lomavata ka ra lako mai vei koya; ia ni ra sa rawai Pilasito taumada, ko koya sa lewa na vale ni moce nei Eroti, me vukei ira, era sa qai masuta na veivakaduavatataki, baleta ni sa vakararavi na nodra vanua ki na kakana e kau mai na nona vanua na tui.

²¹ Ia ni sa yaco na siga sa lokuci, sa qai vakaisulu ko Eroti e nai sulu vakaturaga, a sa tiko e nai tikotiko vakaturaga, ka sa vosa vei ira.

²² Sa qai qolouvaka mai ko ira na tamata, “Sa domo ni kalou, sa sega ni domo ni tamata!”

²³ A sa qai yaviti koya vakasauri e dua na agilosi ni Turaga, ni sa sega ni vakarokorokotaka na Kalou ko koya, ka sa kani koya na baca, ka sa ciba ko koya.

²⁴ Ia sa tubu tikoga na vosa ni Kalou ka tete vakalevu.

²⁵ A rau sa lako tale mai Jerusalemi ko Panapasa kei Saula, ni rau sa vakaotia na nodrau veiqaravi, ka rau sa kauti Joni, a yacana talega ko Marika.