1 Timoci 2 - Ai Vola Tabu (Vakadewa Makawa Vakavoutaki 2021)

Na Veivakaro me Baleta na Sokalou

¹ O koya oqo ka'u sa vakarota kina, me ia mada eliu na masumasu, na kerekere, na veimasulaki, kei na vakavinavinaka e na vukudra na tamata kecega,

² e na vukudra na tui kei ira kecega era turaga, me da tiko vinaka kina ka vakacegu, me da ia nai valavala kece sa vakalotu ka kilikili.

³ Sa dodonu oqo, ka vinaka talega e na mata ni Kalou na noda i Vakabula,

⁴ o koya sa vinakata me bula na tamata kecega, ka mai kila sara nai vakavuvuli dina.

⁵ Ni sa dua bauga na Kalou; ka dua bauga na dauveisorovaki e na maliwa ni Kalou kei ira na tamata, io, na tamata ko Karisito Jisu,

⁶ o koya sa soli koya me kedrai voli na tamata kecega —ai tukutuku sa tau e na kena gauna donu.

⁷ Oqori ka'u a lesi kina me'u dauvunautaka me'u kenai apositolo talega (au sa vosa dina, au sa sega ni lasu), me'u nodra i vakavuvuli na veimatanitu e na vakabauta kei nai vakavuvuli dina.

⁸ O koya oqo ka'u sa vinakata kina me masu ko ira na tagane e na yasana kecega, ni ra sa dodoka cake na liga savasava, ka me sega na cudru kei na veiba.

⁹ Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua. Me kakua ni tali na drau ni uludra, me kakua ni vakoula, se vakamata-ni-civa, se vakaisulu e nai sulu sau levu,

¹⁰ ia (me vaka ga sa kilikili kei ira na yalewa era kaya era sa lotu) e nai valavala vinaka.

¹¹ Me tiko lo na yalewa ka me vakatavulici, ka vakamalumalumutaki koya vakalevu.

¹² Ia ka'u sa sega ni laiva na yalewa mei vakavuvuli, se viavia lewa vei koya na tagane, ka me tiko lo ga.

¹³ Ni sa buli taumada ko Atama, ka muri ko Ivi.

¹⁴ A sa sega ni temaki ko Atama, ia na yalewa ga sa temaki, ka sa talaidredre kina.

¹⁵ Ia ena vakabulai ni sa vakasucu gone, kevaka era sa tudei e na vakabauta, kei na loloma, kei na yalosavasava, kei na yalomatua.