2 Korinica 1 - Ai Vola Tabu (Vakadewa Makawa Vakavoutaki 2021)

¹ Koi au ko Paula, nai apositolo i Karisito Jisu e na lewa ni Kalou, kei Timoci na wekaqu, Kivei ira nai soqosoqo lotu ni Kalou mai Korinica, kei ira kecega era sa lotu mai Akaia taucoko:

² Me nomudou na loloma kei na vakacegu mai vua na Kalou ko Tamada kei na Turaga ko Jisu Karisito.

Na Vakavinavinaka nei Paula ni Oti na Veivakararawataki

³ Me vakavinavinakataki na Kalou, o koya na Tama ni noda Turaga ko Jisu Karisito, a Tama ni yalololoma, kei na Kalou ni veivakacegui kecega,

⁴ o koya sa vakacegui keitou e na neitou rarawa kecega, me keitou vakacegui ira rawa era sa rarawa e na dua na ka, e na veivakacegui keitou sa vakacegui kina mai vua na Kalou.

⁵ Ia me vaka sa yaco vakalevu sara vei keitou na rarawa e na vuku i Karisito, sa vakacegui keitou vakalevu sara vakakina na Karisito.

⁶ Ia kevaka keitou sa vakararawataki, sa ka mo dou vakacegui kina ka vakabulai, ka sa yaco oqo ni dou sa vosota talega na veika rarawa keitou sa vakararawataki kina; se keitou vakacegui, sa ka mo dou vakacegui kina ka vakabulai.

⁷ Ia sa tudei na neitou nuitaki kemudou, ni keitou sa kila, dou sa votai e na veivakararawataki, dou na votai talega e na veivakacegui.

⁸ Ni keitou sa sega ni vinakata, na veiwekani, mo dou lecava na neitou rarawa sa yaco vei keitou mai Esia, ni keitou sa bitaki vakalevu sara, sa dredre kina na vosota, ka keitou sa sega ni dinata ni keitou na bula.

⁹ Ia keitou sa vaka ni keitou sa lewai me keitou mate, me keitou kakua ni vakararavi kina vei keitou, vua ga na Kalou o koya sa vakaturi ira cake tale na mate.

¹⁰ O koya ka vakabulai keitou mai na mate levu ko ya, ka na veivakabulai tikoga; o koya talega keitou sa vakararavi kina ni na vakabulai keitou tale,

¹¹ ni dou veivuke talega e na masulaki keitou, me lewe vuqa kina era vakavinavinaka e na vuku i keitou, e na vuku ni ka sa soli vei keitou e na vukudra na lewe vuqa.

Veisau nai Tuvatuva ni Veisiko i Paula

¹² Ia oqo na ka keitou sa rekitaka, nai tukutuku ni neitou lewa e loma, ni sa ia na neitou i valavala e vuravura oqo e na loma e dua bauga, kei na loma dina vua na Kalou, ka sa segai e na vuku vakavuravura, ia e na loloma ga ni Kalou—ka vakalevu sara vei kemudou.

¹³ Ni sa sega na ka tani keitou sa vola vei kemudou, oqori ga dou sa wilika ka kila; ka'u sa nuitaka ni dou na kila me yacova nai vakataotioti—

¹⁴ me vaka na nomudou kilai keitou ga e na ka eso—ia e na siga ni noda Turaga ko Jisu, dou na qai rekitaki keitou ka keitou na rekitaki kemudou.

¹⁵ Ia ni ka'u a vakadinata oqo, ka'u a nanuma me'u lako eliu vei kemudou, me yaco kina vakarua vei kemudou nai solisoli loloma;

¹⁶ ka me'u qai laivi kemudou ka lako ki Masitonia ka lesu tale mai Masitonia vei kemudou, mo dou kauti au e na noqu lako vaka ki Jutia.

¹⁷ Ia ni ka'u a nanuma me vakaoqo, au sa qai lomalomarua kina, se segai? Se na ka ka'u sa nakita, au sa nakita vakavuravura beka, me'u tukuna kina na “Io, io,” kei na “Sega, sega” e na gauna vata ga?

¹⁸ Ia me vaka ni sa yalodina na Kalou, na neitou vosa vei kemudou sa sega ni “Io kei na Sega.”

¹⁹ Ni sa sega ni “Io kei na Sega” na neitou vunautaka vei kemudou na Luve ni Kalou, ko Jisu Karisito, oi keitou kei Silivenusi kei Timoci; ia e na vukuna, sa cakava ga ko koya me “Io.”

²⁰ Ni sa “Io” na vosa ni yalayala kecega ni Kalou e na vukuna. Oqo na vuna e da sa cavuta kina e na vukuna na “Emeni,” me vakacaucautaki kina na Kalou.

²¹ Ia sai koya ga na Kalou sa vakataudeitaki keitou kei kemudou me da tu vata kei Karisito, ka sa lumuti keda;

²² o koya talega sa dregati keda, ka sa solia ki na lomada na Yalo Tabu me kenai vakadei.

²³ Ia ka'u sa kaciva na Kalou me lewa na yaloqu kevaka ka'u sega ni dina: ni sa noqu lomani kemudou ga ka'u sa vakaberaberataka kina na noqu lako tale yani ki Korinica.

²⁴ Sa segai ni keitou sa veitaliataka na nomudou vakabauta, ia keitou sa veivuke ga e na nomudou reki, ni dou sa tudei ga e na vakabauta.