Aisea 66 - Ai Vola Tabu (Vakadewa Makawa Vakavoutaki 2021)

Nai Vakarau ni Sokalou e Vinakata ko Jiova

¹ Sa kaya vakaoqo ko Jiova, “Sa noqu i tikotiko vakaturaga ko lomalagi, ia ko vuravura sai tutu-ni-yavaqu. A vale cava dou na tara me noqu se tikina cava me noqu i vakavakacegu?

² Ia na ka kecega oqo sa bulia na ligaqu, ka sa noqu na veika kecega oqo, sa kaya ko Jiova. Ia na tamata oqo ka'u na goleva, io ko koya sa yalomalumalumu ka ramusu na yalona, ka sa rerevaka na noqu vosa.

³ “Ko koya sa vakamatea na bulumakau mei soro, sa vaka e dua sa vakamatea na tamata; ko koya sa vakacabora na lami, sa vaka e dua sa muduka na domo ni koli; ko koya sa cabora nai madrali, sa vaka e dua sa cabora na dra ni vuaka; ko koya sa cabora nai madrali boi vinaka, sa vaka e dua sa vosavakalougatataka na ka lasu wale. Io ko ira oqo era sa digitaka ga na nodra sala, ka ra sa vinakata e na yalodra na nodra ka vakasisila.

⁴ Io koi au, ka'u na digitaka na ka ni nodra veivakaocataki wale; ia na ka era sa rerevaka ka'u na vakayacora vei ira; ka ni'u a kaci, ka sa sega e dua e rogo mai, ka'u a vosa, ka sa sega e dua e rogoca, ia era sa cakava na ka ca e mataqu, ka ra sa digitaka na ka ka'u sa sega ni vinakata.”

⁵ Dou rogoca na vosa i Jiova, koi kemudou sa rerevaka na nona vosa: “Ko ira na wekamudou ka cati kemudou, ka biuti kemudou tani e na vuku ni yacaqu, era sa kaya, ‘Me vakarokorokotaki ko Jiova, me rawa kina ni keimami raica na nomudou reki’; ia era na vakamadualaki ga kina ko ira.

⁶ “A domo ni ue ka rogo mai na koro! A domo ka rogo mai na vale-ni-soro! A domo i Jiova, sa saumi ira tiko na nona meca!

⁷ “Ni se bera na nona taratara, sa vakasucu ko koya; ni se bera ni tatara vua na mosi sa vakasucuma e dua na gonetagane.

⁸ Ko cei sa bau rogoca e dua na ka vakaoqo? Ko cei sa bau raica na ka vakaoqori? Me vakasucumi li e dua na vanua e na siga e dua bau? Se me sucu vata li na lewe ni dua na matanitu? Ia ni sa qai taratara ko Saioni, sa vakasucumi ira na luvena.

⁹ Me'u vakayacora beka na taratara, ka sega ni vakayacora talega na vakasucu?” sa kaya ko Jiova. “Se me'u vakayacora beka na vakasucu, ka qai sogota tale?” sa kaya na nomu Kalou.

¹⁰ “Dou reki vata kei Jerusalemi, ka marautaki koya, koi kemudou kecega sa lomani koya; dou reki vakalevu vata kaya, koi kemudou kecega sa tagicaki koya—

¹¹ mo dou sucuma na sucuna sa dauveivakacegui ka mamau kina; mo dou lobaka ka marautaka na kena levu ni nona lagilagi.”

¹² Ni sa kaya vakaoqo ko Jiova, “Raica, ka'u na vakayacora vua na sautu me vaka na uciwai, kei na nodra i yau na veimatanitu me vaka na wai drodro e vuabale; ia dou na qai sucuma, dou na keveti voli e na sarisarina, ka tenei e na duruna.

¹³ Me vaka e dua sa vakaceguya ko tinana, ka'u na vakacegui kemudou vakakina; ia dou na vakacegui e Jerusalemi.

¹⁴ Ia dou na kunea, ka na reki na lomamudou, ka bulabula na suimudou me vaka na co; ena kilai na liga i Jiova vei ira na nona tamata, ia ena cudruvi ira na nona meca.

Nai Otioti ni Lewa kei na Lagilagi i Jiova

¹⁵ “Ni na lako dina mai ko Jiova e na bukawaqa, ena vaka talega na covulaca na nona qiqi-ni-valu, me ia na nona veisausaumi e na cudru katakata, kei na nona veivunauci e na yameyame ni bukawaqa.

¹⁶ Na bukawaqa kei nai seleiwau, sa na ia kina na veilewai kivei ira na tamata kecega ko Jiova; ia era na lewe vuqa ena vakamatea ko Jiova.

¹⁷ “Ko ira era ia na veivakatabui, kei ira era ia na veivakasavasavataki e na veiwere, ka ra muri koya e dua sa tiko e loma, ka ra sa kana vuaka, kei na ka vakasisila, kei na kalavo, era na vakaoti vata ga, sa kaya ko Jiova.

¹⁸ “Ia koi au ka'u sa kila na nodra cakacaka kei na nanuma ni lomadra; ia, ka'u na vakasoqoni ira vata na lewe ni veivanua kecega kei na dui vosavosa; ka ra na lako mai ka raica na noqu lagilagi.

¹⁹ Ia ka'u na solia e na kedra maliwa e dua nai vakatakilakila; ka'u na talai ira era sa vo ki na veivanua, ki Tasisi, kei Puli, kei Luti—era dauloqata na dakai-titi—ki Tupali, kei Javana, ki na veiyanuyanu vakayawa, era sa sega ni rogoca na noqu totoka, se raica na noqu lagilagi. Era na qai dautukuna na noqu i ukuuku e na veivanua.

²⁰ Era na kauti ira kece na wekamudou mai na veivanua, mei cabocabo vei Jiova, e na ose, kei na qiqi-ni-tamata, kei na tavata, kei na meule, kei na kameli, ki na noqu ulunivanua tabu ko Jerusalemi, sa kaya ko Jiova, me vakataki ira na Isireli era kauta mai nai cabocabo e na bilo savasava ki na vale i Jiova.

²¹ Ia ka'u na lesia talega eso vei ira na Livai me ra bete, sa kaya ko Jiova.

²² “Me vaka sa na tu e mataqu na lomalagi vou kei na vuravura vou ka'u sa cakava, sa kaya ko Jiova, ena tu vaka talega kina na nomudou kawa kei na yacamudou.

²³ Ia mai na vula vou e dua ka yacova na vula vou kadua, kei na Siga ni Vakacecegu e dua ka yacova na Siga ni Vakacecegu kadua, era na lako mai na tamata kecega me ra mai cuva e mataqu, sa kaya ko Jiova.

²⁴ “Era na lako yani, ka raica na yago ni tamata era sa mate ka vuki tani vei au. Ni na sega ni mate na kedra baca, ena sega talega ni bokoci na kedra bukawaqa, ka ra na ka vakasisila vei ira na tamata kecega.”